အစဳဇန်ကံၚ်ဇြဳပၞာန် ဗ္တောန် “အ”ပိမဂှ် ညးဍုၚ်ကွာန်တံ စိုတ်လုပ်စဟွံမွဲ

မတ်မလီု၊ အံက်တဝ်ဗာ(၅)

အစဳဳအဇန်ကံၚ်ဇြဳပၞာန် ကလေၚ်ဗ္တောန်”အ”ပိမတံဂှ် မွဲကရောံကဵုပဋိပက္ခရပ်လွဟ်တံဂှ် ဟိုနူၚုဟ်ဖျာက္ဍုၚ်တိုန်တံတုဲ ဒးပသောၚ်မံၚ်ပရေၚ်ဗုၚ်ဂၞဴသ္ၚိကၟိန်တံသၟးဂှ်ရ ညးစိုတ်လုပ်စတုဲတိုန်စိုပ်တံ နွံကၠုၚ်မာန်ဟွံသေၚ်ရဂှ် ညးဒေသတံကဵု ပွဳူဗွိုၚ်ပရေၚ်ပညာတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။

က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော်မေန်အံၚ်လှာၚ်ဂှ် သွက်ဂွံဖအောန်ယှအ်ဖျေံ ပွဒိုက်ဝါတ်တံဂှ် နကဵုညးဍုၚ်ကွာန်တံ သွက်ဂွံလေပ်လိက်ဂှ် နွံပၟိက်ဂှ်ရ အလုံမွဲကၟိန်ဍုၚ် သွက်ဂွံဖျေံကဵုတန်ဗ္တောန် “အ”ပိမအိုတ်ညိဂှ် တုဲကၠုၚ်ပ္ဍဲဂိတုအဝ်ဂါတ် သတ္တာဟလက္ကရဴအိုတ်ဂှ် စၞောန်ပ္ညုၚ်ကၠုၚ်ရ။

ဟိုတ်နူတၚ်စၞောန်က္ဍိုပ်သ္ကိုပ်ပၞာန်တုဲ ဌာနဝန်ဇၞော်ပရေၚ်ပညာ သၟဝ်တဲကံၚ်ဇြဳပၞာန်ဂှ် ပ္ဍဲဒၞါဲလ္ၚဵုမၞုံပ္ဍဲဍုၚ်တံဂှ် သွက်ဂွံကလေၚ်ဖျေံကဵု တန်ဗ္တောန်”အ”ပိမဂှ် ကၠောန်သ္ပပလေဝ်ပလေတ်မံၚ်ရ။

ဆ္ဂးဂှ်လေဝ် ပ္ဍဲဒၞါဲဒေသဗွဲမဂၠိုၚ်တံဂှ် တိဍာ်ဟွံညိၚ်ဝတ်တံ၊ ပေါဲဗ္တိုက်တံသ္ကာတ်မြဟ်မံၚ်တံကဵု မ္ၚးနူပရေၚ်ဂီုကၠီုဟွံမွဲဂှ် လ္ပာ်ကံၚ်ဇြဳပၞာန်တံ ကဵုပရေၚ်ဂီုကၠီုဍာ်ဍာ်ပေၚ်ၚ် မာန်ညိဟာဟီုဂှ် ပ္ဍဲပွဳူဗွိုၚ်ပရေၚ်ပညာ Non CDM တံဂှ် ပရေၚ်ဂွိၚ်ဂွါဲတံ နွံမံၚ်ရ။

အ္စာဗြဴCDM မွဲတၠဂှ်တှ်ေ ဟိုတ်နူအကြေပ်အဂြတ် ပရေၚ်ပိုန်ဒြပ်ပြဟ်ဟ်ဏံဂှ်တုဲ ညးတိုန်စိုပ်တန်ဗ္တောန် “အ”ပိမတံ နွံကၠုၚ်ဟွံသေၚ်ရဂှ် သ္ၚဳဂၠိပ်လဝ်ရ။

