“ဍေံတအ်(စကစ) ထ္ပက်ကၠုၚ်ကရောၚ်ပၞာန်တှ်ေ ပတောံလဝ်အယောၚ်အလာ ဗီုပြၚ် PDF တုဲ ကဵုယူနဳဖောၚ်တအ် မုတအ် သ္ပလဝ်ဗီုပြၚ်ဓလေတ်လဝ်တုဲ ကၠုၚ်ဒၟံၚ်ဂှ်လေဝ် ဂွံညာတ်ကၠုၚ်ရ။ လ္ပာ်ဍေံတအ်ဂှ် တော်ရံၚ်ကဵုကၠာတေံတှ်ေ ပရေၚ်ချဳဒရာၚ်ပၞာန်ဂှ် ဒှ်ကၠုၚ် အပြံၚ်သၠာဲရ။ သာတုဲ သ္ပကၠုၚ် ဗီုပြၚ်ဒပ်ဒမၠုက်ဂှ် ဂွံညာတ်ကေတ်ရ” -ကိုဝ်သတာ ညးတာလျိုၚ်ဒပ်စဵုဒၞာညးဍုၚ်ကွာန်(ပကဖ) ပွိုၚ်ဍုၚ်တၞၚ်သြဳ

ပ္ဍဲကဵုရးတၞၚ်သြဳဂှ် သ္ပတံနူကဵု ဂိတုသေပ်တေမ်ဗာ သတ္တာဟလကြဴအိုတ် တုဲကၠုၚ်တေံတုဲ အကြာဒပ်ကံၚ်ဇြဳပၞာန်ကဵု ဒပ်စဵုဒၞာညးဍုၚ်ကွာန်တအ် ပေါဲဗတိုက်ဒှ်ကၠေတ်ကၠုၚ်ဒၟံၚ်တုဲ ပရေၚ်ဇီုကပိုက်ချိုတ်ဂျိုၚ် သီုၜါလ္ပာ်လေဝ် သာတုဲဂၠိုၚ်ကၠုၚ်ဒၟံၚ်ရ။

ပ္ဍဲကဵုပေါဲဗတိုက်တအ်ဂှ် ဗဒို PDF လ္ၚဵု ဒးဒုၚ်သီလဝ်လေဝ် နွံတုဲ ဒပ်ကံၚ်ဇြဳပၞာန်လေဝ် ပြံၚ်သၠာဲ ဗျူဟာပၞာန် ဗတိုက်ကၠုၚ် နွံကၠုၚ်လဝ်ရ။ ဟိုတ်ဂှ်ရ စပ်ကဵုအကာဲအရာပၞာန် ပ္ဍဲရးတၞၚ်သြဳကီု၊ ဗျူဟာဒပ်ကံၚ်ဇြဳပၞာန် ပြံၚ်သၠာဲကၠုၚ်ဒၟံၚ်ကီု၊ ဗဒိုပ်လ္ၚဵုဂှ် ဒးဒုၚ်သီကေတ်လဝ်ကီု သီုကဵုပ္ဍဲရာသဳတၟးဇး ကၠုၚ်စိုပ်ဂတးဏံ ပေါဲဗတိုက်ဒှ်ကၠုၚ်မာန်တအ်တုဲ ဆက်စၠောံသၟာန်လဝ်ကဵု ကိုဝ်သတာ ညးတာလျိုၚ်ဒပ်စဵုဒၞာညးဍုၚ်ကွာန် (ပကဖ) ရးတၞၚ်သြဳရ။

၁။ ကၠာအိုတ်ဏံ စပ်ကဵုအကာဲအရာပၞာန်ပ္ဍဲရးတၞၚ်သြဳကဵု ပရေၚ်ဗဒိုပ် PDF လ္ၚဵုဂှ် ဒးဒုၚ်သီလဝ်တအ်တုဲ ဟီုလဴဴထ္ၜးကဵုညိ။

