ပ္ဍဲအရာဗပဵုပ္တိုန်စရိတ်ကမၠောန် သြန်ဂိတုတံဂှ် ဟိုတ်နူသုၚ်စောဲလဝ် ဝေါဟာသြန်ထံက်ပၚ်အပဵုတုဲ ပရေၚ်ယှုက်ထုဲတံက္တဵုဒှ်မံၚ်

လ္ဂုၚ်၊ အံက်တဝ်ဗာ(၁၀)

ကံၚ်ဇြဳပၞာန်ဂှ် ပ္ဍဲအရာဗပဵုပ္တိုန်စရိတ်ကမၠောန် ကောန်ကမၠောန်တ္ၚဲတံဂှ် ဟိုတ်နူသုၚ်စောဲလဝ်ဝေါဟာ သြန်ထံက်ပၚ်အပဵုဂှ်ရ ပ္ဍဲအရာတၟော် စရိတ်အခိၚ်အပဵုတံဂှ် အကြာတၠကမၠောန်ကဵု ကောန်ကမၠောန်တံဂှ် ပရေၚ်ယှုက်ထုဲတံ က္တဵုဒှ်မံၚ်ရဂှ် ညးရီုဗၚ်ကဵုမံၚ် ပရေၚ်ကောန်ကမၠောန်တံ ဟီုကဵုဌာန်ပရိုၚ်သြၚ်လောန်တိုၚ်မ်ရ။

ကဝ်မတဳကောန်ဂကူ စပ်ကဵုပရေၚ်စၟတ်စရိတ်ကလောန်သဝ်အိုတ် သၟဝ်တဲကံၚ်ဇြဳပၞာန်ဂှ် စရိတ်ကမၠောန် ကောန်ကလောန်တ္ၚဲ မၞုံပ္ဍဲဂကောံတံကဵု ဌာနအလဵုအသဳတံဂှ် သွက်မွဲတ္ၚဲပွိုၚ်(၈)နာဍဳဂှ် မ္ၚးနူ(၄၈၀၀)ဒ္ကေဝ် စၟတ်လဝ်ပြဟ်ဟ်ဏံဂှ် ကဵုအခေါၚ်ဒုၚ်စသိုၚ် သြန်ထံက်ပၚ်အပဵု (၁၀၀၀)ဒ္ကေဝ်ပၠန်ရဂှ် ပ္ဍဲဂိတုအံက်တဝ်ဗာ စၟတ်တ္ၚဲ(၅) တုဲကၠုၚ်တေံဂှ် လလောၚ်ပ္တိတ်လဝ်ရ။

သ္အာၚ်နူဂှ်ပၠန် ကုကောန်ကလောန် ကၠောန်မံၚ်ပ္ဍဲရုၚ်စက် CMP ကေုာံ ရုင်ကမၠောန်တံဂှ်လေဝ် သ္ပပ္တံနူ ဂိတုအံက်တဝ်ဗာ စၟတ်တ္ၚဲ(၁)ဂှ်တုဲ မ္ၚးနူစရိတ်ကလောန်သဝ်အိုတ် သွက်အခိၚ်ကမၠောန် (၈)နာဍဳ စၟတ်လဝ် (၄၈၀၀)ဒ္ကေဝ်ဂှ် ကဵုအခေါၚ်ဒုၚ်စသိုၚ် သြန်ထံက်ပၚ်အပဵု (၁၀၀၀)ဒ္ကေဝ်ပၠန်ရဂှ် သ္ဂးလဝ်ရ။

