မတ်မလီု၊ အံက်တဝ်ဗာ(၄)
ကမၠောန်တမ္ၚာ သြၚ်သ္ၚောဲသြၚ်ကြပ် ပ္ဍဲတွဵုရးဍုၚ်မန်တံဂှ် ၜိုန်ရကလေၚ်စကၠုၚ် ဂွံလဝ်ဗ္ဒါဲ(၄)ဂိတုယျကီုလေဝ် မွဲကရောံကဵု ဥတုရာသဳပရေံတံဂှ် ဟိုတ်နူကဒးအောန်ကၠုၚ်ဂှ်ရ ကမၠောန်ဗွဲမဂၠိုၚ် ကျဗြံမံၚ်ရဂှ် တၠကမၠောန်တမ္ၚာတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ရာသီရပ်ကသြၚ်သ္ၚောဲသြၚ်ကြပ်ဂှ် လၟေၚ်သၞာံ စၟတ်သမ္တီလဝ် နူဂိတုဂျူလာၚ် စဵုကဵုဨဗြဴတုဲ ပ္ဍဲအခိၚ်ကသီုသၞာံဏံဂှ် ပ္ဍဲဗလးၜဳတံဂှ် လဗိုတ်ကျာတံ သာတုဲလုပ်စိုပ်ကၠုၚ်ဂှ်ရ ဂၠုၚ်ရပ်ကတံ ခြာဟွံလအ်ဟွံလအ် ဒးကလေၚ်လုပ်မံၚ်သြၚ်ဂှ်ရ အခိၚ်ရပ်က အောန်ကၠုၚ်ရ။
မွဲလ္ပာ်ပၠန်ဂှ်တှ်ေ ကမၠောန်ရပ်ကတံဂှ် ပ္ဍဲကာလဒပ်ပၞာန်သီအဝဵုဏံ ဟိုတ်နူၚုဟ်ကၠေၚ်စက်မပါလုပ် ကပေါတ်ဆက်စပ်ကဵုကမၠောန်တမ္ၚာတံ ၚုဟ်က္ဍၚ်တိုန်ဂၠိုၚ်ကဵုဆကီု၊ သယံဇာတကတံ သာတုဲကၠေံဗ္ဒန်ကၠုၚ်ဂှ်ရ ကဒးအောန်တုဲ ဒးဆေၚ်မံၚ်မုက်ကုပရေၚ်ကျဗြံတံ မဒှ်ရ။
“ရာသဳအဓိကဂှ် ဒှ်ရာသဳလဗိုတ်ကျာတုဲ အခိၚ်လပှ်ညိၚ်ဂှ် အောန်မံၚ်ရ။ လပှ်ဇၞော်မံၚ်ကၠးကၠးဂှ် ပ္ဍဲမွဲဂိတုဂှ် ဒှ်မံၚ်ၜိုတ်(၃)အလန်ရ။ ကဒးဂှ် ၜိုတ်ထေက်ကြိုက်ဂှ် ဟွံဂွံဏီရ။ ဂၠုၚ်ဂှ် ဒးလုပ်မံၚ်သြၚ်ဟဂှ်ရ။ လုပ်သြၚ်တုဲမှ လပှ်ညိၚ်မှ ဒးလလေၚ်ပါမ်မံၚ်ဇာတှ်ေ ဒးၜတ်ပ္တဝ်ကဵုသၞာံတုဲတေံတှ်ေ သၞာံဏံဂှ် ဟွံပြေပြံၚ်စကွေံကွေံဏီရ။ ၚုဟ်ကၠေၚ်စက်ဂှ် က္ဍၚ်မံၚ်ရဂှ် ဒးဟီုရဏး။ တုဲပၠန် ၚုဟ်ဖျာလေဝ် က္ဍၚ်မံၚ်တှ်ေ စဵုကဵုလၟုဟ်ဂှ်တှ်ေ ဟွံကိတ်ဏီရ။ သွက်တၠကမၠောန်ရပ်ကတံဂှ် ဟွံပြေပြံၚ်ပုဟ်ဂှ် ဒးဟီုရ” သာ်ဝွံ သ္ဂးရ။
ကမၠောန်တမ္ၚာ သြၚ်သ္ၚောဲသြၚ်ကြပ်တံဂှ် သၞာံတုဲကၠုၚ်တေံဂှ်လေဝ် ဟိုတ်နူဂွံကအောန်တုဲ စရိတ်အိုတ်ဇၞော်သၠုၚ်မံၚ်ဂှ်ရ ကျဗြံကၠုၚ်လဝ်တုဲ ကိုပ်ကၠာရာသဳရပ်ကဟွံအိုတ်ဂှ်ရ ဒးဂဗကၠုၚ်လဝ် ကုအကာဲအရာ ဒးဖအောန်ယှအ်ဖျေံ ဂၠုၚ်ရပ်ကတံကဵု ဒးဒေါံဇူထောံကမၠောန်တံ မဒှ်ရ။
ပ္ဍဲသၞာံဏံဂှ်လေဝ် မွဲကရောံကဵုပြဿနာရာသဳဥတုဂှ် ဟိုတ်နူစရိတ်အိုတ်ကၠောန်ပ္တိတ်တံ ဇၞော်သၠုၚ်မံၚ် ဂၠိုၚ်ကဵုဆဂှ်ရ ကမၠောန်ဗွဲမဂၠိုၚ် ထပ်ဒးဂဗကၠုၚ်မံၚ် အကာဲအရာဒးဒေါံဇူတံရောၚ် မဒှ်ရ။
