အ္စာအ္စာၝောံ ဓမံက်ဒၟံၚ်ရုပ်ရဴကဏ္ဍပရေၚ်ပညာ နွံဒၟံၚ်မွဲကိုတ်ပြၚ် NUG ဟီု

လဂုၚ်၊ အံက်တဝ်ဗာ (၆)

ပ္ဍဲပရေၚ်ပညာသ္ဇိုၚ် ကဏ္ဍပရေၚ်ပညာ အလဵုအသဳညဳသၟဟ်ကောန်ဂကူ (NUG) ဓမံက်ဒၟံၚ်ရုပ်ရဴဂှ် အ္စာ အ္စာၝောံ CDM ယိုက်ဂၠေၚ်ဒၟံၚ်တာလျိုၚ် မွဲကိုတ်ပြၚ်နွံရဂှ် သ္ကိုပ်ဝန်ဇၞော်ကၟိန်ဍုၚ် NUG မာန်ဝေန်ခိုၚ်တာန်ဟီုသ္ဂးလဝ်ရ။

ပ္ဍဲကဵုအခန်ကၞာတ္ၚဲအ္စာဂၠးကဝ် ကၠုၚ်စိုပ်လဝ် ပ္ဍဲဂိတုအံက်တဝ်ဗာ စၟတ်တ္ၚဲ (၅)ဂှ် စပ်ကဵုအကာဲအရာရေၚ်တၠုၚ် ဓမံက်ဒၟံၚ်ရုပ်ရဴ ကဏ္ဍပရေၚ်ပညာ အလဵုအသဳ NUG တုဲ သ္ကိုပ်ဝန်ဇၞော် ဟီုသ္ဂးလဝ်ရ။

အလဵုအသဳ NUG ဂှ် ပ္ဍဲမွဲကာလဒပ်ပၞာန်သီအဝဵုဏံ ပ္ဍဲကဵုကဏ္ဍပရေၚ်ပညာသ္ဇိုၚ်ဂှ် ဘာအောန်လာၚ် ၇၀ ဘာပြၚ်ကေုာံ ဘာကတ်ဗ္တောန် ပ္ဍဲဗလးမုက်တိ ၅၀၀၀ ဘာပြၚ် ပံက်မာန်လဝ်ရ။

သ္ကိုပ်ဝန်ဇၞော်မာန်ဝေန်ခိုၚ်တာန်ဂှ် ပ္ဍဲကဵုကဏ္ဍပရေၚ်ပညာသ္ဇိုၚ် ဓမံက်ဒၟံၚ်ရုပ်ရဴ မူဝါဒပရေၚ်ပညာ ဌာနဝန်ဇၞော်ပရေၚ်ပညာဂှ် အ္စာ၊ အ္စာၝောံ CDM မွဲကိုတ်ပြၚ် နွံတုဲ သွက်ဂွံထပ်ခါန်ကၞက်အာ အ္စာ၊ အ္စာၝောံ ညးယိုက်ဝန်စေတနာတအ် စဳဇန်လဝ်ရဂှ် ဟီုလဝ်ရ။

ပ္ဍဲအရာဓမံက်ရုပ်ရဴကဏ္ဍပရေၚ်ပညာသ္ဇိုၚ်ဂှ် သွက်လၟေၚ်ကမၠောန်ဆေၚ်စပ်ကဵုစၟဳစၟတ် ဒဒှ်ရပညာသ္ဇိုၚ် (BECA) အာစိုပ်ဒတုဲဂှ် စရိတ်နဲကဲကွတ်ပညာအိုတ် သြန်ဗၟာ (၁၇၆) ပြကောဋိကိုတ်ပြၚ်ဂှ် နူလ္ပာ်ဌာနဝန်ဇၞော် ဒုၚ်အိုတ်သုၚ်စောဲလဝ်ရဂှ် ဟီုလဝ်ရ။

ပ္ဍဲကဵုကဏ္ဍပညာက္ဆံၚ်သၠုၚ်ဂှ်လေဝ် ဒက်ပ္တန်ကံၚ်ဇြဳတက္ကသိုလ်ကာလအကြာတုဲ ညံၚ်ကမၠောန်ကတ်ဗ္တောန်ဟွံဂွံသ္ကုတ်ပိုတ်အာဂှ် ဆက်ကၠောန်ရေၚ်တၠုၚ်လဝ်နွံတုဲ နူလ္ပာ်ဂကောံဗုက်ဆေၚ်ရာကဵုဘာသာတအ်လေဝ် ကၠောန်သ္ပကဵုဒၟံၚ် ပရေၚ်ဗ္တောန်ဖျောန် ကေုာံပရေၚ်ကောပ်ကာဲပလေဝ်ပလေတ် ဇုတ်ဓရံၚ်ဗ္တောန်တအ်ဖိုဟ်ရဂှ် ဟီုလဝ်ရ။

ပ္ဍဲမွဲကာလဒပ်ပၞာန်သီအဝဵုဏံ ဂကောံပၞာန်ဂှ် ဟွံပါ်ပါဲတၚ်ပ္တဝ်မုက် သွာၚ်ပၞာန် သွာၚ်ညးအရာပ်တုဲ သီုရန်တၟံနွံနွံ ဂြာတ်ထောံဖျေံဗုမ် ပ္ဍဲဘာဗ္တောန်လိက်တအ် ကဵုက္ၜၚ်ကျာကီု၊ စံၚ်ပလီုဒၟံၚ်ကီု၊ ရပ်စပ်ကေတ်ဒၟံၚ်အရေဝ် ကုအ္စာ အ္စာၝောံတအ်ကီု၊ က္လိလောန်ဒၟံၚ် ကမၠောန်ပြဝ မပ္တံပျဲပျာံဍဵုဍိုက်၊ ပြိုက်ဂစိုတ်ဒၟံၚ် ဓဇန်ဓဇန်ကြာန်ကြာန်ရဂှ် သမ္မတာယာယဳ NUG ဒူဝါလယှဳလလေဝ် ဟီုလဝ် ပ္ဍဲအခန်ကၞာ တ္ၚဲအ္စာဂၠးကဝ်ရ။

အတိုၚ်တၚ်လလောၚ်တြး ဂကောံမၚ်ရံၚ်စံၚ်ခါတ်အကာဲပရေၚ်ပညာ ကၟိန်ဍုၚ်နာနာ (GCPEA) လလောၚ်တြးလဝ်မ္ဂး ပ္ဍဲသၞာံ ၂၀၂၂ ဂှ် ကဏ္ဍပရေၚ်ပညာ ဒးဒုၚ်ဗတိုက်ဒၟံၚ် နွံကဆံၚ်လ္တူအိုတ် ပ္ဍဲကဵု (၃) ကၟိန်ဍုၚ် ကၟိန်ဍုၚ်ဗၟာပါလုပ်ကၠုၚ်ရဂှ် လလောၚ်တြးလဝ် လိက်စံၚ် ပ္ဍဲဂိတုသေပ်တေမ်ဗာ စၟတ်တ္ၚဲ (၉)တေံရ။

ပရိုၚ် – သြၚ်လောန်တိုၚ်(မ်)

ဗီု – BNI