ဝါယှေန်တာန်၊ အံက်တဝ်ဗာ(၉)
လ္တူဂကောံရပ်လွဟ်ပါလေဿတိုၚ် ဟာမေတ်သ် ဗတိုက်လဝ် အေဿရေဂှ် ဟိုတ်နူကောန်ဍုၚ်အမေရိကာန်တအ် ဇီုကပိုက် ဒးချိုတ်လဝ်ဂှ်ရ သွက်ဂွံဂလိုၚ်ပ္တိုန်ကဵုအရီုဗၚ် သွက်မဟာမိတ်ညးတအ် ဗလးပ္တိတ်တြးဏာလဝ် က္ၜၚ်ပၞာန် ကေုာံက္ၜၚ်ကျာပၞာန်တအ်ရ။
ပ္ဍဲကဵုပဋိပက္ခက္တဵုဒှ်ဒၟံၚ်လၟုဟ်ဏံ ဒဒှ်ရကောန်ဍုၚ်အမေရိကာန် ဒးချိုတ်လဝ် ဗွဲမဂၠိုၚ်ဂၠိုၚ်ဂှ် သၞာဲဒဴအမေရိကာန်မွဲတၠ ဟီုသ္ပလဝ်ဒ္တန်ကဵု ဌာန်ပရိုၚ်အေပဳတုဲ လၟိဟ်ချိုတ်တ်ပၠိုပတ်တ်ဂှ်မ္ဂး ဟွံတီလဝ်ဏီရဂှ် ဟီုလဝ်ရ။
“ဟိုတ်နူဟာမေတ်တအ် ဓဇန်ကြာန်ဗတိုက်ပ္ကီုပရာပ်လဝ်တုဲ ပိုဲတအ်ဆက်ဒတူလာၚ်အာ မွဲကရောံကဵု ဂကောံသသ္ၚိကၟိန် ညးဍုၚ်ကွာန်အေဿရေတအ် ဒးဆောံလေၚ်လဝ် မၞိဟ်ညးတအ်သ္ဍိုက်ဆာန် မွဲစွံရ” ဂှ် ဓမံက်ထ္ၜးလဝ် ပ္ဍဲတၚ်လလောၚ်တြး ဝန်ဇၞော်ပရေၚ်စဵုဒၞာအမေရိကာန် လွိုက်အဝ်သတေန်ရ။
သွက်ဂွံကလေၚ်ဗတိုက်ပလန်တဲ ပရေၚ်ဂကောံဟာမေတ်သ် ဗတိုက်လဝ်လ္တူအေဿရေဂှ် ကြဴနူသဳကၠဳလဝ်ကဵု သမ္မတဗိုၚ်ဒေန် သောဲသောဲဗြောဲဗြောဲတုဲဂှ် ညံၚ်ကမၠောန်စဵုဒၞာ ပ္ဍဲဒေသဇြဟတ်ဂွံခိုဟ်တိုန်ကၠုၚ် စၞောန်ပ္ညုၚ်လဝ် ဂၠိုၚ်ကဵုကဆံၚ်ရဂှ် ညးဟီုလဝ်ရ။
ဝန်ဇၞော်အဝ်သတေန်ဂှ် ပ္ဍဲပရေၚ်ပရောဏံ ပါဲကောန်ဒပ်ပၞာန်ဍာ် ဗ္ဒာဲ ၅၀၀၀ တုဲ ကဵုလဝ်အမိၚ် က္ၜၚ်ကျာပၞာန်၊ ဒပ်ပၞာန်ဍာ်အမေရိကာန် အရာလဵုဟွံဟီု သွက်ဂွံကလေၚ်ပလန်အာတဲ ဒှ်ဒၟံၚ်ဒတုဲကဵု က္ၜၚ်ပ္ဍိုက်က္ၜၚ်ကျာကဆံၚ်သၠုၚ် တိတ်လကြဴအိုတ်ဏံဂှ် သွက်ဂွံပၠလဝ်ဒပ်ရ။
