ဗဂေါ၊ အံက်တဝ်ဗာ (၁၀)
ရးဒေသဇၞော်ဗဂေါ၊ အပ္ဍဲပွိုၚ်ဍုၚ်ဗဂေါဂှ် ဟိုတ်နူဍာ်ဇၞော်ဍာ်ကလိုပ် က္တဵုဒှ်ဒၟံၚ်ဂှ်ရ စနူဂိတုအံက်တဝ်ဗာ (၉) တုဲ လၟေၚ်တရဴ မတ်မလီု−လ္ဂုၚ်တံဂှ် ဒေါအ်ဇူအာ ပရေၚ်ဓဇက်ဂြိပ်ယာယဳရောၚ် ဂွံတီကေတ် ဇရေၚ်ညးတာလျိုၚ် သၞေဟ်ကွဳပၟတ်မတ်မလီုရ။
စနူဂိတုအံက်တဝ်ဗာ (၈) တုဲကၠုၚ်တေံတုဲ ဗြဲဂူ ဗွဲမသ္ကာတ်မြဟ်ဂှ်ကဵု ဟိုတ်နူဖံက်ပ္တိတ်လဝ် ဍာ်ကၟိုန်တံဂှ်ရ အပ္ဍဲပွိုၚ်ဍုၚ်ဗဂေါ ဍာ်ဇၞော်ဍာ်ကလိုပ်တံကဵု ဂၠံၚ်ကွဳပၟတ်ဍာ်ကၠောံတံ က္တဵုဒှ်ဒၟံၚ်ရ။
ဟိုတ်နူဍာ်ဇၞော်တုဲ လၟေၚ်တရဴကွဳပၟတ် လ္ဂုၚ်−မတ်မလီု လ္ပာ်တိုန် စၟတ် (၈၁) တိတ်နူကဵုသၞေဟ်ကွဳပၟတ်လ္ဂုၚ် အာသၞေဟ်ကွဳပၟတ်မတ်မလီုတံဂှ်ကဵု လၟေၚ်တရဴကွဳပၟတ် မတ်မလီု−လ္ဂုၚ် လ္ပာ်စှ်ေ စၟတ် (၈၂) နူကဵုသၞေဟ်ကွဳပၟတ်မတ်မလီု မတိတ်အာ သၞေဟ်ကွဳပၟတ်လ္ဂုၚ်ဂှ် ဒးပလီုလဝ်ယာယဳရ။
ဟိုတ်ဂှ်ရ နကဵုညးအာတရဴ မရာန်ကေတ်လဝ် စၟတ်တဲကွဳပၟတ်ဂမၠိုၚ် ကၠုၚ်စိုပ်ပ္တိတ် ၚုဟ်စၟတ်တဲ ပ္ဍဲသၞေဟ်ကွဳပၟတ်မတ်မလီု နူဂယး ၇ နာဍဳ စဵုကဵု ၁၀ နာဍဳမာန်ဂှ် ညးတာလျိုၚ် သၞေဟ်ကွဳပၟတ်မတ်မလီုမွဲတၠ ဟီုရ။
ပရေၚ်ဓရိပ်ပလံၚ် လၟေၚ်တရဴကွဳပၟတ် မတ်မလီု−လ္ဂုၚ်ဂှ် ၜိုန်ရဒေါအ်လဝ်ယာယဳကီုလေဝ် တ္ၚဲလၟေၚ်တရဴကွဳပၟတ် ကလေၚ်ဓဇက်ဂြိပ်ပၠန်ဂှ် လလောၚ်တြးကဵုအာဏောၚ် သ္ဂးလဝ်ရ။
အခိၚ်လၟုဟ်ဂှ်လေဝ် နူကဵုဂၠံၚ်ဖယျာကျဳ ဂၠံၚ်ကွဳစက်လ္ဂုၚ်−မတ်မလီု စဵုကဵုဒၞါဲကံက်အခေါန်လုပ်ဍုၚ် ဂၠံၚ်ဇၞော် (၃၉) မိုၚ် ဗဝ်နာတ်ကျဳဂှ် ဍာ်ကၠောံဒၟံၚ်ဂှ်ရ ယာန်ကွဳစက်ဍောတ်တ်တံ တတ်ကၠောံအာကၠုၚ်ဟွံဂွံပုဟ်ဂှ် ဂွံတီကေတ် အတိုၚ်ဂလာန်ညးအာတရဴတံရ။
ဟိုတ်နူပရေၚ်ဍာ်ဇၞော်ဗဂေါဂှ်တုဲ မၞိဟ်မွဲဠက်ပြၚ်ဂှ် ဒးဆုဲပြံၚ်လဝ်ကာတၟေၚ်တုဲ ကမၠောန်ရီုဗၚ်ဟံၚ်ပြာ်တံ ဒးဆက်ကၠောန်ဒၟံၚ်ရောၚ် ဂကောံရီုဗၚ်ဟံၚ်ပြာ်ပရေၚ်မၞိဟ်တံ ဟီုဂးလဝ်ရ။
ပရိုၚ်−သြၚ်လောန်တိုၚ်(မ်)
ဗီု− Social Media
sanlontai