ပ္ဍဲဂိတုဏံဂှ် လ္ပာ်ပိုဲဂှ်လေဝ် ဍာံဒၟံၚ်ရ။ ပရေၚ်ဇီုကပိုက် ဒးပြဟ်လလုဲလဝ် နွံဒၟံၚ်ရ။ အဓိကဂှ် ပ္ဍဲပေါဲဗတိုက်ဒှ်လဝ် ပ္ဍဲကွာန်မျတောၚ်ပလဝ်ဂှ် သ္ဂံၚ်လ္ပာ်ပိုဲ ဒးပြဟ်လလုဲလဝ် (၈) တၠ နွံရ။ ပ္ဍဲကဵုလ္ပာ်ခရိုၚ်ထဝါဲလေဝ် ဗဒိုပ် LOCAL PDF တအ်ဂှ် ဒၟာနူဒပ်ပၞာန် ပသောၚ်ဂြးတးတိဍာ်တုဲ ဒးဆုတ်တိတ်ကဵုလဝ် နွံရ။ ဒဵုကဵုအခိၚ်လၟုဟ်ဂှ်တှ်ေ ပ္ဍဲလ္ပာ်ခရိုၚ်ထဝါဲဂှ် ကရောၚ်ပၞာန်ထ္ပက်ဒၟံၚ် နွံရ။ ပ္ဍဲလ္ပာ်ပလဝ်လေဝ် ပလေဝ်ပလေတ်ဒၟံၚ်ပရေၚ်ပၞာန် နွံ။ ပ္ဍဲလ္ပာ်ပလဝ်ဂှ်လေဝ် ဒးပြဟ်လလုဲလဝ်နွံတုဲ လ္ပာ်ဍေံတအ်လေဝ် ဒးပြဟ်လလုဲလဝ် နွံဗွဲမဂၠိုၚ်ရ။ ဂွံလဝ်ပရိုၚ်ဗီုဏံရ။

၂။ သ္ကုတ်လကြဴဏံ ပရေၚ်ချဳဒရာၚ်ပၞာန် ဒပ်ပၞာန်သီအဝဵုဂှ် ပရေၚ်ပြံၚ်သၠာဲ ဗီုပြၚ်လဵုဂွံညာတ်ကေတ်ရော။

လ္ပာ်ဍေံတအ်ဂှ်တှ်ေ ဗီုပြၚ်ကၠောန်ချဳဒရာၚ်ပၞာန်ဂှ် အပြံၚ်သၠာဲ နွံကၠုၚ်ညိညရ။ ကၠာတေံတှ်ေ တံဒပ်သ္ဇိုၚ်တိဍာ်ဟွံသေၚ်တအ်ဂှ် ထ္ပက်ဒၟံၚ်ကရောၚ်ပၞာန် ဂၠိုၚ်ရ။ လၟုဟ်ဂှ် ထ္ပက်ကၠုၚ်ကရောၚ်ပၞာန် ကဵုဒပ်သ္ဇိုၚ်တိဍာ်တအ် သာတုဲဂၠိုၚ်ကၠုၚ်ရ။ ဍေံတအ်ထ္ပက်ကၠုၚ်ကရောၚ်ပၞာန်တှ်ေ ပတောံလဝ်အယောၚ်အလာဗီုပြၚ် PDF တုဲ ကဵုယူနဳဖောၚ်တအ် မုတအ်ဂှ် ကၠောန်သ္ပလဝ် ဗီုပြၚ်ဓလေတ်တုဲ ကၠုၚ်ဒၟံၚ်ဂှ်လေဝ် ဂွံညာတ်ကၠုၚ်ရ။ လ္ပာ်ဍေံတအ်ဂှ် တော်ကဵုအခိၚ်ကၠာတေံတှ်ေ ကၠောန်ပရေၚ်ချဳဒရာၚ်ပၞာန်ဂှ် ဒှ်ကၠုၚ်အပြံၚ်သၠာဲရ။ သာတုဲ ပ္တောံကၠုၚ်ဗီုပြၚ် ဒပ်ဒမၠုက်ဂှ် ဂွံဆဵုကေတ်ရ။

