ပွမဟွံကလၚ်အမိၚ် အပ္ဍဲဒပ်ကံၚ်ဇြဳပၞာန်တံ ဂၠိုၚ်တိုန်ကၠုၚ်

မတ်မလီု၊ အံက်တဝ်ဗာ (၇)

ဟိုတ်နူပၞာန်တဝ်စၞးညးဍုၚ်ကွာန်တံတုဲ ကရောံဇြဟတ်ဒပ်လေၚ်ဒိုက်ဂှ် အပ္ဍဲဒပ်ကံၚ်ဇြဳပၞာန် မစှ်ေကၠုၚ်ဒၟံၚ် သီုကဵုစိုတ်ဓာတ်ဂှ် ဟိုတ်နူဟွံမိက်တိတ်မုက်ပၞာန် ဗ္တိုက်ပၞာန်ဂှ်ရ အရာဟွံကလၚ်အမိၚ်တံ သၠုၚ်တိုန်ကၠုၚ်ဂှ် ဂွံတီကေတ် နူကဵုဗွိုၚ် CDM တံရ။

ဒပ်ကံၚ်ဇြဳပၞာန် မဒးပံက်လဝ်မုက်ပၞာန် ကြပ်အလုံဍုၚ်မွဲဂှ်ဝွံ ပ္ဍဲကဵုပေါဲဗ္တိုက်ဆေၚ်မုက် ကုဂကောံဇြဟတ်ပၠန်ဂတးတံဂှ် ဇၟာပ်ပ်ပေါဲဗ္တိုက် ဟိုတ်နူပြဟ်လလုဲဂၠိုၚ်ကၠုၚ်ဂှ်ရ ကောန်ဒပ်ကံၚ်ဇြဳပၞာန်ဗွဲမဂၠိုၚ် သွက်ဂွံတိတ်မုက်ပၞာန် ကယျာန်ပါဲကၠုၚ်အိုတ်ဂှ်ကဵု ဟွံကလၚ်အမိၚ်တံ နွံကၠုၚ်လဝ်ရ။

ဗိုလ်ဇၞော် CDM ထက်မျာတ်ဂှ် အပ္ဍဲကာလသီအဝဵုဏံ ကောန်ဒပ်ကံၚ်ဇြဳပၞာန်တံဝွံ မ္ၚးနူကဵုဟွံကလၚ်အမိၚ်တိုက်ရိုက်ဂှ် ညံၚ်ဂွိုအ်ဒးတိတ်မုက်ပၞာန် စဵုကဵုထ္ပက်ကၠုၚ်လာပ်ဗဇဴတံဂှ် ကၠောန်ၜိုတ်ဒၟံၚ် နဲကဲနာနာသာ်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“ ၜိုန်တိုက်ရိုက်ဟွံသေၚ်ကီုလေဝ် နကဵုနဲကဲနာနာသာ်ဂှ် ဂ္စါန်ကၠုၚ် သွက်ဂွံဝေၚ်ပါဲအိုတ်ရ။ ညံၚ်ဂွိုအ်ဒးတိတ်ပၞာန်ဂှ် ဒးပ္တိတ်ဒၟံၚ်ဇြဟတ် ဗက်ကဵုလှုဲတံ၊ ညံၚ်ဂွိုအ်ဒးဗက် ပရေၚ်ပြုပြေၚ်ပၞာန်တံဂှ်တုဲ ဒးထ္ၜဒၟံၚ်မၞိဟ်ဇၞော်ဇၞော်တံ၊ တုဲပၠန် ကဵုပြံၚ်ဒပ်တံနွံရ။ ဒၞါဲဗလးဏာတံဂှ် ယဝ်ရပရေၚ်ပြုပြေၚ်ပၞာန်တံ သ္ကာတ်မြဟ်ဒၟံၚ်မ္ဂး စဵုကဵုဒပ် ကဵုပြံၚ်တံဂှ် ဟွံစိုပ်ရတုဲ ဂြိပ်ထောံ ပ္ဍဲဂၠံၚ်ဂှ်လေဝ် နွံ။ ဗီုပြၚ်တံဂှ် ဒှ်ကၠုၚ်နာနာသာ်ရ။ အဓိကဂှ်တှ်ေ ညံၚ်ဟွံဂွံကလၚ်အမိၚ်ဂှ် ဝေၚ်ပါဲဒၟံၚ် နကဵုနဲကဲနာနာသာ်ရ“ သာ်ဝွံ သ္ဂးရ။

