ဖာသံၚ်၊ အံက်တဝ်ဗာ (၇)
ပ္ဍဲဒေသမဝ်ချဳ ပွိုၚ်ဍုၚ်ဖာသံၚ်၊ တွဵုရးကရေၚ်ဍာဲ ဒၞါဲပဋိပက္ခပရေၚ်ပၞာန်တံ မသ္ကာတ်မြဟ်ဒၟံၚ်ဂှ် အပ္ဍဲကာလဒပ်ပၞာန်သီအဝဵု ပွိုၚ်ၜါသၞာံဘာ်ပြၚ်ဏံ ဒးဂဗဒၟံၚ် ကဵုအကာဲအရာၚုဟ်ဖျာသ္ဇိုၚ်တံ သၠုၚ်တိုန်ကၠုၚ်ဂှ် ဂွံတီကေတ် ဇရေၚ်ညးဒေသတံရ။
အတိုၚ်ဂလာန်ညးဒေသမဝ်ချဳမွဲတၠဂှ်မ္ဂး ၚုဟ်ဗၞိက်စၞစသ္ဇိုၚ်ဂမၠိုၚ်ဝွံ ပပ္တံနူဂိတုဂျူလာၚ် သၞာံဏံတုဲ နူကဵုတိုန်ကၠုၚ်ဒၟံၚ်အိၚ်ၚ်ဂှ် အခါလၟုဟ် စိုပ်ကၠုၚ်ၚုဟ်ကၞောတ်အထောဋ်ရ။
အပ္ဍဲကဵုဒေသဂှ် သ္ၚုကြံၚ်မွဲရိုက် ပန်ကိုဋ်ဒ္ကေဝ်၊ ကၠေၚ်သတ်ဗြဴစ မွဲပသာ မွဲကိုဋ်ဒ္ကေဝ်၊ ကသိုန်ဗ္ကေတ် မွဲပသာ ၜါဠက်၊ ခၟာဲစာၚ်မွဲမ စဵုကဵု ၁၅၀၀ ဒ္ကေဝ်ဂှ် ၚုဟ်သၠုၚ်တိုန်ဒၟံၚ်ရ။
ၚုဟ်ဖျာ ဂွံသၠုၚ်တိုန်ကၠုၚ် ကဵုဆဏံဂှ်ဝွံ မ္ၚးနူကဵုအခက်အခုဲ ပရေၚ်ဆက်စၠောံဂၠံၚ်ဍာန်ဂှ် ဟိုတ်နူတိဍာ်ဟွံညိၚ်ဝတ်တုဲ ၚုဟ်သၠုၚ်တိုန်ကၠုၚ်ဂှ် ဥက္ကဌကမ္မတဳ အခေါၚ်အရာမၞိဟ် ကံၚ်ဇြဳကဵုကသပ်တွဵုရးကရေၚ်ဍာဲ KSCC ဥူဗညာ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဒေသမဝ်ချဳဝွံ ဒှ်ဒေသကၠောန်ၜိုတ် ကမၠောန်ၜံက်ခါဲသတ္တု ဖကောဝ်ဗ္တာၚ်တုဲ အပ္ဍဲဒေသ ပွမတဵုလွဳသြောံသ္ၚုသတ်ဂန်တံ ဟွံမွဲဂှ်ရ ကၠာဂွိုအ်သီအဝဵုတေံရ ဒှ်ဒေသ ၚုဟ်ဖျာက္ဍၚ်ဒၟံၚ် နူကဵုလွိုၚ်ကဝ် ဗ္ဒါဲၜါဆရ။
ဒေသဏံဂှ် မ္ၚးနူကဵုညးဒေသတံဂှ် သၟာကမၠောန်ဆုဲပြံၚ်ဗွဲမဂၠိုၚ် မံၚ်တန်တဴဒၟံၚ်တုဲ ဗၞိက်စၞစသုၚ်သ္ဇိုၚ်ဂမၠိုၚ် မပ္တံကဵု သ္ၚု၊ ကၠေၚ်၊ ကသိုန်ဗ္ကေတ်၊ ခၟာဲစာၚ်တံဂှ် ကၠာဂွိုအ်သီအဝဵုတေံရ ၚုဟ်သၠုၚ်တိုန်ဒၟံၚ် ဂၠိုၚ်ကဵုဆဂှ် သ္ဂးရ။
သ္ကုတ်ဂၠံၚ် လွိုၚ်ကဝ်−ဒဝ်တမကျဳ−ဗဝ်လခေဝ် မဒှ်ဂၠံၚ်ပလံၚ်ဗစိုပ်ဗၞိက် အဓိက ကုဒေသမဝ်ချဳဂှ်ဝွံ အကြာဒပ်ကံၚ်ဇြဳပၞာန်တံကဵု ဂကောံဒပ်စဵုဒၞါပၠန်ဂတးတံဂှ် နူစသၞာံတုဲကၠုၚ်တေံရ ပေါဲဗ္တိုက်တံ သ္ကာတ်မြဟ်လဝ်ရ။
နကဵုဂကောံဒပ်ပၠန်ဂတးဂမၠိုၚ် ညးဍုၚ်ကွာန်တံ ညံၚ်ဂွိုအ်သုၚ်စောဲဂၠံၚ်ဏံ လလောၚ်ပ္တိတ်လဝ်တံလေဝ် နွံဒၟံၚ်ဖိုဟ်ရ။
ဟိုတ်နူပေါဲဗ္တိုက်တုဲ ဒေသမဝ်ချဳဝွံ ဒးဆေၚ်ဒၟံၚ်မုက် ကုၚုဟ်ဖျာက္ဍၚ်ဂှ်တုဲ လှုဲလှာ်နွံကီုလေဝ် ဒးဆေၚ်ဒၟံၚ်မုက် ၜိုတ်နွံပၟိက်ရာန်ဟွံဂွံဂှ်ရောၚ်ဂှ် ဂွံတီကေတ် အတိုၚ်ဂလာန် ညးဒေသတံရ။
ပရိုၚ်−သြၚ်လောန်တိုၚ်(မ်)
sanlontai