ပါလဳမာန်ယူကရုၚ် ဟီုဂရိုဟ်ပျုတ်ဗ္ဒေက် သေဌဳဗဳလျာန်နာအမေရိကာန် အဳလောန်မက်သ်

ကိဗ်ယေပ်၊ အံက်တဝ်ဗာ(၄)

ဗီုပြၚ်မေမ်စ်(meme) သ္ပလဝ်စရဵု လ္တူသမ္မတဇြဳလာန်သကဳ အာတ်မိက်ဒၟံၚ် ဇရေၚ်ဂကောံကၟိန်ဍုၚ်ပလိုတ်တအ် သွက်ဂွံကဵုအရီုဗၚ် ပ္ဍဲပေါဲပၞာန်မွဲဂှ် ဟိုတ်နူပ္တိုန်လဝ် ပ္ဍဲပလေတ်ဖောၚ်မဳဒဳယာပရေၚ်မၞိဟ်ညးတုဲ ပါလဳမာန်ယူကရုၚ်ကဵု ဥက္ကဋ္ဌကၠတ်ထဝ်တအ် ပ္တိုန်ဒုဟ်ပျုတ်ဗ္ဒေက်လဝ် သေဌဳဗဳလျာန်နာအမေရိကာန်အဳလောန်မက်သ်ရ။

မက်သ်ဂှ် ၜိုန်ရပိုၚ်ပြဳလဝ် SpaceX ရီုဗၚ်ထ္ၜလဘာ်ကဵုဒၟံၚ် ပရေၚ်ဆက်စၠောံဂြိုဟ်ပတောံ Starlink ပၟိက်ကိစ္စဇၞော်ဒၟံၚ် သွက်ပရေၚ်ဒၞာဒုၚ်တဝ်စၞေဟ် ယူကရုၚ်ကီုလေဝ် ဟိုတ်နူတၚ်လဟီုညးတုဲ ကာလလဆောဝ် ဗဒှ်ဒၟံၚ်ဒေါသ ယူကရုၚ်ရ။

မက်သ်ဂှ် ပ္တိုန်လဝ် မေမ်စ်(meme) တုပ်ကဵုရုပ် ဇြဳလာန်သကဳ အာတ်မိက်ဒၟံၚ်အရီုဗၚ်ပၞာန် မွဲဗီုတုဲ သီုကဵုမလိက်သ္ပစရဵုမွဲပၞောန် ပ္တိုန်လဝ် ပ္ဍဲပလေတ်ဖောၚ်အေန်တာနေတ်ညး X ဂှ် ပ္ဍဲကဵုဂိတုအံက်တဝ်ဗာ စၟတ်တ္ၚဲ (၁) အခိၚ်ပြဟ်ဟ်တေံရ။

က္ဍိုပ်သ္ကိုပ်ယူကရုၚ်ကဵု သၞာဲဒဴကဆံၚ်လ္တူညးတအ်ဂှ် သွက်ဂွံဗ္တိုက်ပ္တိတ် ပရေၚ်လောန်ၜက်ရုယှာ အလုံမွဲဒမြိပ်ပၞာန်မာန်ဂှ် အာတ်မိက်လဝ် အရီုဗၚ်ပရေၚ်ပၞာန် ဇရေၚ်မဟာမိတ်ညးတအ် အပံၚ်လၟိဟ်ဒဝ်ဠာ ဂၠိုၚ်ကဵုဗဳလျာန်ရ။

ပ္ဍဲကဵုမုက်လိက်ပါလဳမာန်ယူကရုၚ်လုပ်သၞောဝ်ကီု သီုကဵုပ္ဍဲပလေတ်ဖောၚ်ဇြောယှေဝ် X ဥက္ကဋ္ဌကၠတ်ထဝ်ယူကရုၚ် ရူသလာန်သတာချူခ်ဂှ်လေဝ် ဟီုဂးပါ်ပါဲလဝ် ပရေၚ်မက်သ် ဟီုသ္ပလဝ်စရဵုဂှ် တၠုၚ်လအာတုပ်သၟဟ်တုဲ စောစောဲလဝ် တြးကဵုဒၟံၚ်ဝါဒရုယှာရ။

တၚ်မက်သ် ဟီုသ္ဂးလဝ်လ္ၚဵုဂှ် ညးကဵုကသပ်သမ္မယူကရုၚ်လေဝ် ဟိုတ်နူယူကရုၚ်တုဲ ဒးမံၚ်ဒၟံၚ်ကၞပ်သ္ၚောံ ဟွံသေၚ်မ္ဂး ဟိုတ်နူယူကရုၚ်တုဲ ကၠောန်သ္ပဒၟံၚ် ညံၚ်ဂွံဒှ်ကလိုက်ကၟဵုဂှ် ဗစိုပ်ဏာဒၟံၚ် သွက်ဂွံစိုပ်အာ ပ္ဍဲဂတာတဲပရေၚ်တြးဝါဒရုယှာရဂှ် ဟီုလဝ် ပ္ဍဲပလေတ်ဖောၚ် X ရ။

သၞာဲဒဴယူကရုၚ် ပ္ဍဲကဵုပေါဲပၞာန်တအ်ဂှ် သွက်ပရေၚ်ၜိုဟ်လလံ ထေက်ကဵုဒးချပ် သွက်ဂွံဗလးထောံတိဍာ်ထေက်ရောၚ် တၚ်ကဵုကသပ်မက်သ် ဓမံက်ထ္ၜးလဝ်ဂှ် ဟီုပါ်ပါဲလဝ်တုဲ ကိဗ်ယေပ်ဟီုတးပါဲလဝ် ပိုတ်တ်သ္ကုတ်တ် နူကဵုအခိၚ်ပြဟ်ဟ်တေံရ။

ပ္ဍဲဂိတုသေပ်တေမ်ဗာဂှ် ဇြဳလာန်သကဳ အာစိုပ်လဝ်အမေရိကာန်တုဲ မ္ၚးနူဏံ သွက်ဂွံထပ်က္လိဂွံအရီုဗၚ်မာန်ပၠန် ဆဵုဂဗလဝ်ကဵု သၞာဲဒဴကဆံၚ်လ္တူတအ်ရ။ လအ်ဂွံၜိုတ်မွဲသတ္တာဟဂှ် အရီုဗၚ်သွက်ကၟိန်ဍုၚ်ယူကရုၚ်ဂှ် ဒးဒုၚ်ပသှ်ေစွံလဝ် နူတၚ်စဳမာန်သြန်ဂအုံ ကၠတ်ထဝ်အမေရိကာန် ပိုၚ်ခြာဖျေံလဝ်ဂှ်ရ။

ပ္ဍဲကဵုသၞာံတုဲကၠုၚ်တေံ ကြဴနူရုယှာ စလောန်ၜက်တုဲဂှ် အမေရိကာန် ဒှ်ညးတၠဒါန်ဇၞော် သွက်ယူကရုၚ်မွဲတုဲ အပ်ပြာပ်ကဵုလဝ် အရီုဗၚ်ပၞာန် ကေုာံသြန် အပံၚ်လၟိဟ်ဒဝ်ဠာ ဂၠိုၚ်ကဵုဗဳလျာန်ရ။

Ref: Reuters