ထ္မံက်ပ္တိတ်ဟီုဂးလဝ် တၚ်ပၞုက်ဓလုက်က္ၜၚ်ဗၠိုပ်ဍာ် နျူကလဳယျာအမေရိကာန် ဟွံမွဲပုဟ်ဂှ် ထြာပ် ကယျာန်ပါဲ

ဝါယှေန်တာန်၊ အံက်တဝ်ဗာ (၇)

သမ္မတအမေရိကာန်တြေံ ဒဝ်နေဝ်ထြာပ်ဂှ် စပ်ကဵုတၚ်ပၞုက်က္ၜၚ်ဗၠိုပ်ဍာ်နျူကလဳယျာ အမေရိကာန်တုဲ ပရိုၚ်မဟီုဂးဒၟံၚ် ကုသၟာပရေၚ်ပိုန်ဒြပ်အဝ်သတြေလျမွဲတၠဂှ် ပ္ဍဲဂိတုအံက်တဝ်ဗာ (၆) တေံ ကယျာန်ပါဲလဝ်ရ။

ထြာပ်ဝွံ ဟီုဂးလဝ် အပ္ဍဲကဵုပရေၚ်ဆဵုဂဗ ကုသၟာပရေၚ်ပိုန်ဒြပ်ဂှ် ပ္ဍဲကဵုသ္ၚိညး မၞုံဖလဝ်ရဳဒါဂှ်ရောၚ်ဂှ် မဳဒဳယျာဂမၠိုၚ် ထ္မံက်ထ္ၜးဒၟံၚ်အိုတ်ရ။

နိဿဲကေတ် ပရိုၚ်တမ်ရိုဟ် ဟွံမိက်ထ္မံက်ယၟုတံဂှ်တုဲ လိက်ပရိုၚ် The New York Times ဂှ် ညးမဆဵုဂဗလဝ်ကဵု ထြာပ်ဂှ်ဝွံ ဒှ်တၠဓန ဗဳလျာန်ဏာ အာန်တိုဝ်နဳပရာတ် မက္ဍိုက်ဒၟံၚ်က္ဍိုပ် ကုမ္ပဏဳဇၞော်အိုတ် လ္တူဂၠးတိဏံရောၚ်ဂှ် ထ္မံက်ထ္ၜးလဝ်ရ။

ဌာန်ပရိုၚ် ABC News မထ္မံက်ပ္တိတ်လဝ် လၟေၚ်ဒဒှ်ဏံ ကၠာအိုတ်ဂှ်လေဝ် ဗွဲကြဴဏံ ဗဳလျာန်နာ ပရာတ်ဝွံ ပါ်ပရအ်လဝ် တၚ်နၚ်လစှ်ေ ပရူက္ၜၚ်ဗၠိုပ်ဍာ်အမေရိကာန် ပၟိက်ဇၞော်ဂမၠိုၚ် ကုသၞာဲဒဴညးလ္ၚဵုတံကဵု အ္စာပရိုၚ်ဂမၠိုၚ် ပါလုပ်သီုကဵု သၞာဲဒဴဍုၚ်သ္အာၚ် မွဲဒါဇြိန်ပြၚ်ဂှ် ထ္မံက်ထ္ၜးလဝ်ရ။

ဂလာန်ထြာပ် မဟီုပ္တိတ်ဂှ်ဝွံ သ္ကဵုဗဒှ်တဴအန္တရာယ် ကုဒပ်ဍာ်နျူကလဳယျာအမေရိကာန်မာန်ဂှ် ပရိုၚ်တမ်ရိုဟ်တံဏံ ဟီုလဝ်ကဵု လိက်ပရိုၚ်တိုၚ်(မ်) ဂှ်ရ။

သမ္မတတြေံ ထြာပ်ဂှ် ပရိုၚ်ဂမၠိုၚ်ဝွံ ဗၠေတ်မှာတုဲ ဒှ်ဒၟံၚ်သ္ဇက်ဒးဂြိုၚ်စခိုဟ်ဏောၚ်ဂှ် ဂးလဝ် ပ္ဍဲကဵု Truth Social ဇာဇၞိက်ညးအပိုၚ်ဂှ်တုဲ တးပါဲလဝ်ရ။

ညးရေၚ်တၠုၚ်ဂဗုတ်အလဵုအသဳဂမၠိုၚ် ခၞံဗဒှ်လဝ် ပရိုၚ်ဏံ နကဵုတၚ်ရန်တၟံ သွက်ဂွံပလီုပလာ် ဂၠံၚ်တရဴညးမကလေၚ်စဴ သ္ၚိဗုဂှ်ရောၚ်ဂှ် ခၠေဝ်ပလန်ဟီုဂးလဝ်ရ။

ထြာပ်ဝွံ ကြဴနူဒေါအ်ဇူ နူကဵုတာလျိုၚ်သမ္မတတုဲဂှ် ဟိုတ်နူရပ်စပ်ဂိုၚ်ဒေပ်လဝ် တၚ်နၚ်ပၞုက်ဒလုက်ကၟိန်ဍုၚ် ပ္ဍဲကဵုသ္ၚိဒၟံၚ်ညးဂှ်ရ ညးရေၚ်တၠုၚ်ဂဗုတ် အလဵုအသဳကၟိန်ဍုၚ်တံ ဗက်ဂၠိုက်ဂၠါဲစၟဳတ်ဒၟံၚ်ရ။

ပ္ဍဲကဵုပရေၚ်စဳရေၚ်စၟဳတ် လိက်တၞးစၟတ်သမ္တီ ထြာပ်မကေတ်လဝ်ဏံ ပ္ဍဲသၞာံဂတဏံဂှ်လေဝ် ညးရေၚ်တၠုၚ်ဂဗုတ် အလဵုအသဳဂမၠိုၚ် သ္ဇက်ဂွံကော်အာ ပရာတ်နွံဂှ်လေဝ် သ္ဂးလဝ်ရ။

ပရာတ်ဝွံ ပ္ဍဲသၞာံ ၂၀၂၁ ဂိတုဨပရဴတေံ ဆဵုဂဗလဝ်ကဵု ထြာပ် ပ္ဍဲကဵုကလာပ် ဝှာမ်ဗိတ်(ချ်)ညးတုဲ နူကဵုအမေရိကာန် စတုဲ ရာန်က္ၜၚ်ဗၠိုပ်ဍာ်ညး နူကဵုအဝ်သတြေလျတေံထေက်ဂှ် ဒဒှ်ရညးထေၚ်ဂှ် ဟီုဂးလဝ်ကဵု သမ္မတတြေံဂှ်ဂှ် ဌာန်ပရိုၚ် ABC ထ္မံက်ထ္ၜးလဝ်ရ။

အခိၚ်လၟုဟ် ထြာပ်ဝွံ သွက်ဂွံဂွံတၚ်စၟတ်ခိုဟ်ဟ် နူကဵုဗာန်တံကဵု ကမ္မဏဳဒုၚ်လျိုၚ်တံဂှ်တုဲ နကဵုပရေၚ်လီဠာန် ၚုဟ်မးပိုန်ဒြပ်ညးမပိုၚ်ပြဳလဝ်ဂှ် ဒးဒုၚ်စၟဳတ်ဒၟံၚ် ပ္ဍဲနျူယျံက်ရ။

Ref; The Times of Israel/ AFP