နေဗျဳဒဝ်၊ အံက်တဝ်ဗာ(၈)
ပ္ဍဲကာလဒပ်ပၞာန်သီအဝဵုပွိုၚ်ၜါသၞာံပြၚ်ဏံ သၞာဲဒဴလ္ပာ်ကံၚ်ဇြဳပၞာန်တံဂှ် ပြံၚ်သၠာဲကေတ်ကၠုၚ်တာလျိုၚ် ပ္ဍဲဒၞါဲမၞိဟ်ဇၞော် ဌာနလ္ပာ်အရာပ်တံ ဂၠိုၚ်ကၠုၚ်ရဂှ် ဂွံတီကေတ် နူညးခါတ်အကာဲပရေၚ်ဍုၚ်ကွာန်တံကဵု ပွဳူဗွိုၚ်ဒပ်ပၞာန်တံရ။
သၞာဲဒဴလ္ပာ်ဒပ်ပၞာန်ဂမၠိုၚ် ပ္ဍဲကာလသီအဝဵုဏံ ပွပြံၚ်သၠာဲကေတ်ကၠုၚ်ဒၞါဲ လ္ပာ်အရာပ်တံ ဂၠိုၚ်တိုန်ကၠုၚ်မံၚ်ရ။
အတိုၚ်လိက်လလောၚ်ကၟိန်ဍုၚ်ဗၟာ လလောၚ်ပ္တိတ်လဝ် ပ္ဍဲဂိတုသေပ်တေမ်ဗာသ္ကုတ်လက္ကရဴ တုဲကၠုၚ်တေံမ္ဂး ပ္ဍဲကဵုဌာနလ္ပာ်အရာပ်ပိဌာနတံဂှ် ပြံၚ်သၠာဲပအပ်ကဵုလဝ်တာလျိုၚ် ကုသၞာဲဒဴကဆံၚ်ဗိုလ်ဇၞော် (၁၀)တၠတံ နဒဒှ်သၞာဲဒဴက္ဍိုက်ပ် ကေုာံ အထံက်မာန်နေဂျာတံဂှ် ဂွံဆဵုကေတ်ရ။
သၞာဲဒဴက္ဍိုက်က္ဍိုပ် ဌာနစၞောန်ပ္ညုၚ်ဂၠံၚ်ကုန် မၞုံသၟဝ်တဲ ဌာနဝန်ဇၞော်ပရေၚ်ပ္လံၚ်ဗ္စိုပ်ကေုာံ ပရေၚ်ဆက်စၠောံဂှ် ၜါတၠ၊ ပ္ဍဲကမၠောန်ပရေၚ်ဆက်စၠောံကၟိန်ဍုၚ်ဗၟာဂှ် အထံက်မာန်နေဂျာမွဲတၠ၊ ပ္ဍဲဌာနပရေၚ်သၠာဲဂတးဗၞိက် ကေုာံ ဌာနက္ဍိုက်က္ဍိုပ်ကေၚ်ကာညးသုၚ်စောဲ မၞုံသၟဝ်တဲ ဌာနဝန်ဇၞော်ပရေၚ်ပိုန်ဒြပ်ကေုာံ ပရေၚ်ကူသာန်သွံရာန်ဂှ် (၅)တၠ မဒှ်ရ။
သ္အာၚ်နူဂှ်ပၠန် ကု(သၞာဲဒဴက္လိဂွံဝပ် တိတ်နူဒပ်) အဳအေ ၜါတၠဂှ်လေဝ် ပ္ဍဲဂိတုအဝ်ဂါတ်ဂှ် ဖျေံကဵုလဝ်တာလျိုၚ် နဒဒှ်သ္ကိုပ်က္ဍိုက်က္ဍိုပ် ပ္ဍဲဌာနက္ဍိုက်က္ဍိုပ် ညးယိုက်ဝန်ပရေၚ်မၞိဟ် မၞုံသၟဝ်တဲ ဌာနဝန်ဇၞော် ညးယိုက်ဝန်ပရေၚ်မၞိဟ်၊ ပရေၚ်ဟံၚ်ပြာ် ကေုာံ ပရေၚ်ကလေၚ်ဖျေံဒၞါဲတံဂှ်ရ။