ဟိုတ်နူကံၚ်ဇြဳပၞာန် သုၚ်စောဲလဝ်ဝေါဟာ သြန်ထံက်ပၚ်အပဵုဂှ်ရ ပ္ဍဲအရာပသောၚ်စရိတ်ကမၠောန်အခိၚ်အပဵုတံဂှ် အကြာတၠကမၠောန်တံကဵု ကောန်ကမၠောန်တံဂှ် ပြဿနာတံ က္တဵုဒှ်မံၚ်တုဲ သြန်ဂိတုသဝ်အိုတ် ကောန်ကမၠောန်တံ အာတ်မိက်လဝ်ဂှ် ဟွံဗပဵုပ္တိုန်ကဵုမွဲသာ် ဟိုတ်နူကဵုသြန်ထံက်ပၚ် (၁၀၀၀)ဒ္ကေဝ်ဓဝ်ဂှ်ရ သ္ကဵုဒှ်ကၠေံ ပွယှုက်ထုဲတံရဂှ် ညးရီုဗၚ်ကဵုမံၚ် ပရေၚ်သၟာကမၠောန်မွဲတၠဂှ် ဟီုရ။

“ပ္ဍဲတၚ်လလောၚ်တြးဍေံတံဂှ် သုၚ်စောဲလဝ်ဝေါဟာ သြန်ထံက်ပၚ်အပဵုရ။ ဟိုတ်နူသုၚ်စောဲလဝ် ဝေါဟာသြန်ထံက်ပၚ်ဂှ်ရ ဍေံဂှ် သြန်ဂိတုသ္ဇိုၚ်ဟွံသေၚ်မွဲသာ် ပ္ဍဲကောန်ကမၠောန်တံဂှ် မုပြဿနာနွံအာမာန်ရောတှ်ေ ပ္ဍဲအခိၚ် ပသောၚ်ကိစ္စ OT တံဂှ် ကိစ္စတၠကမၠောန်တံ ပသောၚ်ကဵု(၄၈၀၀)တံ ဒှ်ကၠုၚ်မာန်ရ။ ပိုဲတံဂှ် အခိၚ်စၞောန်ပျးလဝ် စရိတ်ကမၠောန် သြန်ဂိတုသဝ်အိုတ်တေံဂှ် ၚုဟ်ဒဝ်ဠာဂှ် (၁၃၅၀)။ ဂှ်တှ်ေ ၚုဟ်ဖျာတ္ၚဲဏံဂှ်လေဝ် က္ဍၚ်မံၚ်။ စရိတ်မံၚ်စံၚ်မၞိဟ်တံဂှ်လေဝ် သၠုၚ်တိုန်မံၚ်ဂှ်ရ ပိုဲတံဂှ် နကဵုၚုဟ်တိုက်သြန်ဗဟဵုစၟတ်လဝ်တ္ၚဲဏံဂှ် ပၟဝ်ကဵု(၃ဒဿမ၅)ဒဝ်ဠာတှ်ေ (၇၄၀၀)ရ။ သွက်ဂွံကဵု (၇၅၀၀)ဂှ် ပိုဲတံအာတ်မိက်လဝ်ရ။ အေဂှ် လၟုဟ်ဂှ် စရိတ်ထံက်ပၚ်(၁၀၀၀)ဒ္ကေဝ် သ္ဂးတုဲ ဒှ်အာဗီုပြၚ် ကၠောန်ထောံကိစ္စဟွံသောၚ်တံရ” သာ်ဝွံ သ္ဂးရ။

သ္အာၚ်နူဂှ်ပၠန် ကၠာတေံဂှ် ပ္ဍဲအရာစၟတ် ၚုဟ်နှေုန်စရိတ်ကမၠောန်သဝ်အိုတ်တံဂှ် တၠကမၠောန်၊ ကောန်ကမၠောန် ကေုာံ အလဵုသဳတံ ဆေၚ်မုက်တုဲမှ စၟတ်လဝ်ကီုလေဝ် ပြဟ်ဟ်ဏံဂှ် ပရေၚ်သဳကၠဳတံလေဝ်ဟွံမွဲတုဲ ဟိုတ်နူဟွံမိက်ကဵု စရိတ်ကမၠောန်အာတ်မိက်လဝ်ဂှ်ရ နကဵုက္ဍိုပ်စရိတ်ထံက်ပၚ်ဗီုလၟုဟ်ဂှ် ဂတးမွဲလ္ပာ်တုဲ ကၠောန်သ္ပလဝ်ရဂှ် ညးဆက်ဟီုရ။