အခိၚ်လၟုဟ် ဒပ်ကံၚ်ဇြဳပၞာန်ဝွံ ပ္ဍဲကဵုရးသက်ကိုၚ်၊ မဂွဵု ကေုာံ ရးတၞၚ်သဳ ပါလုပ်သီုကဵုတွဵုရးကချေၚ်၊ ကရေၚ်ဍာဲ၊ သေံ၊ ကရေၚ် ကေုာံ တွဵုရးချေၚ်တံဂှ် လၟေၚ်ဒဒှ်တ္ၚဲ ပေါဲဗ္တိုက် အကြာဒပ်ပံၚ်ကောံဂကောံဇြဟတ်ပၠန်ဂတးတံ သ္ကာတ်မြဟ်ဒၟံၚ်ရ။

ကောန်ဒပ်ကံၚ်ဇြဳပၞာန် မဒးဒုၚ်ဗလး ပ္ဍဲပေါဲဗ္တိုက်ဗလးတိတံဂှ်ဝွံ ဖျေံလွဟ်ဒုၚ်ကျ အပ္ဍဲပေါဲဗ္တိုက်တံဂှ်ကီု၊ ဂြိပ်တိတ်နူဒပ်ပၞာန်တံသၟးဟွံက လ္ၚဵုတံဂှ် ဟွံမိက်တိတ်မုက်ပၞာန်တုဲ လၟေၚ်ဒဒှ် ဒးဒုၚ်ကေတ်ဒုဟ်တံ ဂၠိုၚ်ကၠုၚ်လဝ်ရ။

အကြာပ်ဒပ်ဇၞော် ဇြေယျ မသ္ပလဝ် CDM နူကဵုဒပ်ကျာဂှ် အပ္ဍဲဂကောံပၞာန်တံဂှ် အလဵုက္ဍိုပ်သ္ကိုပ်ပၞာန်တံ ကၠောန်ဒၟံၚ်ပွဗၠေတ်တ်တံဂှ်ရ ကောန်ဒပ်သ္ဇိုၚ်တံဏံ ဟွံမိၚ်ကလၚ်အမိၚ်လေဝ် ဒှ်မာန်ဂှ် သ္ၚဳဂၠိပ်ဟီုဂးလဝ်ရ။

“လ္ဂောံကဵုအကာဲအရာဒပ်ပၞာန် လက္ကရဴအိုတ်ဏံဂှ်မ္ဂး ဇၟာပ်ပ်ကဆံၚ်ဂှ် ဓဝ်ပတှ်ေဟွံမွဲတံ ဒှ်ဒၟံၚ်ယျ။ ဟွံကလၚ်အမိၚ်တံဂှ် ပါ်အာက္ဍိုပ်တုဲ အရာမဒိဓဗတ်တံ နွံကၠုၚ်ဂှ် ဂွံဆဵုကေတ်ရ။ မုဒှ်ရောဟီုတှ်ေ ကၠာတေံ အခိၚ်ပေါဲဗ္တိုက်ဟွံဂၠိုၚ်ဗီုဏံဂှ် ချဳဒရာၚ်ဒၞါဲဏံမ္ဂး လီဠာန်တုဲ ပ္တိုန်လဝ်ဏောၚ်။ လၟုဟ်ဂှ်တှ်ေ အကာဲအရာဂှ် သာတုဲသ္ကာတ်မြဟ်ကၠုၚ်ရ။ အလဵုသ္ကိုပ်ဗိုလ်ဇၞော်တံဂှ် ကၠောန်ကၠုၚ်ဂွံတှ်ေတုဲဂှ်ရ ပ္ဍဲကဵုကောန်ပၞာန်သ္ဇိုၚ်တံဏံဂှ် ဟွံမိက်ကလၚ်အမိၚ်တံ ဒှ်ကၠုၚ်ရ “ သာ်ဝွံ ဟီုတဴရ။

