ပဠဝ်၊ အံက်တဝ်ဗာ (၆)
ဟိုတ်နူဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန် ပ္ဍဲကွာန်လ္ပာ်သ္ကုတ်ဗၟံက် ပွိုၚ်ဍုၚ်ပဠဝ်၊ ရးဒေသဇၞော်တၞၚ်သဳ မလလောၚ်တြးလဝ် ပရေၚ်အုပ်ဓုပ်ပၞာန်တံဂှ်တုဲ ညးဒေသ (၁၀၀၀) ပြၚ် ဒးဂြိပ်ဒဴပါဲဒလေတ်ဒၟံၚ်ရောၚ် ဂွံတီကေတ် အတိုၚ်ဂလာန် ညးဍုၚ်ကွာန်ပါဲဒဴဘဲပၞာန်တံရ။
ဒပ်ကံၚ်ဇြဳပၞာန် ဇြဟတ်ဒပ် ဗ္ဒါဲ (၂၀၀) ပါဂှ်ဝွံ စနူဂိတုအံက်တဝ်ဗာ (၄) တေံတုဲ ပါ်ကၠေံကရောၚ်ပၞာန် (၂) ကရောၚ်တုဲ နူကဵုကွာန်ဂျေန်ဂါ၊ မှဝ်မိဘက် ကေုာံ ကွာန်(မိကျောင်းသိုက်) တံဂှ် လုပ်စိုပ်ထ္ပက်ကၠုၚ်ကရောၚ်ပၞာန် ပ္ဍဲကဵုကွာန် သ္ကုတ်ဗၟံက် ပွိုၚ်ဍုၚ်ပဠဝ်တံဂှ်ရ။
ဒပ်ကံၚ်ဇြဳပၞာန်ဂှ် ပန်ပှော်လွဟ်ဇၞော်တုဲ ဟိုတ်နူလုပ်စိုပ်ကၠုၚ်ကရောၚ်ပၞာန်တံဂှ်ရ ညးဒေသ နူကဵုကွာန်နာန်ဒံၚ်၊ ဂျေန်ဂါ၊ မှဝ်မိ၊ ကျံၚ်နုက်၊ ပုၚ်နေဝ်ဒံၚ်၊ ဒူရေၚ်ပေန်ယှံၚ် ကေုာံ ပဠဝ်ကုန်၊ ကွာန် (မိကျောင်းသိုက်) ညးဒေသ နူကဵုကွာန်တံဏံဂမၠိုၚ်ဝွံ ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲတံရ။
အခိၚ်ကရောၚ်ပၞာန်ဒပ်ကံၚ်ဇြဳပၞာန် လုပ်စိုပ်ကၠုၚ်ဂှ် လ္ပာ်ကွာန်ဂျေန်ဂါဂှ် ဂွံမိၚ်ကေတ်ရမျာၚ်ဗ္တိုဟ်ထ္ကးတုဲ အကာဲအရာလၟေၚ်ဒဒှ် ဗွဲလစှ်ေ ဂှ် ဟွံဂွံတီကေတ်ဏီရ။
ကရောၚ်ပၞာန်ဏံဂှ်ဝွံ ပ္ဍဲဂိတုအံက်တဝ်ဗာ (၅) ဂှ် စိုပ်ကၠုၚ် ပ္ဍဲကဵုကွာန် ပဠဝ်ကုန် ကဵု ကွာန်နာန်ဒံၚ်တံဂှ်တုဲ ဖျေံဒပ်မံၚ်တန်တဴဒၟံၚ် အပ္ဍဲကွာန်ရောၚ်ဂှ် ကောန်ဂကောံဒပ်စဵုဒၞါဒေသတံ ဟီုဂးလဝ်ရ။
တုဲကၠုၚ် ပ္ဍဲဂိတုသေပ်တေမ်ဗာ (၂၈) ဂှ်လေဝ် ပ္ဍဲကဵုကွာန်နာန်ပယုတ်၊ ၆ မိုၚ် ကေုာံ ကွာန် (မျှဥ်ချဉ်စု) ပွိုၚ်ဍုၚ်ပဠဝ်တံဂှ် ကရောၚ်ပၞာန်ကံၚ်ဇြဳပၞာန်ကဵု ဒၞါဲဖျေံလဝ်ဒပ်ဂမၠိုၚ် ဒးဒုၚ်ဗ္တိုက်တုဲ လ္ပာ်ကံၚ်ဇြဳပၞာန် (၅) တၠ ချိုတ်အာလဝ်ဏီရ။
ပ္ဍဲရးတၞၚ်သဳဂှ် အပ္ဍဲဂိတုသေပ်တေမ်ဗာတုဲကၠုၚ်တေံ အကြာဒပ်ကံၚ်ဇြဳပၞာန်ကဵု ဂကောံဒပ်ပံၚ် ဂကောံဇြဟတ်ပၠန်ဂတးတံဂှ် ပေါဲဗ္တိုက်ၜါလ္ပာ် က္တဵုဒှ်လဝ် ဟွံအောန်နူကဵု (၅၀) ဝါရောၚ် ဂွံတီကေတ် အတိုၚ်တၚ်လလောၚ်တြး ဂကောံသုတေသန အပ္ဍဲဒေသတံရ။
ပရိုၚ်−သြၚ်လောန်တိုၚ်(မ်)
ဗီု−CJ (ဗီုတြေံ)
sanlontai