အေဿလာမာဗာတ်၊ အံက်တဝ်ဗာ (၅)
ပ္ဍဲကဵုပရေၚ်ဖံက်ခတိုဟ်ဗမ်ဒုၚ်ချိုတ် အပ္ဍဲဍုၚ် (၂၄) ဝါဂှ် (၁၄) ဝါဂှ် ဟိုတ်နူဂကူအာဖဂါန်တံ ကၠောန်လဝ်ဂှ်ရ ကောန်ဍုၚ်အာဖဂါန် ဗ္ဒါဲ (၂) ပြကောဋိကိုဋ် ကေုာံ ညးဆုဲပြံၚ်မံၚ်တန်တဴဟွံလုပ်သၞောဝ်သီုဖအိုတ် သွက်ဂွံတိတ်အာ နူကဵုအပ္ဍဲဍုၚ်ဂှ် အလဵုအသဳပါကေဿတာန် လလောၚ်ပ္တိတ်လဝ်စၞောန်ပၟိၚ် ပ္ဍဲဂိတုအံက်တဝ်ဗာ (၃) တေံရ။
သၟိၚ်တၠအဝဵုပါကေဿတာန်တံဝွံ ကောန်ဍုၚ်အာဖဂါန်နေဿတာန် ဗ္ဒါဲ ၂ ပြကောဋိကိုဋ်ဂှ်ကဵု ညးဆုဲပြံၚ်မံၚ်တန်တဴ ဟွံလုပ်သၞောဝ်တံ ဂွံတိတ်စ္ဍးအာဂှ် ကၠောန်သာ်လဵုရောဟီုဂှ် ဟွံဂွံတီကေတ် ချိုတ်တ်ပၠိုတ်တ်ဏီရ။
“ ဂိတုနဝ်ဝေမ်ဗာ ၁ စွံလက္ကရဴအိုတ်တုဲ သွက်ဂွံတိတ်စ္ဍးအိုတ်ဂှ် စၟတ်လဝ်ကဵု ညးတံရ” သာ်ဝွံ ဝန်ဇၞော်ကာအပ္ဍဲဍုၚ်ပါကေဿတာန် ဟီုဂးလဝ်တုဲ မၞိဟ်ဆုဲပြံၚ်မံၚ်တန်တဴသီုဖအိုတ်ဂှ်ဝွံ နဆန္ဒဇကုဇကု တိတ်စ္ဍးထေက်တုဲ ဟွံသေၚ်မ္ဂး ကြဴနူတ္ၚဲဂှ်တုဲမ္ဂး ဒးဆေၚ်အာမုက် ကုပွမထဍေၚ်ပ္တိတ် အတေၚ်အဓမ္မတံဏောၚ်ဂှ် ဟီုဂးလဝ်ရ။
ညးဒဒိုက်အာဖဂါန် ကၠုၚ်စိုပ်စ္ၜုဲစ္ၜော်ဒၟံၚ် ပ္ဍဲဍုၚ်ပါကေဿတာန်ဂှ် (၄ ဒဿမ ၄) ပြကောဋိကိုဋ်နွံတုဲ ပ္ဍဲကဵုဏံ (၁ ဒဿမ ၇) ပြကောဋိကိုဋ်ပြၚ်ဝွံ သွက်ဂွံမံၚ်စံၚ်ဗွဲမလုပ်သၞောဝ် လိက်တၞးဟွံမွဲပုဟ်ဂှ် ဝန်ဇၞော်ဂှ် ဟီုဂးလဝ်ရ။
ပ္ဍဲသၞာံ ၁၉၇၉ ကြဴနူသဵုဗဳယေတ် သၠိုၚ်လုပ်ၜက်ၜေတ် ဍုၚ်ဇၞော်အာဖဂါန်နေဿတာန် ဍုၚ်ကပူ(လ်) တုဲဂှ် ပါကေဿတာန်ဝွံ ဒုၚ်လဝ်တဲ ညးဒဒိုက်အာဖဂါန်ဂၠိုၚ်အိုတ်ရ။
ပ္ဍဲကဵုသၞာံဏံ ဗွဲကြဴဏံ အလဵုအသဳပါကေဿတာန် ရုပ်သီထောံ ပရေၚ်ဒေါအ်ပန်ပှော် ကုဂကောံမၞုံပၟိက်ပၞာန် သောန်နဳ အေဿလာမ်မေတ်ကဵု ဂကောံမၞုံပၟိက်ကုပၞာန် တာလဳဗာန်အပ္ဍဲဒေသ မၞိဟ်တီဂၠိုၚ် နဒဒှ် TTP ဂှ်တုဲဂှ် ပွပကီုပရာပ်တံ သၠုၚ်တိုန်ကၠုၚ်လဝ် တၟေၚ်ၚ်တၟဟ်ဟ်ရ။
ပ္ဍဲသတ္တာဟတုဲကၠုၚ်တေံ ပ္ဍဲပါကေဿတာန် ပရေၚ်ဖံက်ခတိုဟ်ဗမ်ဒုၚ်ချိုတ် စွံပွန်ကဵု ပေါဲသ္ဘၚ်ပရေၚ်ဘာသာတံဂှ် က္တဵုဒှ်လဝ် (၂) ဝါတုဲ တဲဍိုန် မၞိဟ် (၅၇) တၠ ချိုတ်အာလဝ်ရ။
ပရေၚ်ဖံက်ခတိုဟ်ဗမ် ဒုၚ်ချိုတ်ဏံဂှ် TTP ကယျာန်ပါဲလဝ်ကီုလေဝ် ညးဖံက်ခတိုဟ်ဗမ်ဒုၚ်ချိုတ်ဂှ်ဝွံ အလဵုအသဳပါကေဿတာန် စၟတ်လဝ် နဒဒှ်ကောန်ဍုၚ်အာဖဂါန်ရ။
Ref: Reuters
sanlontai