သဓီု၊ အံက်တဝ်ဗာ(၈)
တွဵုရးဍုၚ်မန်၊ ပ္ဍဲပွိုၚ်ဍုၚ်သဓီုဂှ် သ္ပတံနူဂိတုအံက်တဝ်ဗာ စၟတ်တ္ၚဲ (၆) တုဲ ညံၚ်မၞိဟ်တြုံ (၂) တၠ ဟွံဂွံဍိုက်အာကွဳလိုန်ဓာတ်မွဲစွံဂှ် နူကဵုဂကောံအုပ်ဓုပ်ပွိုၚ်ဍုၚ်ကံၚ်ဇြဳပၞာန် ပ္တိတ်လဝ်အမိၚ်ဒေသန္တရဂှ် ကောန်ဍုၚ်သဓီုတအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ကြဴကောန်ဒပ်စဵုဒၞာညးဍုၚ်ကွာန် ပွိုၚ်ဍုၚ်သဓီုတအ် ကၠုၚ်ကဵုကွဳိလိုန်ဓာတ်တုဲ ပန်ဂစိုတ်လဝ် ဗိုလ်ဇၞော်ဒေါံဇူ ကွာန်ကျာပါန် ပွိုၚ်ဍုၚ်သဓီုမွဲတၠ နကဵုလွဟ်ပ္ဍဲသ္ၚိညး ပ္ဍဲကဵုဂိတုအံက်တဝ်ဗာ စၟတ်တ္ၚဲ (၃) တုဲကၠုၚ်တေံဂှ်တုဲ ပိုၚ်ခြာကၠုၚ်လဝ် အခေါၚ်ဍိုက်ကွဳလိုန်ဓာတ်ရ။
အတိုၚ်အမိၚ်ဒေသန္တရဂှ်မ္ဂး ကွဳလိုန်ဓာတ်မွဲဖ္ဍိုက်မ္ဂး မၞိဟ်တြုံ (၂) တၠ ဍိုက်အာမွဲစွံဟွံဂွံကီု၊ လကြဴမၞိဟ်ဗြဴဂှ် မၞိဟ်တြုံဍိုက်ဗက်ဟွံဂွံကီု၊ မၞိဟ်ဗြဴသီု (၂) တၠ ဟွံသေၚ်မ္ဂး လကြဴမၞိဟ်တြုံဒဳဏာဂှ် မၞိဟ်ဗြဴဍိုက်ဗက်အာမာန်ရဂှ် ဟီုလဝ်ရ။
ယဝ်ရစၟဳစၟတ်ဆဵုဂဗဒး ဒဒှ်ရမၞိဟ်တြုံ (၂) တၠ ဍိုက်အာကွဳလိုန်ဓာတ်မွဲစွံမ္ဂး အတိုၚ်သၞောဝ်ဥပဒေရာဇသာတ်ဇၞော် ၝောံပိုဒ် ၁၈၈ ဒဏ်ထံၚ်မွဲဂိတုကမၠောန်ဟွံပါကဵုဒှ် ဒဏ်သြန်ကဵုဒှ် ဒုဟ်ဒဏ်သီုၜါဂကူ ဒးဒုၚ်ဖျေံမာန်ရ။
ကၠာနူဟွံဂွံပ္တိတ်အမိၚ်ဒေသန္တရ အခေါၚ်ဍိုက်ကွဳလိုန်ဓာတ်ဏံဏီ ပ္ဍဲတုဲကၠုၚ်မွဲၜါတ္ၚဲတေံလေဝ် ကောန်ဒပ်ကံၚ်ဇြဳပၞာန်တအ် ကၟာတ်ဒၞာစၟဳစၟတ်လဝ် ပ္ဍဲဒၞာဲလုပ်တိတ်ဍုၚ် ပါလုပ်သီုဒၞာဲဗ္ဒာဲကျာ်ယှိုဲသာယာန် ပ္ဍဲဍုၚ်သဓီုရဂှ် ဂွံတီကေတ် နူကောန်ဒေသဍုၚ်သဓီုတအ်ရ။
ဟိုတ်နူကံၚ်ဇြဳပၞာန်ပိုၚ်ခြာလဝ် အခေါၚ်ဍိုက်ကွဳလိုန်ဓာတ်တုဲ သွက်ညးဒဳတက္ကသဳကွဳလိုန်ဓာတ်တအ်ကီု၊ သုၚ်စောဲကွဳလိုန်ဓာတ်တုဲ သွက်ညးအာစဴကမၠောန်ကေုာံ ညးရာန်ဖျာ သွံဖျာတအ်ဂှ် ပရေၚ်ဇီုကပိုက်ဒးဂိ နွံကၠုၚ်မာန်ရဂှ် ညးဒေသတအ်ဟီုလဝ်ရ။
ဂိတုအံက်တဝ်ဗာစၟတ်တ္ၚဲ (၁) တုဲကၠုၚ်တေံလေဝ် ပ္ဍဲပွိုၚ်ဍုၚ်ပံၚ် ကောန်ဒပ်ကံၚ်ဇြဳပၞာန်တအ် ဒးဒုၚ်ပန်ဂစိုတ်ဒၟံၚ် မွဲခနမွဲခနဂှ်လေဝ် ညံၚ်မၞိဟ်တြုံ (၂) တၠ ဟွံဂွံဍိုက်အာကွဳလိုန်ဓာတ်မွဲစွံ ပ္တိတ်လဝ်အမိၚ်ဒေသန္တရရ။
ပ္ဍဲတွဵုရးဍုၚ်မန်ဂှ် မွဲကာလဒပ်ပၞာန်သီအဝဵုဏံ ညံၚ်မၞိဟ်တြုံ (၂) တၠဟွံဂွံဍိုက်အာကွဳလိုန်ဓာတ်မွဲစွံဂှ် ပ္တိတ်လဝ်အမိၚ်ဒေသန္တရ ပ္ဍဲပွိုၚ်ဍုၚ်ကျာ်ထဝ်၊ ၜဳကလေၚ်၊ ပံၚ် ကေုာံပွိုၚ်ဍုၚ်ရေဝ်ရ။
ပရိုၚ် – သြၚ်လောန်တိုၚ်(မ်)
ဗီု -TLT
sanlontai