ကအ်ကြိက်၊ အံက်တဝ်ဗာ (၅)
ဟိုတ်နူပရေၚ်ပန်ပှော်လွဟ်ဇၞော် ဒပ်ကံၚ်ဇြဳပၞာန် အပ္ဍဲကဵုကွာန်အာန်ဖကျဳ၊ ပွိုၚ်ဍုၚ်ကအ်ကြိက်၊ တွဵုရးကရေၚ်ဂှ်တုဲ သ္ၚိဒၟံၚ် (၃) မ ဇီုကပိုက်လီုလာ်လဝ်တုဲ ညးဗြဴဒေသမွဲတၠ ဇီုကပိုက်ကလိဂွံလဝ်ဝပ်ရောၚ် ပ္ဍဲဂိတုအံက်တဝ်ဗာ ၄ တေံ KNU ဗဟဵု လလောၚ်ပ္တိတ်လဝ်ရ။
နူကဵုတမ်ဒပ်တိုက်ကံၚ်ဇြဳပၞာန် စၟတ် (၉၇) ဖျေံသ္ဇိုၚ်ဍုၚ်ကအ်ကြိက်ဂှ် ပ္ဍဲဂိတုအံက်တဝ်ဗာ (၃) အခိၚ်ဇိုၚ်သဝ်တ္ၚဲ (၈) နာဍဳဂှ် ပေါဲဗ္တိုက်ဟွံမွဲမွဲသာ် ပန်ပှော်စုတ်လဝ် လွဟ်ဇၞော် (၃) မ အပ္ဍဲကဵုကွာန်အာန်ဖကျဳ နကဵုမသက္ကုဟိုတ်ရ။
ဟိုတ်နူလွဟ်ဇၞော်ဒပ်ကံၚ်ဇြဳပၞာန် ဒတုံဗ္တိုဟ်ထ္ကးအာလဝ်ဂှ်တုဲ သ္ၚိဒၟံၚ် ဥူမျအေ၊ ဥူတုၚ်တေန် ကေုာံ ဒဝ်မေဝ်တေန်အေ ဒၟံၚ်ကွာန်အာန်ဖကျဳတံ ဇီုကပိုက်လီုလာ်လဝ်တုဲ ဒဝ်မေဝ်တေန်အေဝွံလေဝ် ကလိဂွံအာလဝ်ဝပ် ဒးအာလဝ်ကဝေက်မကမ် ပ္ဍဲကဵုဗုၚ်ရ။
တုဲကၠုၚ် ပ္ဍဲဂိတုအံက်တဝ်ဗာ (၂) တေံဂှ်လေဝ် နူကဵုတမ်ဒပ်ကံၚ်ဇြဳပၞာန် စၟတ် (၃၁) ဖျေံသ္ဇိုၚ်လှာဒကှ် ဟိုတ်နူပန်ပှော်စုတ်လဝ်လွဟ်ဇၞော်ဂှ်ရ သ္ၚိဒၟံၚ်ညးဍုၚ်ကွာန်ဒေသ မၞုံအရာပ်စၟတ် (၁) လ္တူဍုၚ်လှာဒကှ် (၂) မ ဇီုကပိုက်လီုလာ် က္တဵုဒှ်လဝ်ရ။
ပ္ဍဲကဵုပွိုၚ်ဍုၚ်ကအ်ကြိက်ကဵု ပွိုၚ်ဍုၚ်လှာဒကှ် မပါလုပ်လဝ် ပ္ဍဲကဵုတိဍာ်အုပ်ဓုပ် ဒပ်မဟာ (၆) KNU ဂှ် အပ္ဍဲကာလသီအဝဵုဏံ ဒပ်ကံၚ်ဇြဳပၞာန်ဝွံ ဟိုတ်ဟွံမွဲမွဲသာ် ရပ်ဒက်ပျဲပျာံ ညးဍုၚ်ကွာန်ကောန်အရာပ်တံဂှ်ကီု၊ လုပ်စိုပ်ဂၠိုက်ဂၠါဲ ပလီုပလာ် သ္ၚိဒၟံၚ်ညးဍုၚ်ကွာန်တံတုဲ ကေတ်ဏာကပေါတ်တံဂှ်ကီု၊ ပရေၚ်ဝးပ္ကဝ်အခေါၚ်အရာမၞိဟ်တံကဵု အမှုရာဇာဝတ်ပၞာန်တံဂှ် ကလိလောန်ဒၟံၚ် လၟေၚ်ဒဒှ်တ္ၚဲရောၚ် KNU ဟီုဂးလဝ်ရ။
ပရိုၚ်−သြၚ်လောန်တိုၚ်(မ်)
ဗီု−KNU
sanlontai