အပ္ဍဲပွိုၚ်ၜါဂိတု တၠအကံက် ပါ်ပါဲဟီုဒးလ္တူအောန်လာၚ် (၁၀၀) ပြၚ် ဒးဒုၚ်ရပ်ဒက် ပံက်ဂဗုတ်

လ္ဂုၚ်၊ အံက်တဝ်ဗာ (၄)

အပ္ဍဲပွိုၚ်ၜါဂိတု မထပ်ကေတ်လဝ်အာယုက်ကာလကာတၟေၚ် နူကဵုကောံဓရီုဂီုကၠီုစဵုဒၞါဂှ် တၠအကံက်သဵုယှေဝ်မဳဒဳယျာ မချူပ္တိုန်ပါ်ပါဲဒၟံၚ် လ္တူအောန်လာၚ် ဗ္ဒါဲ (၁၀၀) တၠ ဂှ် ကံၚ်ဇြဳပၞာန် ရပ်ဒက်ကေတ်လဝ်ဒုဟ် နကဵုၝောံပိုဒ်ပကီုပရာပ်ရ။

နူကဵုသြၚ်လောန်တိုၚ်(မ်) စၟဳတ်စမ်ရံၚ် လိက်ပရိုၚ် တက်ပ္တိတ်လၟေၚ်တ္ၚဲ အပ္ဍဲဂိတုအဝ်ဂါတ် ကဵု ဂိတုသေပ်တေမ်ဗာ ၜါဂိတု လိက်ပရိုၚ်တြးဝါဒ (ကြေးမုံ) ဒပ်ပၞာန်ပိုၚ်ဂှ် လၟေၚ်ဒဒှ် ဗွဲလ္တူတေံဝွံ ပါဲနူကဵုတွဵုရးချေၚ်ကဵု တွဵုရးကရေၚ်ဍာဲတံဂှ်တုဲ က္တဵုဒှ်လဝ် ပ္ဍဲကဵုတွဵုရး ကေုာံ ရးဒေသ သှ်ေတံဂှ်ရ။

တၠအကံက်ဝှေတ်ဗော် ဒးဒုၚ်ကေတ်အရေဝ်ရပ်ဒက်လဝ်တံဂှ် ဗ္ဒါဲ (၁၀၀) တၠ နွံတုဲ တၠအကံက် Tik Tok (၉) တၠ ပါလုပ်တုဲ ပ္ဍဲကဵုဏံ နူကဵုရးလ္ဂုၚ်ကဵု မာန္တလေဝ် (၇၀) ပြၚ် ပါလုပ်ဒၟံၚ်ဂၠိုၚ်အိုတ်ရ။

တၠအကံက် ကံၚ်ဇြဳပၞာန်တံ မရပ်ဒက်လဝ်ဂမၠိုၚ် ယဝ်ရဒုဟ်ဒဏ်ပြာကတ်မ္ဂး စောဲအာဂဗုတ် နကဵုၝောံပိုဒ်ရာဇာသာတ်ဇၞော် ၁၂၄ − က ဒးဒုၚ်ဖျေံစၟတ် စဵုကဵုဒဏ်ထံၚ်မွဲအာယုက်မာန်ဂှ်ကဵု သၞောဝ်ဗ္တိုက်သ္အးပကီုပရာပ် မဖျေံစၟတ်ဒုဟ်ဒဏ် နူကဵုဒဏ်ထံၚ် ပိသၞာံ စဵုကဵု ၁၀ သၞာံမာန်တံဂှ်ရ။

သ္အာၚ်နူဂှ်ပၠန် ဒးဒုၚ်ကေတ်အရေဝ် နကဵုသၞောဝ်တန်တဴဒၟံၚ်ဂမၠိုၚ် သၞောဝ်ဆက်စၠောံအဳလက်ထရဝ်နေတ် ၝောံပိုဒ် ၃၃ (က) ၊ ၝောံပိုဒ် ၅၀၅−က တံသၟးဟွံက ကပေါတ်ဆုဲပြံၚ်ဂွံကီု၊ ဆုဲပြံၚ်ဟွံဂွံကီု မဆက်စပ်ကဵုဒုဟ်ဒဏ်တံဂှ် ဒးဒုၚ်သီဂိုၚ်အာ လ္ဂောံကဵုသၞောဝ်ဗ္တိုက်သ္အးပကီုပရာပ်တံမာန်ရောၚ် လလောၚ်တြးလဝ်ရ။