ကံၚ်ဇြဳပၞာန်တံ ပြံၚ်သၠာဲကဵုကၠုၚ်ဒၞါဲ ကုသၞာဲဒဴဗိုလ်ပၞာန်တံ ပ္ဍဲဌာနလ္ပာ်အရာပ်တံ ဗီုလၟုဟ်ဂှ် နကဵုတၚ်ရန်တၟံနွံနွံ ဖန်ဗဒှ်မံၚ် သၞောတ်ဒပ်ပၞာန်အုပ်ဓလီုမွဲရဂှ် အကြာပ်ဒပ်ဇၞော်ဒပ်ကျာCDM ဇြေယျဂှ် ဟီုကဵုဌာန်ပရိုၚ်သြၚ်လောန်တိုၚ်မ်ရ။
“သီအဝဵုတုဲ အဓိကပဆုဲပြံၚ်မံၚ် သၞာဲဒဴလ္ပာ်ဒပ်ပၞာန်တံ ပ္ဍဲဒၞါဲကဆံၚ်သ္ဇိုၚ်တံဟွံသေၚ်မွဲသာ် ပ္ဍဲကဆံၚ်လ္တူ ပ္ဍဲဌာနဆေၚ်စပ်လ္ပာ်အရာပ်တံဂှ်တှ်ေ၊ ဒးဟီုသောၚ်ၚ်တှ်ေ နကဵုတၚ်ရန်တၟံနွံနွံ သွက်ဂွံထ္မံက်ရုပ်ရဴ သၞောတ်ဍေံတံဖန်ဗဒှ်လဝ်တံဂှ်တုဲ စုတ်လဝ်ရ။ မုဟိုတ်ရောတှ်ေ ကောန်ပၞာန်ကဵုကောန်ပၞာန်ကၠောန်တှ်ေ သာတုဲပြေပြံၚ်ဏောၚ် လညာတ် (Mindset)ဍေံတံရ။ ဖန်ဗဒှ်မံၚ်သၞောတ် ဒပ်ပၞာန်အုပ်ဓလီုအလုံဍုၚ်မွဲရ။ ပ္ဍဲပရေၚ်ပညာဂှ် သွက်ဂွံဒက်ပ္တန် ဝါဒဒပ်ပၞာန်အုပ်ဓလီုဂှ် သၞောတ်ပရေၚ်ပညာဂှ် ဍေံတံ(ဒပ်ပၞာန်) ဖန်ဗဒှ်လဝ်ရ” သာ်ဝွံ သ္ဂးရ။
ပ္ဍဲပရေၚ်ဆုဲပြံၚ် ဌာနလ္ပာ်အရာပ်ကံၚ်ဇြဳပၞာန်တံဂှ် ကဆံၚ်သ္ကိုပ်ဗိုလ်ဇၞော်ဂှ် သ္ကိုပ်စၞောန်ပ္ညုၚ်၊ ကဆံၚ်ဒုသ္ကိုပ်ဗိုလ်ဇၞော်ဂှ် ဒုသ္ကိုပ်စၞောန်ပ္ညုၚ်၊ ကဆံၚ်သ္ကိုပ်ဗိုလ်ဂှ် အထံက်သ္ကိုပ်စၞောန်ပ္ညုၚ်၊ ကဆံၚ်ဗိုလ်ဇၞော်ဂှ် စဵုကဵုသၞာဲဒဴက္ဍိုက်က္ဍိုပ်ဂှ် ကဵုလဝ်ဒၞါဲမဒှ်ရ။
ပ္ဍဲဍုၚ်ဗၟာ သၟဝ်တဲသၞောတ်ပရေၚ်အုပ်ဓုပ် သၞောတ်တၠအဝဵုပၞာန်အဆက်က်ဂှ် သၞာဲဒဴနူလ္ပာ်ပၞာန် နူကဵုဌာနဝန်ဇၞော်ပရေၚ်စဵုဒၞါတံဂှ် ကေတ်ဒၞါဲကဆံၚ်လ္တူတံတုဲ ဒးဒုၚ်ခါန်ကၞက်မံၚ် အလဵုအလဵုဍေံတံရ။