၃။ သ္ဂံၚ်PDF လ္ၚဵုဂွံဒးပြဟ်လလုဲကဵု ဗဒိုပ်လ္ၚဵုဂှ် ဂွံဒးဒုၚ်သီကေတ်လဝ် ဟိုတ်နူမု ညာတ်ကေတ်ရော။

ဗဒိုပ်တအ်ဂှ်တှ်ေ ဗွဲမဂၠိုၚ်ဂှ် တီကၠးဒၟံၚ်ဟီုစဂွံရ။ မိက်ဂွံဟီုဂှ်တှ်ေ ဗီုပြၚ်ဗဒိုပ်ဒမၠုက်ဟွံသေၚ်ပုဟ်။ ဍေံတအ်အုပ်ဓုပ်လဝ်၊ ထိၚ်ဒဝ်လဝ်ရ။ တိဍာ်ချဳဒရာၚ်ဒၟံၚ်တအ်ဂှ်ရ ဒုၚ်သ္ဇိုၚ်အဓိကတုဲ ဗဒိုပ်တအ်ဏံ နွံဒၟံၚ်ဖိုဟ်ရ။ ဣဏံဂှ်လေဝ် လ္ပာ်ဍေံတအ် ဂွံလဝ်ပရိုၚ်တုဲတုဲရ။ အရာဏံဂှ် ပ္တဝ်လဝ်က္ဍိုပ်အဓိကတုဲ ဒှ်ကၠုၚ်ဗီုပြၚ် ထ္ပက်ကၠုၚ်ကရောၚ်ပၞာန်ရ။ မိက်ဂွံဟီုဂှ်တှ်ေ ဗဒိုပ်ဒမၠုက်ပိုဲဂှ်ရ ဗီုပြၚ်ဒးဒုၚ်သီကေတ်လဝ် ဟွံသေၚ်ပုဟ်။ နူတမ်အာဒိတေံရ ပ္ဍဲဒေသဏံ ပရိုၚ် PDF တအ် ဖျေံလဝ်သ္ဇိုၚ်ဂှ် ဂွံလဝ် တုဲတုဲဒၟံၚ်ရ။ ပ္ဍဲလ္တူဏံ ဒၟာနူဍေံတအ် ထ္ပက်ကၠု်ကရောၚ်ပၞာန် ဍိုက်ကဵုဇြဟတ်တုဲ ဗဒိုပ်လ္ပာ်ပိုဲလ္ၚဵုဂှ် ဒးဗလးထောံလဝ်တဲ ဒှ်ဒၟံၚ်အကာဲအရာဏံရ။

၄။ သွက်ဂွံဓမံက်ရုပ်ရဴပေါဲဗတိုက် ကဵုဒပ်စဵုဒၞာညးဍုၚ်ကွာန်တအ်ဂှ် ညံၚ်ဂွံစိုပ်တရဴတှ်ေ မုနွံဒၟံၚ်ပၟိက်မုရော။

အဓိကဂှ် ပိုဲဒးချဳဒရာၚ်ပၞာန်ဏောၚ်။ ယဝ်ရချဳဒရာၚ်ပၞာန်ထ္ပက်ဏောၚ်တှ်ေ ဒးချူဓဇက်လဝ် မဟာဗျူဟာ၊ နဲကဲဗျူဟာ ဗီုပြၚ်စှ်ေစှ်ေဏောၚ်။ သွာၚ်ဏံဂှ်တှ်ေ ရေၚ်တၠုၚ်ဒၟံၚ်ယျ။ တုဲမွဲပၠန်ဂှ် ကိစ္စစဳမာန် ဂၠံၚ်ဍာန်ထံက်ပလံၚ် တံဒပ် ဒပ်ပၞာန်တအ်ဂှ်လေဝ် ချူဓဇက်သၞောတ်စှ်ေစှ်ေတုဲ ဒးကၠောန်ရေၚ်တၠုၚ်ဏောၚ်။ တအ်ဏံဂှ် ပရဟ်ဒုၚ်တုဲ ပလေဝ်ပလေဝ်လဝ်ဟၟဲတှ်ေ ဂွံကၠောန်ပရေၚ်ချဳဒရာၚ်ပၞာန် ဟွံလောဲပုဟ်။ တုဲပၠန်မွဲဂှ် တၚ်ဂၞၚ်ပရိုၚ်သၞရ။ တုဲတဴကဵုတၚ်ဂၞၚ်ပရိုၚ်တုဲ ဒးအာကဵုဗျူဟာလဵုရောဟီုဂှ် သွာၚ်ဏံနွံဒၟံၚ်ရ။ ဇြဟတ်သၞ၊ ဗီုပြၚ်ဍေံတအ်ထ္ပက်ကၠုၚ်ကရောၚ်ပၞာန်၊ ဒ္ဂေတ်စရိုတ်သၞတအ်ဂှ် တုဲတဴဴကဵုတၚ်ကဵု ပရိုၚ်ဂကောံထံၚ်ပရိုၚ်ဗလးတိတအ် ကဵုနၚ်တုဲ ပိုဲချူဓဇက်ပရေၚ်ချဳဒရာၚ်ပၞာန်ရ။

