ပ္ဍဲကအ်ကြိက် ဟိုတ်နူဗုမ်ဒရုမ်စှ်ေတုဲ ပါလုပ်သီုကောန်ၚာ်မွဲ ကောန်အရာပ် (၂) တၠ ဇီုကပိုက်ဒးလဝ်ဝပ်

ကအ်ကြိက်၊ အံက်တဝ်ဗာ(၈)

ဒပ်ကံၚ်ဇြဳပၞာန်ဖျေံလဝ်ဗဒိုပ်နွံဒၟံၚ် ပ္ဍဲဘာလကျာ် လ္တူဍုၚ်ကအ်ကြိက်၊ တွဵုရးကရေၚ်မွဲဘာဂှ် ဟိုတ်နူဒးဒုၚ်ဂြာတ်ထောံဖျေံလဝ်ဗုမ် နကဵုဒရုမ်တုဲ ပ္ဍဲကဵုပရေၚ်ပရော ဒးဒုၚ်ဗတိုက်လဝ်ဏံ ပါလုပ်သီုကောန်ၚာ်မွဲ ကောန်အရာပ် (၂) တၠ မဒှ်ညးဍုၚ်ကွာန်အာကၠုၚ်ဒၟံၚ် အကြာဂၠံၚ် မၞုံဗ္ဒာဲကရပ်တအ် ဇီုကပိုက်ဒးလဝ်ဘဲဝပ်ရဂှ် ညးဒေသတအ် ဟီုရ။

ပ္ဍဲကဵုဂိတုအံက်တဝ်ဗာ စၟတ်တ္ၚဲ (၆) တုဲကၠုၚ် ပ္ဍဲအခိၚ်ဇိုၚ်သဝ်တ္ၚဲ ၜိုတ် (၄) နာဍဳ ဒပ်ကံၚ်ဇြဳပၞာန် ဖျေံလဝ်ဗဒိုပ် ပ္ဍဲဘာလကျာ်ဓမ္မာရာမ အရာပ်စၟတ် (၂) ဍုၚ်ကအ်ကြိက်ဂှ် ဒပ်ပံၚ်ကောံတအ် ကၠုၚ်ဂြာတ်ထောံဖျေံလဝ်ဗုမ်ကဵုဒရုမ် ဗတိုက်လဝ်တုဲ မဗုမ်တအ်ဂှ် ဒတုံစှ်ေ လ္တူဂၠံၚ်ဗ္ဒာဲဘာလကျာ်ဓမ္မာရာမတုဲ ပါ်ခတိုဟ်လဝ်ရဂှ် ဂွံတီကေတ် နူညးဒေသတအ်ရ။

ဟိုတ်နူဗုံဒတုံစှ်ေပါ်ခတိုဟ်လဝ်တုဲ မၞိဟ်တြုံ ညးဍုၚ်ကွာန်အာကၠုၚ်အကြာဂၠံၚ်မွဲတၠကဵု ကောန်ၚာ် အယုက် (၁၀) သၞာံ ကောန်ကွးဘာမွဲတၠ အပံၚ်ညးဒေသ (၂) တၠ ဇီုကပိုက်ဒးလဝ်ဘဲဝပ်တုဲ ပ္ဍဲကဵုညးဒးလဝ်ဘဲဝပ် ၜါတၠဂှ် မၞိဟ်တြုမွဲတၠဂှ်မ္ဂး နူကဵုရုၚ်ဂဥုဲကအ်ကြိက်မွဲကဆံၚ် ပလံၚ်စၠောံဗစိုပ်လဝ် ရုၚ်ဂဥုဲဘာအၚ်တုဲ ဒုၚ်လွဳလွတ်ဒၟံၚ်ရဂှ်ဂွံတီကေတ်ရ။

သ္အာၚ်နူဂှ်ပၠန် အခိၚ်ဗ္တံပ္ဍဲကဵုတ္ၚဲဂှ် ၜိုတ်(၅) နာဍဳဂှ်လေဝ် ၜိုန်ရဒပ်ကံၚ်ဇြဳပၞာန် ဖျေံလဝ်ဗဒိုပ် ပ္ဍဲဘာလကျာ်ဓမ္မာရာမဂှ် ဒးဒုၚ်ထပ်ဂြာတ်ထောံဖျေံလဝ်ဗုမ်ကဵုဒရုမ် အလန်ဒုတိယကီုလေဝ် ပရေၚ်ဇီုကပိုက်ဒးလဝ် ဟၟဲရဂှ်ဂွံတီကေတ်ရ။

လ္တူဍုၚ်ကအ်ကြိက်ကီု သီုပ္ဍဲကွာန်ဒၞာဲမွဲဗွိုၚ်မ္ၚးဍုၚ်ကအ်ကြိက်ဂှ် ဟိုတ်နူဒပ်ကံၚ်ဇြဳပၞာန် ပန်ဖျေံဗတိုက်ဒၟံၚ်ကဵုလွဟ်ဇၞော်ကီု၊ ဟိုတ်နူဂကောံဇြဟတ်ပၠန်ဂတးတအ် ဂြာတ်ထောံဖျေံဗုမ်ကဵုဒရုမ်ကီုတုဲ ပရေၚ်ကောန်ဒေသ ညးဍုၚ်ကွာန်တအ် ဇီုကပိုက်ချိုတ် ဒးဒၟံၚ်ဘဲဝပ် က္တဵုဒှ်ဒၟံၚ်လၟိုန်ရ။

ပ္ဍဲကဵုဂိတုအံက်တဝ်ဗာ စၟတ်တ္ၚဲ (၃) တေံလေဝ် နူကဵုတံဒပ်ကံၚ်ဇြဳပၞာန် ခလရ ၉၇ ဖျေံသ္ဇိုၚ်ဍုၚ်ကအ်ကြိက်ဂှ် ဟိုတ်နူပန်ပှော်လဝ်လွဟ်ဇၞော် (၃)လစုတ်တုဲ ဒတုံစှ်ေပါ်ခတိုဟ်လဝ် ပ္ဍဲကွာန်အာန်ဖဂျဳ ဒးလဝ်သ္ၚိဒၟံၚ် (၃) မလီုလာ်လဝ်တုဲ မၞိဟ်ဗြဴ အယုက် (၅၀) သၞာံမွဲတၠ ဇီုကပိုက်ဒးလဝ်ဘဲဝပ်ရဂှ် ခရိုၚ်ဒူပလာယာ လလောၚ်တြးလဝ် ပရိုၚ်ရ။

အတိုၚ်တၚ်လလောၚ်တြးဇာနှိက်အထံက်အရီုဓဝ်ၜိုဟ်လလံကရေၚ် KPSN လလောၚ်တြးလဝ်မ္ဂး ပ္ဍဲမွဲကာလဒပ်ပၞာန်သီအဝဵုပွိုၚ် (၂) သၞာံပြၚ်ၚ်ဏံ ပ္ဍဲကဵုခရိုၚ်ဒူပလာယာ – KNU ဟိုတ်နူဒပ်ကံၚ်ဇြဳပၞာန် ပန်ဖျေံလဝ်လွဟ်ဇၞော်တုဲ ကောန်အရာပ် (၁၆) တၠဒးချိုတ်လဝ်တုဲ ဒးလဝ်ဘဲဝပ် (၉၅) တၠရဂှ် ဂွံတီကေတ်ရ။

ပရိုၚ် – သြၚ်လောန်တိုၚ်(မ်)

ဗီု – Social Media