ပ္ဍဲလက်ထက် သမ္မတဥူတုၚ်ဇြုၚ် အလဵုသဳဒဳမိုကရေဇြဳ မံက်က္တဝ်ကၠုၚ် နူသၞောဝ်သ္ဇိုၚ်ဒက်ပ္တန် ၂၀၀၈ ဂှ်လေဝ် လအာတုပ်သာ်ဏံကီု သၞာဲဒဴလ္ပာ်ဒပ်ပၞာန်တံဂှ် အုပ်ဓလီုကၠုၚ်လဝ် ပ္ဍဲဌာနလ္ပာ်အရာပ်တံဏီတုဲ ပ္ဍဲလက်ထက်အလဵုသဳ NLD ဂှ်တှ်ေ ပရေၚ်ပြံၚ်သၠာဲ နူလ္ပာ်ပၞာန်ကဵုလ္ပာ်အရာပ်တံ အောန်စှ်ေအာလဝ်ရ။
ဆ္ဂး ကြဴနူက္ဍိုပ်သ္ကိုပ်ပၞာန် သ္ကိုပ်ပၞာန်ဇၞော်မေန်အံၚ်လှာၚ် သီအဝဵုတုဲဂှ်တှ်ေ သၞာဲဒဴဗိုလ်ပၞာန် ဟွံမိက်ပါလုပ်ပ္ဍဲပေါဲဗ္တိုက်တံ သွက်ဂွံပြံၚ်သၠာဲလ္ပာ်အရာပ်ဂှ် ပွအာတ်ပ္တိုန်ကၠုၚ်နကဵုဟိုတ်နာနာသာ်တံ သာတုဲဂၠိုၚ်ကၠုၚ်နူကၠာတေံရဂှ် ညးလ္ၚတ်သ္ၚဳဂၠိပ်ပရေၚ်ဍုၚ်ကွာန် ဥူတာန်သဵုနာၚ်ဂှ် သ္ၚဳဂၠိပ်လဝ်ရ။
“ကြဴနူမေန်အံၚ်လှာၚ်သီအဝဵုတုဲဂှ်တှ်ေ သာတုဲဂၠိုၚ်ကၠုၚ်ရ။ ဆ္ဂး ဟိုတ်ဂွံဂၠိုၚ်ကၠုၚ်လၟုဟ်ဏံဂှ်တှ်ေ သၞာဲဒဴပၞာန်တံဂှ် ဟွံမိက်ပါလုပ်ပ္ဍဲပေါဲဗ္တိုက်တံကီု၊ ဟွံမိက်ဒုၚ်ဂိတံကီုရ။ ဟိုတ်ဂှ်ရ နကဵုတၚ်ထ္ၜးဟိုတ် ပရေၚ်ထတ်ယုက်နာနာသာ်ဂှ် ညးဆုဲပြံၚ်ကၠုၚ်လ္ပာ်အရာပ်တံ သာတုဲဂၠိုၚ်ကၠုၚ်ရ။ သွက်ဂွံဆုဲပြံၚ်လ္ပာ်အရာပ်ဂှ် ပမာဏသၞာဲဒဴ အာတ်ပ္တိုန်ကၠုၚ် နူပ္ဍဲဒပ်ပၞာန်တံဂှ် ဂၠိုၚ်ကွေံကွေံရ။ နွံမံၚ်စဵုကဵုသၞောတ်ဗ္ၜတ်လဵုရောဂှ် ပိုဲတံဟွံတီရ။ ဆ္ဂး အခိၚ်လၟုဟ်ဂှ် သၞာဲဒဴဗိုလ်ပၞာန်နူကဵုဒပ်တံ ဗ္ဒါဲသီုဖအိုတ်ဂှ် နူဂကောံဒပ်ပရေၚ်ဗ္တိုက်တံ ဂ္စာန်ကၠုၚ်သွက်ဂွံပြံၚ်သၠာဲ လ္ပာ်အရာပ်တံဂှ် ဂၠိုၚ်ကၠုၚ်နူကဵုဂိတုကၠာကၠာတေံ ကဵုဆရ။ စရၚ် နွံဂလိုၚ်လဵုရောဟီုဂှ်တှ်ေ အခေါၚ်ပိုဲတီ ဟွံမွဲရ” သာ်ဝွံ သ္ဂးရ။