ဂွံဓမံက်ရုပ်ရဴတၚ်စဳမာန်ဏံ ချိုတ်တ်ပၠိုတ်တ်မာန်တှ်ေ ပရေၚ်ချဳဒရာၚ်ပၞာန် တံဒပ် ဒပ်မၞုံပ္ဍဲတိဍာ်မဆေၚ်စပ်တအ်၊ ပကဖတအ်ဂှ် ပၟိက်ဇၞော်ဒၟံၚ်။ ကၠောန်ရေၚ်တၠုၚ်အာ အတိုၚ်ဏံ သၞောတ်စှ်ေစှ်ေတုဲ ဒှ်အကာဲအရာ ဒးအာရ။ ပြဟ်ဟ်ဏံဂှ် ဗီုပြၚ်ချဳဒရာၚ် ပၞာန်ဗျူဟာစှ်ေစှ်ေဟွံသေၚ်တုဲ ဒှ်ဒၟံၚ်အကာဲအရာ နူလ္ပာ်သၞထ္ပက်လုပ်ကၠုၚ်ဂှ် ဒးကလေၚ်ပန်ပှော်ဒၟံၚ်ရ။ သွာၚ်မဟာဗျူဟာတအ်၊ သွာၚ်ထံက်ပလံၚ် နွံဒၟံၚ်ပၟိက် ဒးပလေဝ်ပလေတ်တအ်၊ သွာၚ်ပကောံပကေဝ်တၚ်ဂၞၚ်တအ် တအ်ဏံဂှ် ကၠောန်သၞောတ်စှ်ေစှ်ေတုဲမှ ဒးထ္ပက်ကရောၚ်ပၞာန်ဏောၚ်။

၅။ ပ္ဍဲကဵုရာသဳတၟးဇးကၠုၚ်စိုပ်ဂတဏံ အကာဲအရာပရေၚ်ပၞာန်ၜါလ္ပာ် မုဆက်ဒှ်ကၠုၚ်မာန်ရော။ နကဵုဒပ်စဵုဒၞာဒေသတအ် မုဒးပလေဝ်ပလေတ်လဝ်ထေက်ရာ။

ပိုဲဂှ်တှ်ေ အတိုၚ် ONE YEAR PLAN NUG ဂှ်ရ။ အတိုၚ်ဗျူဟာပလေဝ်ပလေတ်၊ ဗတိုက်၊ သီကေတ်ဂှ်ရ ဆက်အာဒၟံၚ်ရ။ ပ္ဍဲကဵုရာသဳတၟးဇး ကၠုၚ်စိုပ်ဂတဏံတှ်ေ ဒှ်ကာလထ္ပက်ပၞာန်ရ။ ပ္ဍဲကဵုကာလထ္ပက်ပၞာန်ဂှ်လေဝ် နူလ္ပာ်ဍေံတအ် ထ္ပက်လေဝ် ပြဿနာဟၟဲပုဟ်။ ယဝ်ရလ္ပာ်ဍေံတအ် ထ္ပက်ကၠုၚ်လေဝ် သွက်ဂွံထ္ပက်ကရောၚ်ပၞာန် အတိုၚ်ဗျူဟာပိုဲရနွံ။ ယဝ်ရလ္ပာ်ဍေံတအ် ဟွံထ္ပက်ကရောၚ်ပၞာန်လေဝ် လ္ပာ်ပိုဲဂှ် ဒးပလေဝ်ပလေတ်လဝ် ၜိုတ်ထေက်ကြိုက်နွံရ။