“ပ္ဍဲအကာဲအရာဏံဂှ် ဍေံတံပလံၚ်တိဍာ်ဗီုလဵုရော။ ပလံၚ်ဟွံမာန်တှ်ေ ၜိုတ်မာန်ဂှ်မာန် ဗ္တောန်ပ္ဍဲအရာပ်ဏံဟာ။ ဂွံဗ္တောန်ပ္ဍဲအရာပ်ပၠန်ဂှ်လေဝ် နကဵုမၞိဟ်ဇၞော်ဇၞော်တံဂှ် စိုတ်လုပ်စကဵုအရာဏံ ဟွံမာန်ပုဟ်။ လၟုဟ်ဂှ် သွက်သ္ဂောံဂွံကၠေၚ်၊သ္ဂောံဂွံသ္ၚုဂှ် ပ္ဍဲအခိၚ်ဝါကျာတ်မံၚ်ဂလိုၚ်ဏံဂှ် သွက်ဂွံလေပ်ပညာဂှ်လေဝ် စိုတ်လုပ်စမာန်ရောၚ်ဂှ် ဟွံထေၚ်ရ။ ပရေၚ်စန်ဒက်ဍေံတံမွဲရဂှ် ထေၚ်ကေတ်ရ။ ဣဏံဂှ် ဒှ်အဓိပ္ပါယ် ကလေၚ်ဂြဲကလေၚ်မံၚ် လောန်ကၠုၚ် (၅၀)သၞာံတေံရ” သာ်ဝွံ ညးသ္ဂးရ။

သ္အာၚ်နူဂှ်ပၠန် ကံၚ်ဇြဳပၞာန်ဂှ် ကၠောန်သ္ပသွက်ဂွံဗ္တောန် “အ”ပိမ ဗီုလၟုဟ်ဏံဂှ် ဒဒှ်ရပ္ဍဲဍုၚ်ညိၚ်ဝတ်မံၚ်တုဲ စဵုကဵုဒေသရးတံဂှ် ညံၚ်ပရေၚ်ပညာသ္ဂောံသၠုၚ်တိုန် ရေၚ်တၠုၚ်ကဵုမံၚ်ရောၚ်ဂှ် မိက်ဂွံထ္ၜးစကုဍုၚ်သ္အာၚ်တံတုဲ ကၠောန်သ္ပမံၚ်ရဂှ် ညးဆက်ဟီုရ။

ညးဒေသရးသက်ကိုၚ်မွဲတၠဂှ်တှ်ေ ပ္ဍဲအကာဲအရာ ကံၚ်ဇြဳပၞာန်ထ္ပက်ကရောၚ်ပၞာန်မ္ဂး ဒးဂြိပ်မံၚ်တံဂှ် သွက်ဂွံဗ္တောန်”အ”ပိမဟီုဂှ် ဟွံစှ်ေကဵုနတဲတုဲ ဟိုတ်နူဒးရုန်ဂစာန်မံၚ် ကုပရေၚ်စသုၚ်မံၚ်စံၚ်ဂှ်ရ ညးလဵုမွဲမှ စိုတ်လုပ်စရောၚ် ဟွံသေၚ်ပုဟ်ဂှ် ဟီုကဵုဌာန်ပရိုၚ်သြၚ်လောန်တိုၚ်မ်ရ။

“လ္ညာတ်အဲဂှ်တှ်ေ ဟွံစှ်ေနတဲပုဟ်ဂှ် ထေၚ်ကေတ်ရ။ မုဟိုတ်ရောတှ်ေ ကွာန်ပိုဲ ဍေံတံပန်ပှော်ဗ္တိုက်မံၚ်ဂှ်တှ်ေ တ္ၚဲထ္ပက်ကရောၚ်ပၞာန်မ္ဂး ဒးဂြိပ်ရ။ တ္ၚဲတုဲအာဂှ်တှ်ေ ဒးကလေၚ်လုပ်စမ်ရံၚ်သ္ၚိရ။ မုကေတ်ဏာမု၊ မုသ္ပဏာမုကီုရော။ စံၚ်တှ်ေစံၚ်ဏာဏောၚ်၊ ဟွံစံၚ်မ္ဂးလေဝ် ပိုဲဂှ် ဒးဂွိၚ်မံၚ်ကဵုဒၞါဲမံၚ်ရ။ သွက်လိက်တၞးစၟတ်သမ္တီတံဂှ်လေဝ် ဟွံလောဲသွာပုဟ်။ ညးအာယုက်ဇၞော်ဇၞော်တံလေဝ် ပွစိုတ်လုပ်စတံနွံဏောၚ်ဂှ် ဟွံထေၚ်ရ” သာ်ဝွံ ညးသ္ဂးရ။