သွက်ဂွံထိၚ်ဒက် ပြသၞာဂြိပ်တိတ်နူဒပ်ပၞာန်ဂၠိုၚ်ဂှ်ကဵု ဟွံကလၚ်အမိၚ်တံဂှ်တုဲ ဂကောံပၞာန်ဝွံ ကောန်ဒပ်ရေၚ်သ္ကအ် ကဵုမၚ်ရံၚ်ဂှ်ကီု၊ ပြဝလၟေၚ်တ္ၚဲတံဂှ် သွက်ဂွံပ္တိုန်ထ္ၜး ဇရေၚ်ဇၞော်သ္ကိုပ်မဆေၚ်စပ်တံဂှ် စၞောန်ပ္ညုၚ်လဝ်ရ။

သ္အာၚ်နူဂှ်ပၠန် ဒပ်ကံၚ်ဇြဳပၞာန်ဝွံ ကၟာတ်တာဒၞါလဝ် ကောန်ဒပ်ဂမၠိုၚ် နူကဵုအခေါၚ်တိုန်ဘာ၊ အခေါၚ်သှ်လိက်တံဂှ်တုဲ မၞိဟ်မွဲဓဝ် ညံၚ်ဂွိုအ်တိတ် မ္ၚးဒပ်ဂှ် ထ္ၜးလဝ်ဟိုတ် ပရေၚ်ဂီုကၠီုရောၚ် ပရိုၚ်တမ်ရိုဟ်အပ္ဍဲဒပ်တံ ဟီုလဝ်ရ။

ကောန်ဒပ်ကံၚ်ဇြဳပၞာန်သ္ဇိုၚ် ဟွံကလၚ်အမိၚ်တံဂှ်လေဝ် လ္ပာ်ဒပ်ကံၚ်ဇြဳပၞာန်တံ ပွမကေတ်အရေဝ် သ္ကာတ်တ်မြဟ်ဟ်ဂှ် ဟွံကၠောန်မွဲသာ် ထိၚ်ဒဝ်တုဲ ရပ်စပ်သောၚ်ကလးကၠုၚ်ရဂှ် ကိုဝ်မျဵုမျေတ်အံၚ် ညးဒုၚ်တာလျိုၚ် ဂကောံ (မေမေ့ရင်ခွင်) မရီုဗၚ်ကဵုဒၟံၚ် ညံၚ်ဂွံလုပ် CDM မာန်ဂှ် ဟီုလဝ်ရ။

“ဗီုပြၚ်ဍေံတံဂှ် နွံနာနာသာ်ရ။ လ္ၚဵုတံဂှ်တှ်ေ ကလေၚ်စဴကၠုၚ် ဟွံကေတ်အရေဝ်ပုဟ်ဂးတုဲ ကော်ဒၟံၚ်ရ။ လ္ၚဵုတံဂှ်ပၠန် မိက်ဂွံတိတ်ဒၟံၚ်ဏောၚ်။ မိက်ဂွံတိတ်ဒၟံၚ်တုဲ ဒးထံၚ်တှ်ေ တိတ်ဏောၚ် မၞိဟ်ဗီုဏံလေဝ် နွံ။ အဓိကဂှ်တှ်ေ ဍေံတံ ဟွံဒးဗ္တိုက်ပၞာန်တှ်ေတုဲရ။ ဒးအာဗ္တိုက်ပၞာန်မ္ဂး ချိုတ်ဏောၚ်လေဝ်။ အေ ဂှ်တှ်ေ သၠေံသၠန်တုဲ ကလေၚ်ကော်တံ၊ ယဝ်ရလ္တူတေံ ဟွံတီဏီပုဟ်မ္ဂး ၜိုတ်သ္ပမာန် ကၠောန်ကေတ်သ္ၚိတ်တ်ဂှ် နွံ။ မူဟိုတ်ရောတှ်ေ ကောန်ပၞာန်တိတ်ဂှ် ဂၠိုၚ်ဒၟံၚ်ဏောၚ်။ ဇၟာပ်ပ်ဒပ်ဂှ် တိတ်ဒၟံၚ်ညးသ္ကအိုတ်ရ” သာ်ဝွံ ဟီုဂးလဝ်ရ။

