မတ်မလီု – အက်တဝ်ဗာ (၆)
ကံၚ်ဇြဳပၞာန်သီအဝဵုဂှ် အစောန်စရာဲဍာ်ဒ္ကေဝ်အုပ်ဓုပ်ကၟိန်ဍုၚ်ဟၟဲတုဲ ပရေၚ်ပိုန်ဒြပ်ဂှ်လေဝ် စဳမာန်ဖန်ဇန်ဟွံမာန်ရဂှ် အမာတ် ကလုတ်ဇၞော် ဥူကျဝ်မိုဝ်ထောန်ဟီုလဝ်ရ။
ဟီုလဝ် ပ္ဍဲကဵုဂလာန်လၟိၚ် ကေၚ်ကာမူဝါဒနာနာ (General Debate) ကဝ်မတဳဒုတိယ (ပရေၚ်ပိုန်ဒြပ်ကေုာံပရေၚ်ဘဏ္ဍာ)၊ ကောံဓရီုသဳကၠဳကုလသမဂ္ဂ မရနုက်ကဵု (၇၈) ဝါ ကၠောန်ဗဒှ်လဝ် ဂိတုအံက်တဝ်ဗာ နူစၟတ်တ္ၚဲ (၂) စဵုကဵုစၟတ်တ္ၚဲ (၄) ဂှ်ရ။
“တၠအဝဵုပၞာန်တအ်ဂှ် အုပ်ဓုပ်ကၟိန်ဍုၚ်မာန် (ဟွံ) စဳမာန်ဖန်ဇန် ပရေၚ်ပိုန်ဒြပ်မာန်ဟၟဲတုဲ ဍေံတအ်ဂှ် ဍာ်ဒ္ကေဝ်ဂွံကဵု ပရေၚ်ၜိုဟ်လလံကဵု ပရေၚ်ညိၚ်ဝတ် တန်တဴဍာ်ဇမၠိၚ်မာန် ဟၟဲရ”ဂှ် ဥူကျဝ်မိုဝ်ထောန်ဟီုလဝ်ရ။
သ္အာၚ်နူဂှ်ပၠန် ပရေၚ်မံၚ်စံၚ်ဘဝညးဍုၚ်ကွာန် ပ္ဍဲကၟိန်ဍုၚ်ဗၟာ ဂၠိုၚ်ကဵုပြကောဋိကိုတ်တအ်ဂှ် စိုပ်ဒၟံၚ်အကာဲအရာ ဒးဒှ်ဓဝိၚ်တုဲ ဟိုတ်နူဒပ်ပၞာန်ဓဇန်ကြာန်တုဲ အပံၚ်လၟိဟ်မၞိဟ် ဗ္ဒာဲၜါပြကောဋိကိုတ် ဒးဂြိပ်ဒဴပါဲဓလေတ်ဒၟံၚ် နူဌာန်ဒၟံၚ် ပ္ဍဲဍုၚ်တုဲ အပံၚ်မၞိဟ် (၁၈)ပြကောဋိကိုတ်ပြၚ်ဂှ် နွံဒၟံၚ်ပၟိက် အရီုဗၚ်ဗ္စာရဏာပရေၚ်မၞိဟ်ရဂှ် ညးဟီုလဝ်ဏီရ။
ဟိုတ်နူပရေၚ်ဒပ်ပၞာန် စဳမာန်ဖန်ဇန် ဍာ်ဒ္ကေဝ်ဟၟဲတုဲ ပရေၚ်ပိုန်ဒြပ်ကၟိန်ဍုၚ်ဗၟာ ဟွံညိၚ်ဝတ်တုဲ စိုပ်ဒၟံၚ်အကာဲအရာ ချိၚ်ခယျကေတ်ဟွံမာန်တုဲ ဗ္ၜတ်သြန်ဖောဝ် ဂၠိုၚ်တိုန်ဒၟံၚ်ကီု၊ ၚုဟ်ဗၞိက်ဗွဝ်ဖျာ တိုန်အာမွဲလစုတ်ဓဝ်ကီု၊ ပၟတ်ဓာတ်လလဳ ပိုတ်သ္ကုတ်ဒၟံၚ် မွဲခနမွဲခနကီု၊ ဇွောံမစၞစ ဝါတ်ဂါတ်ကၠုၚ်ကီု၊ အခက်ခုဲဒးဒုၚ်ပလီုပလာ်လဝ် ရုၚ်ဂဥုဲ ဗ္ဒမ်ဂဥုဲ ကေုာံဘာဗ္တောန်လိက်တအ်ဂှ် ညးဍုၚ်ကွာန်တအ် ဒးဆေၚ်ဒၟံၚ်မုက်ရဂှ် ဂွံတီကေတ်ရ။
ဟိုတ်နူကဵုအကာဲအရာဂမၠိုၚ်ဏံတုဲ နဲကဲသွက်ဂွံသောၚ်ကလး အကြေပ်ဂြတ်ကၟိန်ဍုၚ်ဗၟာ နွံမွဲနဲဟေၚ်ဂှ် ညံၚ်သၞောတ်တၠအဝဵုပၞာန် ဂွံပၠိုတ်အိုတ်အာတုဲ ညးက္လိလောန်လဝ်ဂှ် ညံၚ်ပရေၚ်ဒုၚ်လျိုၚ်ဂွံနွံကၠုၚ်ဂှ် ဟီုလဝ်ရ။
နကဵုအလဵုအသဳညဳသၟဟ်ကောန်ဂကူဂှ် သွက်ဂွံထံက်ပၚ်ကဵုအရီုဗၚ် အထံက်ရီုဗ္စာရဏာပရေၚ်မၞိဟ် နွံဒၟံၚ်ပၟိက်ဂှ် ပံၚ်တောဲရေၚ်တၠုၚ်ဒၟံၚ်ကဵု ဂကောံပၠန်ဂတးကောန်ဍုၚ်အရၚ်၊ ဂကောံမိတ်ပွံၚ်တၞဟ်တအ် ရမွဲစွံရဂှ် ဂွံတီကေတ်ရ။
ပရိုၚ် – သြၚ်လောန်တိုၚ်(မ်)
ဗီု – ရုၚ်ညးစၞးကုလသမဂ္ဂဒ္တန်ဆေၚ်ရာကဵုကၟိန်ဍုၚ်ဗၟာ
sanlontai