အတိုၚ်သြၚ်လောန်တိုၚ်(မ်) စၟဳတ်ဂွံလဝ်ဂှ်မ္ဂး ပရိုၚ်ထ္မံက်ပ္တိတ်ကေတ်အရေဝ် ကုညးမကၠောန်သ္ပ ရီုဗၚ်ကဵုဇြဟတ် တြးဝါဒကီု၊ ဆဝ်မ္ၚုဟ် ကုဂကောံမဆက်စပ်ကဵု CRPH ၊ NUG နူကဵုကံၚ်ဇြဳပၞာန်သီအဝဵု မလလောၚ်ပ္တိတ်လဝ် နဒဒှ်သၟာပကီုပရာပ်ဂှ်ဝွံ ထ္မံက်ထ္ၜးတဴဒၟံၚ် လၟေၚ်ဒဒှ်တ္ၚဲရ။

ကုညးမရီုဗၚ်ကဵုဇြဟတ် လ္တူညးမကၠောန်သ္ပ တြးလဝ်ဝါဒဆဝ်မ္ၚုဟ်လဝ် နကဵုတၚ်ရန်တၟံ ညံၚ်ယန္တယာအလဵုအသဳ ကေုာံ ပရေၚ်ၜိုဟ်လလမ်ညိၚ်ဝတ် ကၟိန်ဍုၚ် ဂွံလီုလာ်တံဂှ် ကေတ်အာရေဝ် အတိုၚ်သၞောဝ် ဗွဲမစိုပ်တရဴဏောၚ်ဂှ် ကံၚ်ဇြဳပၞာန် ကဵုလဝ်သတိရ။

တုဲကၠုၚ် ပ္ဍဲဂိတုအဝ်ဂါတ် သတ္တာဟတတိယဂှ်လေဝ် စပ်ကဵုပရူပရာပၟတ်ဓာတ်လလဳ ပိုတ်ပၠိုတ်တုဲ ညးတၠရမျာၚ်ဟေပ်ဟပ် ဗျူဟာ မဟီုဂးပါ်ပါဲလဝ် နူကဵု Facebook ဂှ် ကံၚ်ဇြဳပၞာန် ဖျေံလဝ်ဒဏ်ထံၚ် (၂၀) သၞာံ နကဵုၝောံပိုဒ်ရာဇသာတ်ဇၞော် ၁၂၃−က ၊ ၝောံပိုဒ် ၅၀၅−က တံရ။

ဟိုတ်နူပရေၚ်သီအဝဵုဒပ်ပၞာန် ကလေၚ်မွဲဝါပၠန်တံတုဲ အခေါၚ်ဟီုဂးထ္မံက်ပ္တိတ် မၞိဟ်မွဲမွဲ ဗွဲမဗၠးၜးဂှ်ဝွံ ကၠေံအာယျဂှ် ညးချဳဒရာၚ်ကတိုၚ်ကၟဟ် အခေါၚ်အရာမၞိဟ် ကေုာံ ဒဳမဝ်ကရေဇြဳတံ ဟီုဂးလဝ်ရ။

အတိုၚ်လိက်ဒုၚ်စဳရေၚ် Freedom House ဂကောံအခေါၚ်အရာမၞိဟ်ဍုၚ်သ္အာၚ်ဂှ်မ္ဂး ဍုၚ်ဗၟာဝွံ ပါလုပ်ဒၟံၚ် ပ္ဍဲကဵုစရၚ်ဍုၚ် အခေါၚ်ဟီုဂးထ္မံက်ပ္တိတ် ဗွဲမဗၠးၜး အောန်အိုတ်ဂှ်တုဲ စိုပ်ဒၟံၚ်ကဆံၚ်သဝ်အိုတ် ဂၞန် ၉ ယျဂှ် လလောၚ်ပ္တိတ်လဝ် အပ္ဍဲကဵုသၞာံဏံရ။

ပရိုၚ်−သြၚ်လောန်တိုၚ်(မ်)

ဗီု−Twitter