မွဲလ္ပာ်ဂှ်ပၠန် ကံၚ်ဇြဳပၞာန်ဝွံ ကုသ္ကိုပ်ၝောံဒပ်၊ သ္ကိုပ်တမ်ဒပ်၊ သၞာဲဒဴ မဒစဵုဒစး သွက်ဂွံဗ္တိုက်ပၞာန်တံဂှ် ကၠောန်သ္ပကေတ်ဒၟံၚ်အရေဝ် သ္ကာတ်တ်မြဟ်ဟ်တုဲ လ္ၚဵုတံမ္ဂး မ္ၚးနူကဵုဒဏ်ထံၚ်သၞာံဂၠိၚ်ဂှ် ဖျေံစၟတ်ကေတ်ဒၟံၚ်ဒုဟ် စဵုကဵုဒဏ်ဂစိုတ်တံဂှ် ကၠောန်ၜိုတ်ဒၟံၚ်ရ။

ကၞောတ်သၞာံတုဲကၠုၚ်တေံဂှ်လေဝ် ကုသ္ကိုပ်ဗိုလ်နာၚ်ၚ်ဇြဝ်၊ သ္ကိုပ်ဗိုလ်တာန်နာၚ်အေ၊ သ္ကိုပ်တမ်ဒပ်ယာယဳ ဒုသ္ကိုပ်ဗိုလ်ဇၞော် ပျေအ်ဖျဵုမာၚ် နူကဵုခမရ ၄၀၃ မဖျေံလဝ်တာလျိုၚ် ပ္ဍဲကဵုမုက်ပၞာန်တွဵုရးကရေၚ်ဂှ် ကံၚ်ဇြဳပၞာန် ရပ်ဒက်ကေတ်လဝ်အရေဝ် နကဵုဟွံကလၚ်အမိၚ်၊ ကယျာန်ပါဲ ဒစဵုဒစး သွက်ဂွံဗ္တိုက်ပၞာန်တံဂှ် နွံလဝ်ရ။

လၟေၚ်ဒဒှ်လအာတုပ်သာ်ဏံဂှ် ပ္ဍဲကဵုတွဵုရးကချေၚ်၊ ရးတၞၚ်သဳ၊ တွဵုရးချေၚ် ကေုာံ တွဵုရးကရေၚ်ဍာဲ၊ ရးသက်ကိုၚ်၊ ရးမဂွဵုတံဂှ် နွံဒၟံၚ်တၟာဂလိုၚ်ကီုလေဝ် ပရေၚ်ကလိုက်ကၟဵုအပ္ဍဲဒပ် ညံၚ်ဂွိုအ်ဒှ်ကၠုၚ်တုဲ ကံၚ်ဇြဳပၞာန် ကၟာတ်လဝ်ပရိုၚ်ဂှ် ဗိုလ်ဇၞော် CDM ဂမၠိုၚ် သ္ဂးလဝ်ရ။

အလုံမွဲကၟိန်ဍုၚ် အပ္ဍဲကာလဒပ်ပၞာန်သီအဝဵုဏံ ဟိုတ်နူဟွံမိက်ယိုက်ဂၠေၚ်တာလျိုၚ် သၟဝ်လက်ထက်ကံၚ်ဇြဳပၞာန်ဂှ်တုဲ ကောန်ပၞာန်သ္ပလဝ် CDM တံကဵု ကောန်ဒပ်ဗၠာဲသၟိၚ်တံ နွံကၠုၚ် ၁၃၀၀၀ ပြၚ်ဂှ် ပ္ဍဲဂိတုသေပ်တေမ်ဗာ (၇) တေံ အလဵုအသဳညဳသၟဟ်ဂကူ NUG လလောၚ်ပ္တိတ်လဝ်ရ။

ပရိုၚ်−သြၚ်လောန်တိုၚ်(မ်)

ဗီု−MOI