ညးချဳဒရာၚ် ကတိုၚ်ကၟိုဟ်ပရေၚ်သၟာကမၠောန်မွဲတၠဂှ်လေဝ် ဗပဵုကဵုစရိတ်ကမၠောန်သြန်ဂိတုရဂှ် ဟွံလလောၚ်တြးဗွဲမလုပ်သၞောဝ်မွဲသာ် လလောၚ်ပ္တိတ်လဝ်နကဵုဗီုပြၚ် ဖျေံလာဘ်ဗ္ဇဴဂှ် ဒှ်ဟွံထေက်တုဲ (၁၀၀၀)ဒ္ကေဝ် ဗပဵုပ္တိုန်ကဵုလဝ်ဂှ်လေဝ် ကဵုၚုဟ်ဖျာက္တဵုဒှ်မံၚ်လၟုဟ်ဏံဂှ် ရုမ်ဂပ်အာဟွံသေၚ်ပုဟ်ဂှ် ဟီုရ။

“ဇေတ်တ်ဂှ်တှ်ေ ဒးလလောၚ်ပ္တိတ်ဗွဲမလုပ်သၞောဝ်ထေက်ဏောၚ်။ စရိတ်ကမၠောန်သြန်ဂိတုလၟေၚ်ဍာံ ပဵုမုစိရောဂှ်လေဝ် ဒးလလောၚ်ပ္တိတ်ဗွဲမလုပ်သၞောဝ်ဏောၚ်။ ဟွံလလောၚ်ပ္တိတ်မွဲသာ် အာနကဵုဗီုပြၚ် သြန်လာဘ်အပဵုဏောၚ်တှ်ေ ဟွံဒှ်လၟေၚ်ဍာံရ။ အခိၚ်ကော်ကောန်ကမၠောန်တံဂှ် ဒၞါဲဒးကၠောန်ကဵုဗွဲမလုပ်သၞောဝ် နူကဵုလိက်ကသုက်တံဂှ် စရိတ်ကမၠောန်သြန်ဂိတုဂှ် ဒၞါဲဒးအာကဵု ဥပဒေသၟာကမၠောန်တံတိုက်ရိုက်ဂှ် ဍေံတံဟွံအာမွဲသာ် ကၠောန်နကဵုဗီုပြၚ် ဖျေံလာဘ်ကဵုကောန်ကမၠောန်တံဂှ် ဍာံဍာံဂှ် ဒှ်ဟွံထေက်ပုဟ်လေဝ်။ ဍေံဂှ် ၜိုတ်ကဵုထောံ(၁၀၀၀)ရ၊ ကဵုၚုဟ်ဖျာက္တဵုဒှ်မံၚ်လၟုဟ်ဂှ် ဗီုလဵုမှလေဝ် ရီုဂပ်ဟွံသေၚ်ပုဟ်။ သြန်ဂိတုသ္ဇိုၚ်သွက်ကောန်ကမၠောန်တံဂှ် အောန်အိုတ် ဒှ်ၜိုတ်(၁၀၀၀၀)ဏောၚ်တှ်ေ ဍေံတံလေဝ် ဒတူလိုၚ်ဂွံရ။ ပမာဏသြန် ဗပဵုပ္တိုန်ဏံဂှ် ဗပဵုပ္တိုန်မုစိကဵုဒှ် ယဝ်ရထိၚ်ၚုဟ်ဖျာမွဲလ္ပာ်တေံ ဟွံမာန်မ္ဂး မုဟွံတၟေၚ်ပုဟ်” သာ်ဝွံ သ္ဂးရ။

သ္အာၚ်နူဂှ်ပၠန် တၚ်လလောၚ်တြးကံၚ်ဇြဳပၞာန် လလောၚ်တြးလဝ်ပြဟ်ဟ်ဏံဂှ် ပွသောၚ်ကၠးတံဟွံမွဲမွဲသာ် ဟိုတ်နူသုၚ်စောဲလဝ် သြန်ထံက်ပၚ်အပဵုရဂှ်ရ ပရေၚ်ကယာန်ဓဝါန် အကြာတၠကမၠောန်ကဵုကောန်ကမၠောန်တံ ဒးက္တဵုဒှ်မံၚ်ရဂှ် သ္ဂးရ။

