ပ္ဍဲပေါဲဗတိုက်ဂြိုပ်ဗၟံက်ထဝါဲ ပရေၚ်ဇီုကပိုက်ချိုတ်ဂျိုၚ် သီုၜါလ္ပာ် နွံ

ထဝါဲ၊ အံက်တဝ်ဗာ(၈)

ရးဒေသဇၞော်တၞၚ်သြဳ၊ ပွိုၚ်ဍုၚ်ထဝါဲ၊ ပ္ဍဲကဵုဒေသဂြိုပ်ဗၟံက်ဂှ် သ္ပတံနူမွဲၜါတ္ၚဲတုဲကၠုၚ်ဏံ ပေါဲဗတိုက် က္တဵုဒှ်ဒၟံၚ် အရိုဟ်တ္ၚဲဆက်က်တုဲ ပ္ဍဲကဵုပေါဲဗတိုက်တအ်ဂှ် ပရေၚ်ဇီုကပိုက်ချိုတ်ဂျိုၚ် သီုၜါလ္ပာ်နွံဒၟံၚ်ရဂှ် ဂွံတီကေတ်နူကောန်ဒပ်စဵုဒၞာဒေသတအ်ရ။

သ္ပတံနူဂိတုအံက်တဝ်ဗာ စၟတ်တ္ၚဲ (၁) တုဲကၠုၚ်တေံတုဲ နူကဵုဒပ်ကံၚ်ဇြဳပၞာန် ဇြဟတ်ဒပ်ဗ္ဒာဲ ၁၀၀ ဟိုတ်နူထ္ပက်လုပ်ကၠုၚ်ပၞာန် ပ္ဍဲဂြိုပ်ဗၟံက်ထဝါဲတုဲ ပေါဲဗတိုက် ဒှ်ကၠုၚ်ဒၟံၚ် အရိုဟ်ဟ်တ္ၚဲဆက်ဆက်ရ။

ပ္ဍဲကဵုဂိတုအံက်တဝ်ဗာ စၟတ်တ္ၚဲ (၁) စဵုကဵုစၟတ်တ္ၚဲ (၃) ပ္ဍဲပွိုၚ် (၃) တ္ၚဲဂှ် ပေါဲဗတိုက်ဆေၚ်မုက်ၜါလ္ပာ် ဒှ်လဝ်ဟွံအောန်နူ (၆) ဝါနွံရ။

ပ္ဍဲကဵုပေါဲဗတိုက်တအ်ဂှ် လ္ပာ်ကံၚ်ဇြဳပၞာန် ဒးချိုတ်လဝ် ဟွံအောန်နူ ၅ တၠနွံတုဲ လ္ပာ်ဒပ်စဵုဒၞာညးဍုၚ်ကွာန် PDF တအ်လေဝ် သ္ဂံၚ်မွဲတၠ ဒးပြဟ်လလုဲလဝ်ရဂှ် ဂွံတီကေတ် အတိုၚ်ကောန်ဒပ်စဵုဒၞာဒေသတအ် ဟီုထ္ၜးလဝ်ရ။

အခိၚ်လၟုဟ်ဏံ ကရောၚ်ပၞာန်ကံၚ်ဇြဳပၞာန်ဂှ် ဟိုတ်နူဆက်ဖျေံလဝ်ဗဒိုပ်မံၚ်ဒၟံၚ် ပ္ဍဲမွဲဗွိုၚ်ဗ္ဒာဲကွာန်ယျေဝိုၚ်ကဵု ခေါၚ်တိုၚ်ပျေန်တုဲ အကာဲအရာပရေၚ်ပၞာန်ၜါလ္ပာ် ဆက်ကြံၚ်မ္ၚိုဟ်ဒၟံၚ်ရ။

ဟိုတ်နူပေါဲဗတိုက်တုဲ ညးဒေသ နူကွာန်မပ္တံကဵုပခေတ်၊ ယျေဝိုၚ်၊ ခေါၚ်တိုၚ်ပျေန်၊ ကေန်ကုမ်၊ မျေန်မေန်တာပ်၊ ပုၚ်နေဝ်ချောၚ်၊ ဟာမျေန်ဂျဳတအ် ၁၀၀၀ ပြၚ် ဒးဂြိပ်ဒဴပါဲဓလေတ်ဒၟံၚ် ဒၞာဲဌာန်ဗၠးဘဲရ။

ပ္ဍဲရးဒေသတၞၚ်သြဳဂှ်မ္ဂး ပ္ဍဲကဵုဂိတုသေပ်တေမ်ဗာတုဲကၠုၚ်ဏံ အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ ဒပ်စဵုဒၞာဒေသတအ် ပေါဲဗတိုက်ဟွံအောန်ူ (၅၀) ဝါ က္တဵုဒှ်လဝ်တုဲ ပရေၚ်ဇီုကပိုက်ချိုတ်ဂျိုၚ်သီုၜါလ္ပာ်လေဝ် နွံဒၟံၚ်ရ။

ပရိုၚ် – သြၚ်လောန်တိုၚ်(မ်)

ဗီု – Social Media