၆။ ဒပ်ကံၚ်ဇြဳပၞာန်ဂှ် သ္ကုတ်လကြဴဏံ သီုကဵုဒပ်ပၞာန်ဍာ်သုၚ်စောဲကၠုၚ်ဒၟံၚ်ဂှ် ဂွံညာတ်ကေတ်ရ။ ဟိုတ်နူမု ညာတ်ကေတ်ရော။

ဗစပ်ဗလးၜဳကဵု ၜိုတ်ဒေသက္ၜၚ်လုပ်မာန်တအ်ဓဝ်ရ အကာဲအရာနူကဵုဒပ်ပၞာန်ဍာ် သုၚ်စောဲလွဟ်လက်နကဇၞော်မာန်နွံရ။ အဓိကထ္ပက်ကရောၚ်ပၞာန်ဒပ်ပၞာန်ဍာ်ဂှ်တှ်ေ သွာၚ်ထံက်ပလံၚ်ဍေံတအ် သွာၚ်ကဵုပၞာန်ရီုဍေံတအ်ဂှ်တှ်ေ သုၚ်စောဲကၠုၚ်ဒပ်ဍာ်ဂၠိုၚ်ကၠုၚ်ရ။ ပ္ဍဲကဵုလ္တူဂၠံၚ်ဇၞော်ကၟိန်ဍုၚ်သှ်ေနူဂှ်တအ်ဂှ်တှ်ေ အကာဲအရာဂွံအာကၠုၚ်ဂၠိုၚ်ၚ်မာန်ဟၟဲပုဟ်။ ယဝ်ရဒးကဵုဂၠံၚ်ဍာ်တှ်ေ ၜိုတ်သွာၚ်ထံက်ပလံၚ်ရ အခက်ခုဲပိုဲနွံညိညရ။ နူကဵုအကာဲအရာကၠောန်ချဳဒရာၚ်ကၠုၚ်ပရေၚ်ပၞာန်နူကဵုဂၠံၚ်ဍာ်ဂှ် သွက်ဂွံဒးဂွိၚ်ဗွဲမဂၠိုၚ်ဟၟဲပုဟ်။

၇။ ပ္ဍဲကဵုဒပ်ပၠန်ဂတးတအ် တၚ်နွံပၟိက်လွဟ်လက်နက်ဂှ် ဒှ်ကၠုၚ်ပြဿနာဇၞော်ကၠုၚ်ဒၟံၚ်ဂှ် ဂွံတီကေတ်ရ။ သွက်ဂွံသောၚ်ကလးအာ လ္တူတၚ်ဏံ ဆက်စၠောံသဳကၠဳလဝ်ကဵု အလဵုအသဳ NUG နွံဟာ။

ပိုဲဂှ်တှ်ေ ကဵုဌာနဝန်ဇၞော်ပရေၚ်စဵုဒၞာဂှ် ပရေၚ်ဆက်စၠောံ နွံဒၟံၚ်လၟိုန်ရ။ မွဲသတ္တာဟတှ်ေ အောန်တိုၚ် ၜိုတ်မွဲအလန် ကၠောန်ဒၟံၚ်ကောံဓရီု နွံရ။ ဟိုတ်နူဒှ်ဒၟံၚ်ဗျူဟာ အာဒၟံၚ်အလုံကၟိန်ဍုၚ်မွဲတုဲ ဗက်ကဵုဒေသ ဒးကဵုဖျုန်စပ်ကဵုပရေၚ်ပၞာန်တုဲ သွာၚ်ညးတအ်ဒးဗပေၚ်ကဵုဒၟံၚ် နွံရ။ လ္ပာ်ပိုဲလေဝ် ပရေၚ်စန်ပကောံဒပ်ပိုဲဂှ်တှ်ေ ဗ္ဂပ်ဖျပ်ကဵုလွဟ်လက်နက် ပေၚ်ၚ်မာန် ဟွံသေၚ်ပုဟ်။ ဗီုဂှ်ကီုရ တံဒပ် ဒပ်ပၞာန်မၞုံ ပ္ဍဲရးဒေသကဵု တွဵုရးတၞဟ်တအ်ဂှ်လေဝ် ဗီုဂှ်ရ။ အရာနွံဒၟံၚ်ဂှ်လေဝ် ရပ်စပ်ခိုဟ်ဟ်တုဲ ကၠောန်အာပရေၚ်ချဳဒရာၚ်ပၞာန်ဏောၚ်။

