ၜၚ်ကံက်၊ အံက်တဝ်ဗာ (၆)
ဗော်ဒစဵုဒစးဍုၚ်သေံ Move Forward ဝွံ နကဵုတၚ်စၟဳ သ္ဂောံကလေၚ်ဂွံ ဓဝ်ညဳသာအပ္ဍဲဍုၚ်တုဲ ပ္ဍဲဂိတုအံက်တဝ်ဗာ (၅) တေံ ပ္တိုန်လဝ်ဂလာန် ကုသၞောဝ်အပြောံ မကဵုအခေါၚ်ဗၠးနူဒုဟ်ဒဏ် သွက်ညးထ္ၜးဆန္ဒပရေၚ်ဍုၚ်ကွာန်တံရ။
သၞောဝ်အပြောံဏံဂှ်ဝွံ ကုညးထ္ၜးဆန္ဒ ပရေၚ်ဍုၚ်ကွာန် မဒးဒုၚ်စောဲလဝ်ဂဗုတ်သီုဖအိုတ် ပ္ဍဲကဵုပေါဲထ္ၜးဆန္ဒ ဒစဵုဒစး ပရေၚ်အုပ်ဓုပ် သ္ကိုပ်ဝန်ဇၞော် တက်ဇြေန်ယှေန်နာဝတ်ထရာ နူကဵုဂကောံမဟာမိတ်ဒဳမဝ်ကရေဇြဳညးဍုၚ်ကွာန်တေံ စနူသၞာံ ၂၀၀၆ ဂိတုဖေဖဝ်ဝါရဳ (၁၁) တေံဂှ် သွက်ဂွံကဵုအခေါၚ်ဗၠးနူဒုဟ်ဒဏ်ဂှ် ချူခၞံလဝ်ရောၚ် က္ဍိုပ်သ္ကိုပ်ဗော် ချိုၚ်တဝက် တူလာတောန် ဟီုဂးလဝ်ရ။
သၞောဝ်အခေါၚ်ဗၠးနူဒုဟ်ဒဏ် မပ္တိုန်လဝ်ဂလာန်ဂှ်ဝွံ ဟိုတ်နူပရေၚ်ဆဝ်မ္ၚုဟ်ပရေၚ်ဍုၚ်ကွာန်တံတုဲ ကုညးထ္ၜးဆန္ဒပရေၚ်ဍုၚ်ကွာန် ဂၠိုၚ်ကဵုလ္ၚီ မဒးဒုၚ်ဖျေံလဝ်ဒဏ်ထံၚ် နကဵုသၞောဝ်နာနာသာ်တံ တၞီလုပ်အာဏောၚ်ဂှ် မေဿတာ ချိုၚ်တဝက် သ္ဂးလဝ်ရ။
“ညးမထ္မံက်ပ္တိတ်ဟီုဂး ဓဝ်ပတှ်ေပရေၚ်ဍုၚ်ကွာန်တံဂှ်ဝွံ ယဝ်ရဗၠးၜးအာ နူကဵုပွမဒးဒုၚ်စောဲဂဗုတ်တံဂှ်မ္ဂး ဂကောံဗွိုၚ်မၞိဟ်သေံတံဝွံ ကလေၚ်ကလိဂွံဓဝ်ညဳသာ၊ ပရေၚ်ၜိုဟ်လလမ်၊ တသိုက်စိုတ်တံမာန်ဂှ် ဗော် Move Forward ပတှ်ေစှ်ေစိုတ်ရ” သာ်ဝွံ ညးသ္ဂးလဝ်ရ။
သွက်ဂွံထ္မံက်ပ္တိတ် ဒုဟ်ဒဏ် မထေက်ကဵု ကလိဂွံအခေါၚ်ဗၠးနူဒုဟ်ဒဏ်တံဂှ် နကဵုဥက္ကဌပါလဳမာန် ဝါမ်မိုဝ်ဟာမက် နူမာသ် သွက်ဂွံဒက်ပ္တန်ကမ္မတဳ စၟဳတ်ကဵုဂှ် ဗော်ဒစဵုဒစးဂှ် ပၠောပ်လဝ်ဂလာန်ရ။
“ ဒုဟ်ဒဏ်ဂှ်နွံတၟာဂလိုၚ်တုဲ အခိၚ်ကာလဂှ်လေဝ် သၠဲလးဂှ်ရ ဒုဟ်ဒဏ်မကလိလောန်လဝ်တံဂှ် ပိုယ်တံ ဟွံစၞောန်ပျးလဝ်ပုဟ်” သာ်ဝွံ မေဿတာ ချိုၚ်တဝက် ဟီုရ။
ဆ္ဂး သၞောဝ်မူအပြောံဏံဂှ် ကုညးမရပ်စပ်အဝဵုနကဵုနဲကဲအဓမ္မ ပ္ဍဲကဵုပရေၚ်ကလိုက်ကၟဵု၊ သ္ကဵုဒှ်အန္တရာယ်လမျီု ဟွံသေၚ်မ္ဂး ပ္ဍဲကဵုပါ်ထ္ကး ပရေၚ်ဂီုကၠီုတံဂှ် ဒဒှ်ရညှာတာအာဟွံသေၚ်ဂှ်ကီု၊ ယဝ်ရဗော်ပရေၚ်ဍုၚ်ကွာန်တံ ပံၚ်တောဲပူဗိုၚ်ကဵုမ္ဂး သ္ပဒတန် သၞောဝ်အပြောံဏံမာန်ဏောၚ်ဂှ် ညးသ္ဂးလဝ်ရ။
ပ္ဍဲဍုၚ်သေံဂှ် စနူသၞာံ ၂၀၁၆ တုဲ ဒဒှ်ရ လၟိဟ်မၞိဟ် ၄၄၀၀ ပြၚ် ဒးဒုၚ်စောဲလဝ်ဂဗုတ် စပ်ကဵုထ္ၜးဆန္ဒပရေၚ်ဍုၚ်ကွာန်ဂှ် ဂွံတီကေတ် အတိုၚ်တၚ်နၚ် ဌာန်ပရိုၚ်ရိုက်တာရ။
အတိုၚ်ဂလာန် ကံၚ်ဇြဳညးရေၚ်တၠုၚ်ဂဗုတ်သေံ စပ်ကဵုအခေါၚ်အရာမၞိဟ်တံဂှ်မ္ဂး တုဲကၠုၚ်ပွိုၚ် ၃ သၞာံတေံ စပ်ကဵုပရေၚ်ထ္ၜးဆန္ဒပရေၚ်ဍုၚ်ကွာန်တုဲ ပ္ဍဲကဵုဍုၚ်သေံဂှ် အပံၚ်မၞိဟ် ၁၉၂၈ တၠ ဒးဒုၚ်စောဲလဝ်ဂဗုတ်ရောၚ် လလောၚ်ပ္တိတ်လဝ်ရ။
Ref: Bangkok Post
sanlontai