ပ္ဍဲမဂွေ ရေၚ်ယာဉ်ကံၚ်ဇြဳပၞာန် ကွဳစက် (၇၃) ဖ္ဍိုက်ပါ ဒးဒုၚ်ဖံက်ခတိုဟ်လဝ်မာၚ်၊ ပရေၚ်ဇီုကပိုက်ချိုတ်ဂျိုၚ် နွံဂၠိုၚ်မာန်

ပခုက္ကူ၊ အံက်တဝ်ဗာ (၆)

ရးဒေသဇၞော်မဂွေ၊ ပွိုၚ်ဍုၚ်ပေါက်၊ ဗ္ဒာဲကွာန်ယာဂျဳပျေန်ဂှ် ပ္ဍဲဂိတုအံက်တဝ်ဗာ စၟတ်တ္ၚဲ (၃)ဂှ် ရေၚ်ယာဉ်ကံၚ်ဇြဳပၞာန် ကွဳစက်ပါလုပ် (၇၃)ဖ္ဍိုက်ဂှ် ဟိုတ်နူဒးဒုၚ်ဖံက်ခတိုဟ်လဝ်မာၚ်တုဲ ပရေၚ်ဇီုကပိုက် ဒးချိုတ်လဝ် နွံဂၠိုၚ်မာန်ရဂှ် ဂွံတီကေတ်နူဇရေၚ် ဒပ်ပံၚ်ကောံ ဒပ်စဵုဒၞာဒေသတအ်ရ။

ရေၚ်ယာဉ်ကံၚ်ဇြဳပၞာန် ဇက်တိုန်ကၠုၚ် နူကဵုၝောံဒပ်ကံၚ်ဇြဳပၞာန် (၁၀၁) ဖျေံသ္ဇိုၚ်ပခုက္ကူ သီုဇွောံမပေၚ်ပေၚ်ဂှ် ဒပ်ပံၚ်ကောံ ဂကောံဇြဟတ်ပၠန်ဂတးတအ် ဖံက်ခတိုဟ်လဝ်မာၚ် ပ္ဍဲဒၞာဲဗ္စပ်ကွာန်ယာပျေန်ဂျဳရ။

“ဗတိုက်လဝ် ကောန်ဒပ်စကစ တိုန်ကၠုၚ်ဒၟံၚ်နူကဵုကွာန်ယာပျေန်ဂျဳရ ဂတပွေက်ရေၚ်ယာဉ်ဂှ် ပ္ဍဲတၞုၚ်ဒဒန်အုမ်တတာ လ္ပာ်ပလိုတ်ရ။ လ္ပာ်ဒပ်ကံၚ်ဇြဳပၞာန် ဒးချိုတ်လဝ်ဒၞာဲဂှ် (၃) တၠရ” ဂှ် ညးတာလျိုၚ်ပကဖမျာၚ် မွဲတၠဂှ် ဟီုကဵုဌာန်ပရိုၚ်သြၚ်လောန်တိုၚ်(မ်)ရ။

ဟိုတ်နူဒးဒုၚ်ဖံက်ခတိုဟ်လဝ်မာၚ်တုဲ ညးနွံကဆံၚ်ဗိုလ် နူၝောံဒပ်ကံၚ်ဇြဳပၞာန် (၇၄)မွဲတၠ သီုကောန်ဒပ် ၝောံဒပ် (၁၀၁) ၂ တၠ ဒးချိုတ်လဝ် ပ္ဍဲဒၞာဲဂှ်တုဲ ဇီုက်ပိုက်ဒးလဝ်ဘဲဝပ် ဟွံအောန်နူ (၅)တၠ နွံရဂှ် ဂွံတီကေတ်ရ။