အရာဇကုကၠောန်ပ္တိတ်မာန်လ္ၚဵုဂှ်တှ်ေ ကၠောန်ပ္တိတ်လွဟ်ဇၞော်မာန်ဂှ် နွံရ။ ကၠောန်ပ္တိတ်မာၚ်တအ်မာန် နွံ။ လွဟ်လက်နက် ကၠောန်ကဵုတဲတအ်လေဝ်၊ လွဟ်လက်နက်စိုပ်တရဴဴတအ် လ္ပာ်သ္ကုတ်လကြဴဏံ ကၠောန်ပ္တိတ်မာန် နွံရ။ လ္ပာ် MOD လေဝ် ထံက်ပၚ်ကဵုဒၟံၚ် အရာနွံပၟိက်တအ်တုဲ မွဲလ္ပာ်ဂှ်လေဝ် ပရေၚ်ကၠောန်ပ္တိတ်ဂှ် တံဒပ် ဒပ်ပၞာန်ပိုဲ ကၠောန်ရေၚ်ဒၟံၚ် နွံရ။

၈။ အလန်လကြဴဴအိုတ်ဏံ မုမိက်ဂွံထပ်ဟီုဗပေၚ်နွံရော။

အတိုၚ်တၚ်ရန်တၟံအလဵုအသဳညဳသၟဟ်ကောန်ဂကူရ။ တၚ်ရန်တၟံတိုၚ်ပ္ကဴပရေၚ်ဍုၚ်ကွာန် သီုဖအိုတ်ဂှ် ဟိုတ်နူဒးဓမံက်ရုပ်ရဴဂှ်ရ ဇၟာပ်ပ်ဒၞာဲသၞနွံဒၟံၚ်ဂှ် ပေါဲဗတိုက်ဒှ်မာန်ဒၟံၚ်ရ။ ဟိုတ်ဂှ်ရ နကဵုညးဍုၚ်ကွာန်တအ်ဂှ် ညံၚ်သတိပရေၚ်ပၞာန်ဂွံနွံ။ ပိုဲတအ်ဂှ် မံၚ်ဒၟံၚ်စုက်က်လုက်လုက်ကဵု ကံၚ်ဇြဳပၞာန်ဟီုတှ်ေ အန္တရာယ်သွက်ဇကု နွံဒၟံၚ်ဏောၚ်။ ပ္ဍဲကဵုဒၞာဲလ္ၚဵုဂှ်တှ်ေ ဗက်ကဵုဒေသဍေံတုဲ စေဝ်ပၞောန် ပိုၚ်ခြာလဝ် နွံဒၟံၚ်ရ။ တိတ်ဗ္တံဟွံဂွံပုဟ်။ အာကၠုၚ်ကဵုကွဳစက်တှ်ေ ဒးဖျေံလဝ်ဒ္ၚောဝ်ဏောၚ်။ ဒၞာဲဟွံကဵုအာတရဴလေဝ် နွံရ။ တအ်ဏံလေဝ် ၜိုတ်သ္ပမာန် ဒးဝေၚ်ပါဲကဵုဏောၚ်။ သွက်ဂွံကၠေံစိုတ် လ္တူပရေၚ်ပၠန်ဂတးဂှ်လေဝ် ပၟိက်နွံဒၟံၚ်ရ။