သ္အာၚ်နူဂှ်ပၠန် ပ္ဍဲဒၞါဲမၞုံပ္ဍဲဍုၚ်ဗွဲမဂၠိုၚ်တံဂှ် ဟိုတ်နူပရေၚ်တိဍာ်ညိၚ်ဝတ် ဟွံမွဲဂှ်ရ တၚ်ရန်တၟအ် “အ”ပိမကံၚ်ဇြဳပၞာန်ဂှ် ပရေၚ်အံၚ်ဇၞးနွံမာန်ဟွံသေၚ်တုဲ ကၠောန်သ္ပထ္ၜးစဗီုပြၚ်သၟးရတုဲ သွက်ပေါဲရုဲမာဲဂှ် ကၠောန်သ္ပသွက်ဂွံစှ်ေပရေၚ်စန်ဒက် စဵုကဵုအပ္ဍဲဒေသတံ ဒှ်မာန်ရဂှ် ညးဆက်ဟီုရ။

တန်ဗ္တောန်”အ”ပိမ ကၠာတေံဂှ်တှ်ေ လေပ်ကၠောန်သ္ပစ ပ္ဍဲရာသဳဘာတက္ကသိုလ်မာတ်တံတုဲ အ္စာဘာ၊အ္စာဗြဴတက္ကသိုလ်တံ က္ဍိုက်က္ဍိုပ်တုဲ မွဲကရောံကဵုကွးဘာတက္ကသိုလ်တံဂှ် ဗ္တောန်ကဵုလဝ် ညးပညာအတန်ဟွံမွဲတံ၊ ညးဇၞော်ဇၞော် ပညာအတန်အောန်မံၚ်တံ မဒှ်ရ။

မွဲလ္ပာ်ပၠန်ဂှ် က္ဍိုပ်သ္ကိုပ်ပၞာန်ဂှ်တှ်ေ ညးဍုၚ်ကွာန် နူရးတံကဵု နူဒေသတၞုၚ်တၞးတံဂှ် သွက်ဂွံလေပ်လိက် နူသ္ဇိုၚ်တံမွဲကဆံၚ်ဂှ် နွံပၟိက်တုဲ၊ ညံၚ်ဂွံလေပ်လိက်ဂှ် ကၠောန်တုဲမှ ဒးဆက်ကၠောန်သ္ပအာ ပရေၚ်သၠုၚ်ပ္တိုန်ပညာအတန်တံရဂှ် ဟီုဂးလဝ်ရ။

အတိုၚ်လိက်ဒုၚ်စဳရေၚ် ဂကောံမၚ်ရံၚ် ပရေၚ်ပညာဍုၚ်နာနာ (GCPEA) ပ္တိတ်လဝ် ပ္ဍဲဂိတုသေပ်တေမ်ဗာ စၟတ်တ္ၚဲ(၉)ဂှ်မ္ဂး ပ္ဍဲစရၚ်ကၟိန်ဍုၚ်ပရေၚ်ပညာ ဒးဒုၚ်ဗ္တိုက်ဂၠိုၚ်အိုတ်တံဂှ် ဍုၚ်ဗၟာပါလုပ်ကၠုၚ်ရဂှ် ဂွံတီကေတ် အတိုၚ်တၚ်လလောၚ်တြး တ္ၚဲပရေၚ်စဵုဒၞါ ပရေၚ်ပညာဍုၚ်နာနာရ။

ပရိုၚ်-သြၚ်လောန်တိုၚ်မ်

ဗီု-Twitter