ပ္ဍဲကမၠောန်ရပ်က သြၚ်သ္ၚောဲသြၚ်ကြပ်တံဂှ် ဆေၚ်စပ်ကဵုအခက်အခုဲ ဒးဆေၚ်မံၚ်မုက်လၟုဟ်ဏံဂှ်တုဲ တၠကမၠောန်တမ္ၚာမွဲတၠဂှ်လေဝ် ဟီုကဵုဌာန်ပရိုၚ်သြၚ်လောန်တိုၚ်မ် ဗီုလၟုဟ်ရ။
“အပ္ဍဲ(၄)ဂိတုဏံဂှ်တှ်ေ ဒှ်အာအကာဲအရာ ကျဗြံကွေံကွေံရ။ ကဂှ် ဟွံဒးလးလးရ။ ၜဳဂှ်တှ်ေ တိတ်မံၚ်အရိုဟ်တ္ၚဲရ။ အကာဲအရာဥတုရာသဳဟွံခိုဟ်တုဲ ကာလဟွံဂွံပါမ်တှ်ေ ဟွံဂွံပါမ်ရ။ အခိၚ်ပါမ်ဂှ်လေဝ် ၜိုတ်ဂွံစသွဗီုဏံရ။ မွဲပိဿာ၊ ၜါပိဿာတုဲအာ အတိုၚ်ဏံရ။ ကၠာတေံဂှ်တှ်ေ ဟွံကေၚ်ဂဗကဵုအခက်အခုဲဗီုတံဏံ မွဲလှ်ေရ။ ရာသဳကဂှ်လေဝ် ဟွံဍာံရပုဟ်။ မုဒှ်ရောတှ်ေ ကၠာတေံဂှ် ကၠောန်ကၠုၚ်လဝ် ပရေၚ်ထိၚ်ဒဝ်သယံဇာတကွေံကွေံမွဲတဲ။ အခိၚ်လၟုဟ်ဂှ်တှ်ေ ကြဴနူကာလကိုဝေတ်တုဲဂှ် ကဵုအပြံၚ်အလှာဲ အကာဲအရာပရေၚ်ဍုၚ်ကွာန်ဏံ ကေုာံ ကဵုအကြေပ်အဂြတ်ပရေၚ်ပိုန်ဒြပ်ဏံဂှ်တှ်ေ အရာတံဂှ် ဂှ် ကၠောန်ဟွံမာန်လးလးရ။ ကၠောန်ဟွံမာန်ရတှ်ေ ဇာပသဲတံဂှ်လေဝ် လၟုဟ်မ္ဂးတှ်ေ ပ္ဍဲဗလးၜဳဂှ် ဂိၠုၚ်မံၚ်ကွေံကွေံရ။ ကတံလေဝ် မကၠက်ကၠုၚ်အိုတ်ရ” သာ်ဝွံ သ္ဂးရ။
သ္အာၚ်နူဂှ်ပၠန် ပ္ဍဲလက်ထက်ကံၚ်ဇြဳပၞာန်ဂှ် ဟိုတ်နူပရေၚ်ထိၚ်ဒဝ်သယံဇာတဍာ် ဇြဟတ်ဍိုန်မံၚ်ဂှ်ရ ကရပ်ဂွံနၚ်တံဂှ်လေဝ် ဒးဂဗကၠုၚ်ကုအကာဲအရာ သွံစဟွံဂွံတုဲ ယဝ်ခါရ ကၠောန်ကဵုပရေၚ်ထိၚ်ဒဝ် သယံဇာတတံ ဗွဲမဂတာပ်အခိၚ်ဟွံမာန်မ္ဂး သ္ဇက်ဂွံဒးဆေၚ်မုက်ကဵု ပြဿနာမကကၠက်တံနွံမံၚ်ရ။
တွဵုရးဍုၚ်မန်ဂှ် လၟိဟ်ဂၠုၚ်ပါမ်က သြၚ်ကြပ်သြၚ်သ္ၚောဲအပံၚ် ၃၀၀၀ ပြၚ်နွံမံၚ်တုဲ လၟေၚ်သၞာံ လျိုၚ်တာန်က၊ၚုဲ တိတ်မံၚ် ဂၠိုၚ်ကဵုပြကောဋိကိုတ်တုဲ ကပေါတ်ဍာ်တိတ်ကၠုၚ်တံဂှ်တှ်ေ အဓိကပ္လံၚ်ပ္တိုန်သွံတြးမံၚ် ဍုၚ်ကြုက်မဒှ်ရ။
ဆ္ဂးကမၠောန်ကဂှ်လေဝ် ပ္ဍဲကာလသီအဝဵုဏံ မ္ၚးနူတၚ်သၞောတ်ဗ္ၜတ်ကပေါတ်ပ္လံၚ်ပ္တိုန် ကံၚ်ဇြဳပၞာန်တံဂှ် ဟိုတ်နူစေဝ်ပၞောန်ပတေၚ်ဓရတ်လဝ်ဂှ်ရ ဒးဒုၚ်မံၚ်ဘဲဒဏ်သီအဝဵု ညံၚ်ရဴကမၠောန်တၞဟ်သ္အာၚ်တံ ဗွဲမဇၞော်ကဵုဇြဟတ် မဒှ်ရ။
ပရိုၚ်-သြၚ်လောန်တိုၚ်မ်
ဗီု-CJ
sanlontai