ရေၚ်ယာဉ်ကွဳစက်ကံၚ်ဇြဳပၞာန် ဒးဒုၚ်ဖံက်ခတိုဟ်လဝ်မာၚ် ဟိုတ်နူဆက်တိုန်ဂတဟွံမာန်တုဲ ဃောလုပ်စံၚ်ကွာန်ဒၟံၚ်ဂှ် ဟိုတ်နူမာၚ်ပဒေသာပါ်ခတိုဟ်တုဲ ကောန်ဒပ်ကံၚ်ဇြဳပၞာန်မွဲတၠ ဒးထပ်ချိုတ်လဝ်ရ။

အတိုၚ်ညးဒေသတအ်ဟီုလဝ်မ္ဂး ပ္ဍဲကဵုရေၚ်ယာဉ်ကွဳစက်ပါလုပ် (၇၃) ဖ္ဍိုက်ဂှ် ကွဳစက်ၜိုတ် (၄၀) ဖ္ဍိုက်ဂှ် ဒှ်ကွဳစက်ဖဝ် ညးဍုၚ်ကွာန်တအ်ပိုၚ် ဒပ်ကံၚ်ဇြဳပၞာန် တံၚ်ဓဇက်ကေတ်နၚ်လဝ် နဒဒှ်ပဝ်တာရဂှ် ဂွံတီကေတ်ရ။

ရေၚ်ယာဉ်ကံၚ်ဇြဳပၞာန် ကွဳစက်ပါလုပ် (၇၃) ဖ္ဍိုက်ဏံ ဟိုတ်နူဒပ်စဵုဒၞာ ပ္ဍဲပွိုၚ်ဍုၚ်ဂဂဝ်တအ် သ္ကုတ်ဗပိုတ်လဝ် ဇွောံမပျူသဝ်ထဳ သၟဝ်တဲကံၚ်ဇြဳပၞာန် ကေုာံဒပ်ကံၚ်ဇြဳပၞာန်လ္ၚဵုဂှ် ဟိုတ်နူလအ်ကၠုၚ်ပွိုၚ်တြဴဂိတုပြၚ်ဂှ်ရ ဒးထေၚ်ခယျကေတ် ရေၚ်ယာဉ်ကွဳစက် ပလံၚ်ဇွောံမ ပ္ဍဲဒၞာဲဏံရ။

ရေၚ်ယာဉ်ကွဳစက်ကံၚ်ဇြဳပၞာန်ဂှ် ဒပ်စဵုဒၞာညးဍုၚ်ကွာန် (ပကဖ) ပွိုၚ်ဍုၚ်မျာၚ် တံဒပ် ၃ ကဵု ဒပ်ဗိုတေတ်ဇြေတအ် ပံၚ်တောဲဗတိုက်လဝ်ရ။

ဟိုတ်နူရေၚ်ယာဉ်ကွဳစက်ကံၚ်ဇြဳပၞာန် ဇက်တိုန်ကၠုၚ်တုဲ ကွာန်မၞုံသ္ကုတ်ဂၠံၚ် ပခုက္ကူ – ပေါက် ဟွံအောန်နူ (၁၈) ကွာန် ဒးဂြိပ်ဒဴပါဲဓလေတ်ဒၟံၚ်တုဲ စဵုကဵုအခိၚ်လၟုဟ် ဟွံဂံၚ်ကလေၚ်စဴ ဌာန်ဒၟံၚ်ဏီရ။

သ္ပတံနူဂိတုသေပ်တေမ်ဗာ စၟတ်တ္ၚဲ (၃၀)တေံတုဲ ညံၚ်ဟွံဂွံသုၚ်စောဲ ဂၠံၚ်သ္ကုတ်ပခုက္ကူ – ပေါက် ကဵု ဖာသီ – မုမ်ယွာ ရေၚ်ယာဉ်ကွဳစက်ကံၚ်ဇြဳပၞာန် ဇက်တိုန်ကၠုၚ်ဒၟံၚ်ဂှ် ဒပ်စဵုဒၞာဒေသတအ် ဗတိုက်ဖ္အောဝ်လဝ်ရ။

ပရိုၚ် – သြၚ်လောန်တိုၚ်(မ်)

ဗီု – Pauk Newsletter page