ရေဝ်၊ အံက်တဝ်ဗာ(၈)
ပ္ဍဲပွိုၚ်ဍုၚ်ရေဝ်၊ တွဵုရးဍုၚ်မန် မလလောၚ်တြးလဝ် ပရေၚ်အုပ်ဓုပ်ပၞာန်ဂှ် ပ္ဍဲသ္ကုတ်လကြဴဏံ ပ္တဝ်လဝ်ကဵုမၞိဟ်ဗြဴတအ်တုဲ ဒးဒုၚ်ပၠံၚ်ၜး က္တဵုဒှ်ကၠေတ်ကၠုၚ်ဒၟံၚ်ရဂှ် ဂွံတီကေတ် နူညးဒေသတအ်ရ။
ပ္ဍဲဂိတုအံက်တဝ်ဗာ စၟတ်တ္ၚဲ (၅)တုဲကၠုၚ်တေံ ဒဝ်မိၚေဝ် ဒၟံၚ်ကွာန်လုက်ပုပ် ဒဳကၠုၚ်ကွဳလိုန်ဓာတ် အကြာကွာန်ကွေန်ယှေကဵု ကွာန်ကျောက်မိချောၚ်၊ ပွိုၚ်ဍုၚ်ရေဝ်ဂှ် မၞိဟ်တြုံ (၃) တၠ ဗဒေါံကွဳလိုန်ဓာတ် ထ္ၜးလွဟ်ဘပဠတုဲ ပၠံၚ်ၜးကေတ်ဏာ သြန် (၁၀)ကိုတ်ရ။
ပ္ဍဲဂိတုသေပ်တေမ်ဗာသတ္တာဟပဌမတေံလေဝ် သၟတ်ဗြဴမွဲတၠ ဒဳကၠုၚ်ကွဳလိုန်ဓာတ် နူလ္ပာ်ကွာန်အစေန် လ္ပာ်ဍုၚ်ရေဝ်မွဲတၠဂှ် မၞိဟ်တြုံဒဳကၠုၚ်ကွဳလိုန်ဓာတ် (၂) တၠ ထၞိက်ဗဒေါံဖျေံကွဳလိုန်ဓာတ်တုဲ ပရေၚ်ပေရာပၠံၚ်ၜးကေတ်ဏာ ထိုၚ်စၞာံကဵုဖုၚ်တအ်လေဝ် ကေၚ်ဒှ်လဝ်ရ။
အတိုၚ်တၚ်ဂၞၚ်သြန်လောန်တိုၚ်(မ်) ပကောံပကေဝ်ဂွံလဝ် ၜိုတ်ဟောဝ်ဍစိုပ်ဂှ်မ္ဂး ပ္ဍဲဂိတုသေပ်တေမ်ဗာ မွဲဂိတုဓဝ်ဂှ် ပ္ဍဲကဵုပွိုၚ်ဍုၚ်ရေဝ် ဂဗုတ်ဒးဒုၚ်ပၠံၚ်ၜး က္တဵုဒှ်လဝ်ဟွံအောန်နူ (၂၀) ဝါတုဲ ပ္ဍဲကဵုဂှ် ဗွဲမဂၠိုၚ်ဂှ် မၞိဟ်ဗြဴတအ် ဒးဒုၚ်ပၠံၚ်ၜးလဝ်ဂၠိုၚ်ရ။
ပ္ဍဲကဵုပရေၚ်ပရောဒးဒုၚ်ပၠံၚ်ၜးတအ်ဂှ် ပါဲနူထ္ၜးလွဟ်လက်နက်တုဲ ပၠံၚ်ၜး၊ ၜုၚ်တက်တုဲ ပၠံၚ်ၜး ဗျာံၜုန်တုဲ ပၠံၚ်ၜးတအ်ဂှ် ဂဗုတ်ပၠံၚ်ၜးကလိလောန်ဒၟံၚ် စဵုသ္ပကၠုၚ်အန္တရာယ်ကဵုလမျီုမၞိဟ် နွံကၠုၚ်ရဂှ် ညးဒေသတအ် ဟီုရ။
ဂကောံပၠံၚ်ၜးတအ်ဂှ် လ္တူနူအခိၚ်ဗ္တံ ပ္ဍဲကဵုအခိၚ်တ္ၚဲဂှ် ကလိလောန်ဒၟံၚ်ပရေၚ်ပၠၚ်ၜး ဒှ်လဝ်ဗွဲမဂၠိုၚ်တုဲ လ္ပာ်ဒပ်ဗၠာဲသၟိၚ်ကံၚ်ဇြဴဳပၞာန်လေဝ် ဓမံက်ပ္တိုန် ကေတ်အရေဝ်မာန် ဟၟဲရ။
ပ္ဍဲကဵုပွိုၚ်ဍုၚ်ရေဝ် ယန္တရာပရေၚ်အုပ်ဓုပ်ကံၚ်ဇြဳပၞာန် ဂေတ်ပေၚ်ၚ်ဟွံမာန်ဂှ် ပ္ဍဲမွဲကာလဒပ်ပၞာန်သီအဝဵုဏံ ဝိုၚ်ဝေၚ်လံၚ်ဇျှၚ်၊ ပရေၚ်သုၚ်စောဲဂဥုဲၜူမာဲ ဂၠိုၚ်န်တိုန်ကၠုၚ်ကီု၊ ၚုဟ်ဗၞိက်ဗွဝ်ဖျာ က္ဍၚ်တိုန်ကၠုၚ်တုဲ ပရေၚ်ပၠံၚ်ၜးတအ် သာတုဲ ဒှ်ကၠုၚ်ဂၠိုၚ်ဒၟံၚ်ရ။
ပရိုၚ် – သြၚ်လောန်တိုၚ်(မ်)
ဗီု – Social Media
sanlontai