ဗိက်၊ အံက်တဝ်ဗာ (၇)
ရးဒေသဇၞော်တၞၚ်သဳ၊ ဍုၚ်ဗိက်၊ ပ္ဍဲကဵုဒဒန်သၞေဟ်က္ၜၚ် စၟတ် (၁) ဂှ် ပ္ဍဲဂိတုအံက်တဝ်ဗာ (၅) အခိၚ်ဗ္တံ (၁၂) နာဍဳ ဂကောံပျူသဝ်ထဳ ပန်ဂစိုတ်ဏာလဝ် ကောန်အရာပ်မၞိဟ်တြုံမၚ်ဒဒန်မွဲတၠ နကဵုမသက္ကုဟိုတ်ဂှ် ဂွံတီကေတ် နူကဵုညးဒေသတံရ။
ဂကောံပၞာန်ညးဍုၚ်ကွာန် (ဒေသကော်) ပျူသဝ်ထဳ ဥူထောန်န်သဵု ကေုာံ ဂကောံညးဝွံ သုၚ်စတုဲ အခိၚ်စိုပ်ကၠုၚ် ပ္ဍဲကဵုဒဒန်သၞေဟ်က္ၜၚ်ဂှ် ဟိုတ်ဟွံမွဲမွဲသာ် ပန်ဂစိုတ်ဏာလဝ် ( ဦးဝတုတ်) ညးမၚ်ကၚ်ဗ္တံ အာယုက် ၄၀ သၞာံဂှ်ရ။
ဟိုတ်နူဒးဒုၚ်ပန်ကဵု သေနာတ်ဂှ်ရ ( ဦးဝတုတ်) ဝွံ နကဵုဝပ်မကမ် ပ္ဍဲကဵုသြိုဟ် ကေုာံ ဗုၚ်ဂှ်တုဲ ချိုတ်အာလဝ် ပ္ဍဲကဵုဒၞါဲဒှ်ပရူဂှ်ဂှ် ညးဒေသတံ ဟီုဂးလဝ်ရ။
( ဦးဝတုတ်) မချိုတ်အာဂှ်ဝွံ ဒှ်ညးသၞနွံကဵု ညးတၞဟ်သ္အာၚ်ဟွံသေၚ်တုဲ ညးမဒှ်သမ္ဘာကဵု ကောန်ၚာ်အာယဲဟွံစိုပ် (၃) တၠ သှ်ေဒၟံၚ်ဂှ် ဂွံတီကေတ်ရ။
ဂကောံပျူသဝ်ထဳ ဥူထောန်န်သဵုတံ မပန်ဂစိုတ်ဏာလဝ် ( ဦးဝတုတ်) ဂှ် ပ္ဍဲဂိတုအံက်တဝ်ဗာ (၆) အခိၚ်နူဂယး ၜိုတ် (၄) နာဍဳဂှ် ကောန်ဂကောံဒပ်ကံၚ်ဇြဳပၞာန်တံ ကၠုၚ်စိုပ်ရပ်ဒက်ဏာလဝ် ပ္ဍဲအရာပ်တလိုၚ်သုဂှ်ရောၚ်ဂှ် ညးဒေသတံ ဟီုဂးဒၟံၚ်ကီုလေဝ် နကဵုသြၚ်လောန်တိုၚ်(မ်) သ္ပဒတန်တၞဟ်ခြာဟွံမာန်ဏီရ။
ဂကောံပျူသဝ်ထဳတံ ရပ်လွဟ်တုဲ လၟေၚ်ဒဒှ်ပန်ဂစိုတ် ညးဍုၚ်ကွာန်မွဲတၠ နကဵုမသက္ကုဟိုတ်ဂှ်ဝွံ ပ္ဍဲကဵုဍုၚ်ဗိက်ဂှ် ဒှ်အလန်ကိုပ်ကၠာအိုတ်တုဲ လၟေၚ်ဒဒှ်သာ်ဏံတံ ထပ်ဒှ်ပၠန်ဂှ် ညးဒေသတံ ဂွိၚ်ဒၟံၚ်အိုတ်ရ။
ပရိုၚ်−သြၚ်လောန်တိုၚ်(မ်)
ဗီု−CJ
sanlontai