သၟာသေနာတ် ပရေၚ်ပန်ပှော် ပ္ဍဲၜၚ်ကံက်ဂှ် ပံက်လဝ်ဂဗုတ် (၅) ဂဗုတ် ပါလုပ်သီုကဵု ဂဗုတ်ဂစိုတ်မၞိဟ်

ၜၚ်ကံက်၊ အံက်တဝ်ဗာ (၆)

အပ္ဍဲပရေၚ်ပန်ပှော် သေန်တာရာန်ဖျာ သဳယာန်ပါရာဂေါန် ဍုၚ်ၜၚ်ကံက်၊ ဍုၚ်သေံ မၞိဟ်ၜါတၠချိုတ်အာ ကောန်ကလောန်ဆုဲပြံၚ်ဍုၚ်ဗၟာမွဲတၠ ပါလုပ်ဂှ် ပံက်လဝ်ဂဗုတ် ကုသၟာသေနာတ်ဂှ် (၅) ဂဗုတ် ပါလုပ်သီုကဵုဂဗုတ်ဂစိုတ်မၞိဟ်တံဂှ် ဂွံတီကေတ် ဇရေၚ်ဂကောံဒပ်ဗၠာဲသၟိၚ်တံရ။

ပံက်လဝ်ဂဗုတ် ကေတ်လဝ်ဒုဟ် ကုသၟတ်သၟာသေနာတ်ဂှ် နကဵုဂဗုတ်ဂစိုတ်မၞိဟ်၊ ပွမဒစးဒုၚ်တုဲ ချပ်လဝ်သွက်ဂွံဂစိုတ်မၞိဟ်ဂှ်ကီု၊ ပ္တိတ်ဇြဟတ် သွက်ဂွံဂစိုတ်မၞိဟ်ဂှ်ကီု၊ လာၚ်ဇြေန်ဟွံမွဲမွဲသာ် ရပ်သေနာတ်ဂှ်ကီု၊ ဖံက်ပန်သေနာတ် ပ္ဍဲကဵုဒၞါဲမဆေၚ်စပ်ကဵုညးဂမၠိုၚ်တံ မဒှ်ရ။

သၟာသေနာတ် အာယုက် (၁၄) သၞာံဂှ်ဝွံ ညးလဵုမွဲရောဟီုဂှ် ထ္မံက်ပ္တိတ်ဟီုဂးလဝ် ဟွံမွဲဏီတုဲ ကၠောန်သ္ပဂၠိုက်ဂၠါဲစၟဳတ်ဒၟံၚ် ညးတၠဒုဟ်သံသယဏံ ပ္ဍဲကဵုဗ္ဒိုပ်ထိၚ်ဒဝ်သၟတ်ဗဟဵုတံဂှ်တုဲ လ္ပာ်ဂကောံဒပ်ဗၠာဲသၟိၚ်တံလေဝ် သွက်ဂွံကဵုအခေါၚ် ဆက်ထိၚ်ဒဝ်လဝ်ဂှ် အာမိက်လဝ် ပ္ဍဲကဵုရုၚ်ဂဗုတ်ရ။

သၟာသေနာတ် တၠဒုဟ်သံသယ အယဲဟွံစိုပ်ဏီဂှ် ဖျေံလွဟ်တုဲဂှ် ညးတာလျိုၚ် သၞာဲဒဴပရေၚ်မၞိဟ်တံ၊ အ္စာဂဥုဲလွဳယဲစိုတ်တံ ကေုာံ ကောန်ဒပ်ဗၠာဲသၟိၚ်တံဂမၠိုၚ် ကၠောန်သ္ပသၟာန်သၟုက်လဝ် အခိၚ်ဗွဲမလအ်လဂှ် ဂွံတီကေတ်ရ။