သ္အာၚ်နူဂှ်ပၠန် က္ၜၚ်ပလီုကမ်ဒရုမ်တအ်ဂှ်လေဝ် အမေရိကာန် ဗလးပ္တိတ်ဏာလဝ် ပ္ဍဲအေဿရေတုဲ သီုကဵုက္ၜၚ်ကျာဒပ်ပၞာန်ကျာတအ်ဂှ် သၠဲတြးစွံအာရောၚ် ဟီုဂးလဝ်ရ။
ဟိုတ်နူပန်ဗတိုက်ကဵုလွဟ်ပၞာန်ကျာ နူဂါဇြာတုဲ သီုၜါလ္ပာ် အပံၚ်မၞိဟ် လ္ၚီပြၚ် ဒးအိုတ်လဝ်လမျီုတုဲ သ္ကိုပ်ဝန်ဇၞော်အေဿရေ နေတာန်ယာဟုဂှ် ပရေၚ်ဒဒှ်ဗတိုက်လဝ်ဏံ ဒဒှ်ရတုပ်သၟဟ်ကဵု အမေရိကာန်ဒးဒုၚ်ဗတိုက်ပ္ကီုပရာပ် ၉/၁၁ ရဂှ် ဟီုလဝ်ရ။
သမ္မတအမေရိကာန်ဂျိုဝ်ဗိုၚ်ဒေန် ကေုာံသ္ကိုပ်ဝန်ဇၞော်နေတာန်ယာဟုတအ်လေဝ် ဒဒှ်ရသဳကၠဳလဝ် သွက်ဂွံကလေၚ်ကော်ကေတ် မၞိဟ်ဒးဒုၚ်ရပ်လဝ် နဒဒှ်ဒၞန်သၟာပ္ကီုပရာပ်ဟာမေတ်သ် ပါလုပ်သီုဂကောံသ္ၚိကၟိန်၊ မၞိဟ်အယုက်ဇၞော်၊ ကောန်ၚာ်သၟတ် ပ္ဍဲကဵုပဋိပက္ခတအ်ရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးရ။
ပ္ဍဲကဵုမွဲအခိၚ်ဓဝ်ဂှ် ကံၚ်ဇြဳဂီုကၠီုကုလသမဂ္ဂလေဝ် ကၠောန်ဗဒှ်လဝ်ကောံဓရီုကာတၟေၚ် ကၟာတ်တြၚ်မွဲတန်တုဲ သွက်ဂွံဟီုဂရိုဟ်ပျုတ်ဗ္ဒေက် “ပရေၚ်ဗတိုက်ပ္ကီုပရာပ်ဓဇန်ကြာန် ဂကောံပၞာန်ဟာမေတ်သ်” ဂှ် ၜိုန်ရအမေရိကာန် အာတ်မိက်လဝ်ကီုလေဝ် သီုကဵုကၟိန်ဍုၚ်လုပ်ဂကောံ (၁၅) ကၟိန်ဍုၚ်ဂှ် ဟွံဂွံဟီုပလန်လဝ်တဲ လွာဲဂှ်ဏီရ။
ပ္ဍဲကဵုတ္ၚဲသ္ၚိသဝ်တုဲကၠုၚ်ဏံ ကြဴနူဂကောံဟာမေတ်သ် ဗတိုက်လဝ် လ္တူအေဿရေတုဲဂှ် နူလ္ပာ်အေဿရေလေဝ် ဟိုတ်နူထပ်ကလေၚ်ဗတိုက်လဝ်ဂှ်ရ အခိၚ်လၟုဟ်ဏံမ္ဂး ပ္ဍဲကဵုအေဿရေ သီုကဵုပါလေဿတိုၚ်ဂှ် မၞိဟ်ဒးချိုတ်လဝ် စဵုကဵု (၁၀၀၀)ပြၚ် ဂၠိုၚ်တိုန်ကၠုၚ်ဒၟံၚ်ရဂှ် ဂွံတီကေတ် အတိုၚ်တၚ်ဂၞၚ် ကုလသမဂ္ဂရ။
Ref: Outlookindia
sanlontai