မတ်မလီု၊ အံက်တဝ်ဗာ(၇)
ၚုဟ်ကၠေၚ်စက်ပ္ဍဲဍုၚ်ဂှ် ပ္ဍဲဂိတုအံက်တဝ်ဗာ သတ္တာဟပထမဂှ် မွဲလဳတာ စဵုကဵုပွဳူ ၂၀၀၀ ဒ္ကေဝ် ၚုဟ်ကလေၚ်စှ်ေကၠုၚ်ရဂှ် တၠကမၠောန်သွံရာန်ကၠေၚ်စက်တံ ဟီုကဵုဌာန်ပရိုၚ်သြၚ်လောန်တိုၚ်မ်ရ။ ၚုဟ်ကၠေၚ်စက်စှ်ေကၠုၚ်ဂှ် မွဲကရောံကဵု ၚုဟ်ကၠေၚ်ဍေန်ဂၠးတိစှ်ေကၠုၚ်တံဂှ် ဟိုတ်နူပ္ဍဲဗွဝ်ဖျာကၠေၚ်စက်သေၚ်္ကာပေါဝ် ဍုၚ်ဗၟာဗ္ကန်ကေတ် ပၠုပ်ပ္တိုန်မံၚ်အဓိကတံ စှ်ေမံၚ်အဆက်က်တံမဒှ်ရဂှ် ဂွံတီကေတ်ရ။
ၚုဟ်ကၠေၚ်စက်ဂှ် ကၠေၚ်ဓာတ် 92 မွဲလဳတာဂှ် နူကဵု (၂၃၀၀) ဒ္ကေဝ်ဂှ် စဵုကဵု (၁၉၉၀) ဒ္ကေဝ်၊ ကၠေၚ်ဓာတ် 95 မွဲလဳတာဂှ် နူကဵုဗ္ဒါဲ (၂၅၀၀) ဒ္ကေဝ်ဂှ် စဵုကဵု (၂၁၀၀) ဒ္ကေဝ် ၚုဟ်ကလေၚ်စှ်ေကၠုၚ် မဒှ်ရ။
သ္အာၚ်နူဂှ်ပၠန် ပရဳမဳယာမ်ဒဳဇြေဝ်ဂှ်လေဝ် နူပွဳူ (၂၇၀၀) ဒ္ကေဝ်ဂှ် စဵုကဵုဗ္ဒါဲ (၂၄၀၀) ဒ္ကေဝ်၊ ဒဳဇြေဝ်ဓမ္မတာဂှ် နူကဵု (၂၆၀၀) ဒ္ကေဝ်ပြၚ်ဂှ် စဵုကဵုဗ္ဒါဲ (၂၄၀၀) ဒ္ကေဝ် ၚုဟ်ကလေၚ်စှ်ေကၠုၚ်ရ။
ဟိုတ်နူၚုဟ်ကၠေၚ်စက် စှ်ေကၠုၚ်ဂှ်ရ ကမၠောန် ဒးရာန်ကေတ်လဝ် နကဵုၚုဟ်သၠုၚ်ၚ်တံ ဗွဲမဂၠိုၚ် ကျဗြံမံၚ်ရဂှ် တၠကမၠောန်သွံရာန်ကၠေၚ်စက်မွဲတၠဂှ် ဟီုရ။
“စှ်ေဟီုဂှ် ဗွဝ်ဖျာဂၠးတိစှ်ေဏောၚ်။ ကွာအာ ၜိုတ် (၁၀) ဒဝ်ဠာရ။ တၠကမၠောန်တှ်ေတုဲ ဒးဖအိုတ်ရ။ အလဵုအသဳဂှ်လေဝ် အတိုၚ်ၚုဟ်ဍေံတံစၟတ်လဝ်ရ ကဵုသွံတှ်ေ ၚုဟ်စှ်ေတှ်ေ ဒးသွံယှအ်ဖျေံၚုဟ်ရ။ အရာဏံဂှ် ကျကွေံကွေံရ။ ဆေၚ်ဇၞော်မ္ဂး ဗီုဇၞော် ဍောတ်မ္ဂးဗီုဍောတ် ကျရ။ ၜိုတ်နွံပၟိက်ဂှ် ဇၟာပ်မိက်ဂွံရာန်ဂှ် ရာန်ဟွံဂွံပုဟ်။ အတိုၚ်အရၚ် ဍေံတံဖျေံကဵုဂှ်ရ ဇကုဒးရာန်ရ။ သွံဟွံရုမ်လေဝ် ကလေၚ်ရာန်ဟွံဂွံရပုဟ်” သာ်ဝွံ သ္ဂးရ။
ပ္ဍဲအခိၚ်ၚုဟ်ကၠေၚ်စက်စှ်ေမံၚ်ဗီုလၟုဟ်ဂှ် ၜိုတ်နွံပၟိက် ယဝ်ရရာန်ဂွံမ္ဂး ပဲ္ဍဂိတုဂတတံဏံဂှ် ၜိုန်ရၚုဟ်ကၠေၚ်စက်ညိၚ်မာန်ကီုလေဝ် လ္ပာ်ကံၚ်ဇြဳပၞာန်ဂှ် ပွသွံကဵုၜိုတ်နွံပၟိက်တံ ဟွံမွဲဂှ်ရ လၟေၚ်ဒဒှ်တ္ၚဲ ၚုဟ်နှေန်တံ ပြံၚ်သၠာဲမံၚ်ဏီရဂှ် ညးဆက်ဟီုရ။
ၚုဟ်ကၠေၚ်စက်ဂှ် ဟိုတ်နူကံၚ်ဇြဳပၞာန် ထိၚ်ဒဝ်လဝ်အလုံဗွဝ်ဖျာမွဲဂှ်ရ ရာန်ကေတ်ဗွဲမသၠးပွးဗီုကၠာတေံ ဟွံဂွံရတုဲ ၚုဟ်နှေန်တံဂှ်လေဝ် အတိုၚ်ၚုဟ်နှေန်ဍေံတံစၟတ်လဝ်ဂှ်ရ ဒးသွံမံၚ်တုဲ ဒှ်မံၚ်အခက်အခုဲရဂှ် တၠကမၠောန်ကၠေၚ်စက်တံ သ္ဂးအိုတ်ရ။
ပ္ဍဲဍုၚ်ဗၟာဂှ်တှ်ေ ၚုဟ်ကၠေၚ်စက်ဂှ် ကိုပ်ကၠာနူဂွိုအ်သီအဝဵု ပ္ဍဲလက်ထက်အလဵုသဳ NLDဂှ် မွဲလဳတာ ၜိုန်ရၚုဟ်မၞုံဒၟံၚ် ပွဳူ (၆၀၀) ဒ္ကေဝ်ဓဝ်ကီုလေဝ် ကြဴနူဒပ်ပၞာန်သီအဝဵုတုဲ ၚုဟ်သၠုၚ်တိုန်ကၠုၚ် ဗ္ဒါဲ (၄) ဆတုဲ ၚုဟ်နှေန်ဟွံညိၚ်ဝတ်တံလေဝ် က္တဵုဒှ်မံၚ် မွဲဏှမွဲဏှရ။
ပရိုၚ်-သြၚ်လောန်တိုၚ်မ်
ဗီု- CJ
sanlontai