ညးမၞုံအခေါၚ်ဟီုဂး ရုၚ်သၞောဝ်ဓဝ်ဂှ် နူကဵုဒပ်ဗၠာဲသၟိၚ် သွက်ဂွံစၟဳတ်သၟာန်သၟုက် ကုညးမၞုံသံသယ အယဲဟွံစိုပ်ဏီဏံ လ္ဂောံကဵုသၞောဝ်ဂှ်တုဲ ရပ်ထိၚ်လဝ် လလအ်ပွိုၚ် ၂၄ နာဍဳတုဲဂှ် သွက်ဂွံကလေၚ်သ္ၚဳဂၠိပ်ကဵု စပ်ကဵုဗီုပြၚ်မိမအုပ်ဓုပ်တံကဵု အကာဲအရာလွဳပရာ စပ်ကဵုစိုတ်တံဂှ်တုဲ သွက်ဂွံစွံ သၟဝ်မတ်သၞာဲဒဴ ပရေၚ်မၞိဟ်တံဂှ် နူကဵုရုၚ်ဂဗုတ် သ္ဂုတ်သွာတ်လဝ်ဂှ် ဂွံတီကေတ်ရ။

ပ္ဍဲကဵုသၞောဝ်ရာဇဝတ်သေံ ၝောံပိုဒ် ၇၄ ဂှ် စဵုကဵုအာယုက် ၁၅ သၞာံ မၞိဟ်အာယုက်ဟွံပေၚ်မွဲတၠ ယဝ်ရကလိလောန်ဒုဟ်မ္ဂး အခေါၚ်ဗၠးနူဒုဟ်ဒဏ်နွံတုဲ ကၠာဂွိုအ်ဗလးကဵုဂှ် ရုၚ်သၞောဝ်ဓဝ်ဂှ်ဝွံ ကုညးသၟတ်ကလိလောန်ဒုဟ်ဂှ် တၚ်ကဵုသတိ ဗွဲမလုပ်သၞောဝ်ဂမၠိုၚ်၊ အမိၚ်တံဂှ် လလောၚ်ပ္တိတ်မာန်တုဲ ကုမိမညးသၟတ်တံဏံဂှ် ပ္တိတ်တၚ်ကဵုသတိ သ္ကာတ်တ်မာန်ရောၚ် ဂွံတီကေတ်ရ။

အရာမယောၚ်ယာ ပ္ဍဲသၞောဝ်ဏံဂှ် နူကဵုရုၚ်သၞောဝ်ဓဝ်ဂှ် ပတှ်ေစှ်ေစိုတ် မိမညးမကလိလောန်ဒုဟ်ဒဏ်တံ ကလေၚ်ရံၚ်စံၚ်မာန်ဂှ်တုဲ အပ္ဍဲပွိုၚ် (၃) သၞာံဂတဏံ ဒဒှ်ရဟွံထပ်ကလိလောန်ဒုဟ်ဒဏ် ချိုတ်ပၠိုတ်မ္ဂး ကလေၚ်ဗလးကဵု တၠဒုဟ်ဂှ်ရောၚ် မဒှ်ရ။

အပ္ဍဲအကြာဏံ မိမတံဂှ် ကောန်ဇကု ညးမဒှ်တၠဒုဟ်တံ အာယုက်ဟွံစိုပ်ဏီဂှ် ကလိလောန်ဒၟံၚ်ဒုဟ်ဒဏ်ဏီမ္ဂး မွဲဝါမ္ဂး တပ်ဒဏ် စဵုကဵု ၁၀၀၀၀ ၝာတ်မာန်ရောၚ်ဂှ်လေဝ် ဂွံတီကေတ်ရ။

နကဵုအမိၚ်ရုၚ်သၞောဝ်ဓဝ်ဂှ် ပ္ဍဲကဵုသေန်တာမၚ်မွဲ ပရေၚ်ထတ်ယုက်မွဲမွဲ ဟွံသေၚ်မ္ဂး သေန်တာပ္ကတ်ပ္ကေၚ်၊ တက္ကသိုလ်ပရေၚ်ပညာတံဂှ် အပ္ဍဲအခိၚ်ကာလမစၟတ်လဝ်ဂှ် စွံအာ ညးမကလိလောန်ဒုဟ်ဒဏ်ဂှ်မာန်ကီုလေဝ် အခေါၚ်ဗၠးၜးဏံဂှ်ဝွံ စဵုကဵုအာယုက် (၁၈) သၞာံရဂှ် ဂွံတီကေတ်ရ။

Ref: Thai PBS