ကြဴနူကဵုထောံအခေါၚ်ဗၠးၜး ဝဳဇြာတုဲဂှ် လာၚ်တရဴကျာ ကြုက်−သေံသီုဖအိုတ် ဗော်ကေန်ပေၚ်ဒၟံၚ်

ၜၚ်ကံက်၊ အံက်တဝ်ဗာ (၄)

ဍုၚ်သေံ မပိုၚ်ပြဳလဝ် ပရေၚ်ပိုန်ဒြပ်ဒုတိယဇၞော်အိုတ် ပ္ဍဲအာယှဒိုဟ်အဂၞဲဏံဂှ်ဝွံ သွက်ညးအာတရဴကြုက်တံဂှ် ကြဴနူစၟတ်ထောံ ကဵုအခေါၚ်ဗၠးၜး ၜဳဇြာတုဲဂှ် လာၚ်တရဴကျာဍုၚ်သ္အာၚ် Thai Airways (၉၀) တၟံကၠံပြၚ်ဂှ် ဗော်ကေန်ပေၚ်ဒၟံၚ်ဖအိုတ်ရောၚ် ဂွံတီကေတ်ရ။

သ္ကိုပ်သၞာဲဒဴ လာၚ်တရဴကျာ Thai Airway ကိုဝ်ရာကွတ် ချာတာသေန်ဂါဂှ် “ ဂၠံၚ်တရဴဓရိပ်ဒၟံၚ် လ္ပာ်ကြုက်တံ ဂၠိုၚ်ကၠုၚ်ဒၟံၚ်ဂှ် ပိုယ်တံ ဂွံဆဵုကေတ် တီတီရ” သာ်ဝွံ ဟီုဂးလဝ်ကဵု ဌာန်ပရိုၚ် Bloomberg ရ။

ဍုၚ်သေံဝွံ ကရောံအပြံၚ်အလှာဲမူဝါဒဂှ် စၟဳစလဝ် သွက်ဂွံဂွံသြန်လုပ် နူကဵုကၟုဲအာတရဴကြုက်တံဂှ်တုဲ တၞဟ်နသ္ဂောံသၠုၚ်ပ္တိုန် ကဏ္ဍအာတရဴဂှ် စဳဇန်ဒၟံၚ် သွက်ဂွံသၠုၚ်ပ္တိုန်ဒက်ပ္တန်အာ စမြိုၚ်သ္ဇိုၚ် သၞေဟ်က္ၜၚ်ကျာ စပ်ကဵုဍုၚ်နာနာတံရ။

အခိၚ်လၟုဟ်ဂှ်လေဝ် ပ္ဍဲကဵုသၞေဟ်ၜၚ်ကံက် မပေၚ်က္ဍတ်ဒၟံၚ်ကဵု ကၟုဲအာတရဴဂှ် ပံက်လဝ် Terminal တၟိ မဒှ်ရ။

ကြဴနူကဝ်ဝေဒ်တုဲ လာၚ်တရဴကျာ Thai Airway ဂှ်ဝွံ စနူဂိတုဒဳဇြေမ်ဗာ ၁ ဏံတုဲ မွဲသတ္တာဟမ္ဂး သွက်ဂွံဓရိပ်အာ ပ္ဍဲကဵုဍုၚ် ၅ ဍုၚ် မၞုံဍုၚ်ကြုက် နူကဵု ၄၉ ဝါ စဵုကဵု ၅၆ ဝါဂှ် ချူဓဇက်ဒၟံၚ် အစဳဇန်တံရ။

ကၟုဲကောန်ဍုၚ်ကြုက်ဂမၠိုၚ်ဝွံ နူစဂိတုသေပ်တေမ်ဗာ ၂၅ စဵုကဵု ဂိတုဖေဖဝ်ဝါရဳ ၂၉ ဂှ် လုပ်စိုပ်အာ ဍုၚ်သေံ ဟွံဒးကေတ်ဝဳဇြာဂှ်တုဲ ကဏ္ဍအာတရဴ ကလေၚ်သၠုၚ်တိုန်ကၠုၚ်ပၠန် မဒှ်ရ။

အတိုၚ်ဂလာန် ဂအုပ်သၞာဲဒဴပရေၚ်ပိုန်ဒြပ် Thai Airway ဂှ်မ္ဂး လၟိဟ်ကၟုဲအာတရဴဍုၚ်ကြုက် ကၠုၚ်စိုပ် ဍုၚ်သေံ ကၠာဘဲကပ်ဂွိုအ်ဒှ်တေံဂှ်ဝွံ နွံလဝ် ၜိုတ် ၅၀ တၟံကၠံရဂှ် ဂွံတီကေတ်ရ။

မေဿတာ ကိုဝ်ရာကောတ်ဂှ် ကၟုဲဍုၚ်သ္အာၚ် အပ္ဍဲဍုၚ် ဗွဲမဂၠိုၚ်ဂၠေၚ် လုပ်စိုပ်ကၠုၚ် ဍာ်ဇမၠိၚ်ဂှ် စှ်ေစိုတ်ကီုလေဝ် ပရေၚ်ဓရိပ် Thai Airway လ္ပာ်ဍုၚ်ကြုက်ဂှ် ထပ်သၠုၚ်ပ္တိုန် ကဆံၚ်ကၠာ Covid-19 ဂွိုအ်ဒှ်တေံ နွံဟွံမွဲဂှ် ဒးချိၚ်ဆဒၟံၚ်ရောၚ် ဟီုဂးလဝ်ရ။

“လၟိဟ်ညးအာတရဴကြုက်တံ ဂၠိုၚ်ကၠုၚ်နူဏံဟီုမ္ဂး ကလေၚ်အာ အတိုၚ်အကာဲအရာဓရိပ်လဝ် ပ္ဍဲသၞာံ ၂၀၁၉ တေံမာန်ဏောၚ်ဂှ် ပိုယ်တံ စၟဳစဒၟံၚ်ရ” သာ်ဝွံ ကိုဝ်ရာကောတ် ချာတာသေန်ဂါ မဒှ်ဂအုပ်သၞာဲဒဴ လာၚ်တရဴကျာ Thai Airway ဟီုဂးလဝ်ရ။

Ref: BLOOMBERG