လံၚ်လုၚ်၊ အံက်တဝ်ဗာ (၅)
ဒပ်ပံၚ်ကောံပျူသဝ်ထဳ၊ ကံၚ်ဇြဳပၞာန် မဖျေံလဝ်ဒပ် ဗ္ဒါဲကွာန်ကျံက်နဳမဝ်၊ ပွိုၚ်ဍုၚ်လံၚ်လုၚ်၊ ရးဒေသဇၞော်တၞၚ်သဳ ဒးဒုၚ်ဗ္တိုက်တုဲဂှ် (၃) တၠဟွံအောန် ချိုတ်မာန်ရောၚ် ဂွံတီကေတ် အတိုၚ်ဂလာန် ကောန်ဂကောံဒပ်စဵုဒၞါဒေသတံရ။
ပ္ဍဲဂိတုအံက်တဝ်ဗာ (၄) အခိၚ်နူဂယး ၜိုတ် (၅) နာဍဳ ဂကောံဒပ်ပံၚ်ကောံစဵုဒၞါဒေသတံ အာစိုပ်ဗ္တိုက်လဝ် ကုဒပ်ပံၚ်ကောံပျူသဝ်ထဳ၊ ကံၚ်ဇြဳပၞာန် ဇြဟတ်ဒပ် ဗ္ဒါဲ (၂၀) မဖျေံသ္ဇိုၚ်မံၚ်တန်တဴဒၟံၚ်ဂှ် နကဵုလွဟ်ဇၞော်၊ လွဟ်ဍောတ်တံရ။
ဟိုတ်နူပရေၚ်ဗ္တိုက်ဏံတုဲ ပရေၚ်ပန်ပှော်ၜါလ္ပာ် က္တဵုဒှ်လဝ် ပွိုၚ် (၂) နာဍဳပြၚ်တုဲ လ္ပာ်ကံၚ်ဇြဳပၞာန် (၃) တၠ ချိုတ်တုဲ မၞိဟ်ကလိဂွံဝပ်တံလေဝ် နွံဒၟံၚ်ရောၚ် သ္ဂးရ။
အပ္ဍဲပေါဲဗ္တိုက်ၜါလ္ပာ်ဂှ် နူကဵုက္ၜၚ်ပၞာန် ဒပ်ဍာ်ကံၚ်ဇြဳပၞာန် ဘိုၚ်ပန်ပှော်ကဵုလဝ် လွဟ်ဇၞော် ဟွံပိုတ်သ္ကုတ်တုဲ လွဟ်ဇၞော်ဒတုံဗ္တိုဟ်ထ္ကး အပ္ဍဲကွာန်တံ က္တဵုဒှ်လဝ်ရ။
ဒၟါနူပေါဲဗ္တိုက်တုဲ ညးဒေသတံ ဒးဂြိပ်ဒဴပါဲဒလေတ်ဒၟံၚ်တုဲ အကာဲအရာ သ္ၚိဒၟံၚ်လီုလာ်တံကဵု ကလိဂွံဝပ်ဇီုကပိုက်တံ ဗွဲလစှ်ေ ဂှ် ဟွံဂွံတီကေတ်ဏီရ။
ပ္ဍဲပွိုၚ်ဍုၚ်လံၚ်လုၚ်ဂှ် အပ္ဍဲကာလသီအဝဵုဏံ ဗ္ဒိုပ်ဒပ်ကံၚ်ဇြဳပၞာန်၊ ဗ္ဒိုပ်ဗၠာဲသၟိၚ် ကေုာံ သၞေဟ်ကၚ်စၟဳတ်တံ ဒးဒုၚ်ဗ္တိုက်ဒၟံၚ် မွဲဏှမွဲဏှတုဲ ၜါလ္ပာ်ဇီုကပိုက်ချိုတ်တံလေဝ် နွံဒၟံၚ်ရ။
ပ္ဍဲရးတၞၚ်သဳဂှ် အပ္ဍဲဂိတုသေပ်တေမ်ဗာ တုဲကၠုၚ်ဏံ လၟိဟ်ပေါဲဗ္တိုက် အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံစဵုဒၞါဒေသတံဂှ် က္တဵုဒှ်လဝ် ဟွံအောန်နူကဵု ၅၀ ဝါရောၚ်ဂှ် ဂွံတီကေတ် အတိုၚ်တၚ်လလောၚ်တြး ဂကောံသုတေသန အပ္ဍဲဒေသတံရ။
ပရိုၚ်−သြၚ်လောန်တိုၚ်(မ်)
ဗီု−LLPDF
sanlontai