နကဵုကံၚ်ဇြဳပၞာန်ဂှ် ကြဴနူသီအဝဵုတုဲ လအ်ဂွံ(၇)ဂိတုဂှ် ကုသ္ကိုပ်ဗိုလ်မွဲတၠ ကေုာံ ဒုသ္ကိုပ်ဗိုလ်မွဲတၠ နူကဵုဌာနဝန်ဇၞော် ပရေၚ်စဵုဒၞါဂှ် စခါန်ကၞက်လဝ် နဒဒှ် ဂအုပ်ဘာကေုာံ သ္ကိုပ်က္ဍိုက်က္ဍိုပ်စၞောန်ပ္ညုၚ် မၞုံသၟဝ်တဲ ဌာနဝန်ဇၞော်ပရေၚ်ပ္လံၚ်ဗ္စိုပ်ကေုာံ ပရေၚ်ဆက်စၠောံတံရ။
ကြဴနူဂှ်တုဲ အတိုၚ်တၚ်ထ္မံက်ထ္မး လိက်လလောၚ်ဍုၚ်ဗၟာဂှ်မ္ဂး သ္ပပ္တံနူ သၞာံဏံမံက်တုဲ စဵုကဵုဂတုဂျောန် ပ္ဍဲပွိုၚ်(၆)ဂိတုဂှ် ကုသၞာဲဒဴလ္ပာ်ပၞာန် (၄၀)ဂှ် ပဆုဲပြံၚ်ပအပ်ကဵုလဝ်တာလျိုၚ် မပ္တံပ္ဍဲတိုက်သြန်ပရေၚ်ပိုန်ဒြပ်ကၟိန်ဍုၚ်ဗၟာ၊ ကဝ်မယှေန်ပေါဲရုဲမာဲ၊ ဂကောံလျိုၚ်ဝန်ကၟိန်ဍုၚ်၊ ဌာနဝန်ဇၞော်ပရေၚ်ပိုန်ဒြပ်ကူသာန်သွံရာန်တံ မဒှ်ရ။
ပဆုဲပြံၚ်ကဵုလဝ်သၞာဲဒဴဒပ်ပၞာန်တံ ပ္ဍဲဌာနလ္ပာ်အရာပ်တံဂှ် ဒှ်ပွထ္မံက်ရုပ်ရဴ ညံၚ်သၞောတ်ဒပ်ပၞာန်အုပ်ဓလီုတံ သ္ဂောံခိုၚ်ကၠိုက်ကၠုၚ်ရဂှ် ညးခါတ်အကာဲတံ သ္ၚဳဂၠိပ်လဝ်ရ။
ပ္ဍဲကံၚ်ဇြဳပၞာန် သ္ကိုပ်ပၞာန်ဇၞော်မေန်အံၚ်လှာၚ်သ္ကိုပ်သ္ကဂှ် ၜိုန်ရစုတ်လဝ်ညးအရာပ်လ္ၚဵုတံကီုလေဝ် ကံၚ်ဇြဳပၞာန်ဏံဂှ် သ္ကိုပ်ဗိုလ်ပၞာန်တံရ ထိၚ်ဒဝ်လဝ်မဒှ်တုဲ ပ္ဍဲဌာနဝန်ဇၞော်တံဂှ်လေဝ် သ္ကိုပ်ဗိုလ်ပၞာန်တံကဵု သ္ကိုပ်ဗိုလ်ပၞာန်ဒေါံဇူတံ ကေတ်လဝ်ဒၞါဲမဒှ်ရ။
ပရိုၚ်-သြၚ်လောန်တိုၚ်မ်
ဗီု-MOI
sanlontai