နကဵုကံၚ်ဇြဳပၞာန်တံဂှ် နှေုန်သြန်ဂိတုသ္ဇိုၚ်ကဵု စရိတ်ထံက်ပၚ်တံဂှ် သွက်ဂွံလးထ္ၜးကဵု ကောန်ကမၠောန်တ္ၚဲတံ ဗွဲမတၞဟ်ခြာဂှ် နွံပၟိက်တုဲ လးထ္ၜးမှဟေၚ် အကြာကောန်ကမၠောန်တံကဵု တၠကမၠောန်တံဂှ် ပရေၚ်ကယာန်ဓဝါန်တံ ဟွံက္တဵုဒှ်ကၠုၚ်ရဂှ် ညးရီုဗၚ်ကဵုမံၚ် ပရေၚ်သၟာကမၠောန်တံ ဟီုရ။

ပ္ဍဲဍုၚ်ဗၟာဂှ် ပ္ဍဲသၞာံ ၂၀၁၃ ဂှ်စၞောန်ပျးလဝ် စရိတ်ကမၠောန်အောန်အိုတ်တံတုဲ ကြဴနူဂှ် ပ္ဍဲသၞာံ ၂၀၁၈၊ ဂိတုမေ ပ္ဍဲလက်ထက်အလဵုသဳ NLD ဒဝ်အံၚ်သာန်သုကျဳ သ္ကိုပ်သ္ကဂှ် ၚုဟ်နှေုန်စရိတ်ကမၠောန်အောန်အိုတ်ဂှ် စၟတ်လဝ် မွဲတ္ၚဲ ၄၈၀၀ ဒ္ကေဝ်ရ။

လ္ဂောံကဵုဥပဒေစရိတ်ကမၠောန်အောန်အိုတ်ဂှ်မ္ဂး သွက်ဂွံပလေဝ်စရိတ်ကမၠောန်သဝ်အိုတ်ဂှ် ၜါသၞာံမွဲအလန် သွက်ဂွံပလေဝ်ပလေတ်ဂှ် စၞောန်ပျးလဝ်ကီုလေဝ် ဟိုတ်နူယဲကပ်ကိုဝေတ် ကေုာံ ပရေၚ်ပၞာန်သီအဝဵုတံတုဲ စဵုကဵုအခိၚ်တ္ၚဲဏံဂှ် ပလေဝ်ပလေတ်ဟွံမာန်ဏီတုဲ လ္တူဂွံမံၚ် မွဲတ္ၚဲ (၄၈၀၀)ပွိုၚ်(၅)သၞာံဂှ် ကံၚ်ဇြဳပၞာန်ဂှ် ဗပဵုပ္တိုန်ကဵုလဝ် စရိတ်ထံက်ပၚ်အပဵု (၁၀၀၀)ဒ္ကေဝ်ရ။

စၞးစရိတ်ကမၠောန်သြန်ဂိတုဂှ် ၜိုန်ရကံၚ်ဇြဳပၞာန် ဗပဵုကဵုလဝ် သြန်ထံက်ပၚ်(၁၀၀၀)ဒ္ကေဝ်ကီုလေဝ် ကောန်ကမၠောန် မၞိဟ်ကဆံၚ်သ္ဇိုၚ်တံ ဒးဒုၚ်စသိုၚ်မံၚ် ဘဲဒဏ်ၚုဟ်ဖျာက္ဍၚ်တံ ဗွဲမဇၞော်ကဵုဇြဟတ်ရ။

ဂအုပ်ဂကောံသမဂ္ဂ ညဳသၟဟ်ကောံကဠောံမံၚ်ဂမၠိုၚ်(STUM)ဂှ်တှ်ေ သွက်ကောန်ကမၠောန် ကၠောန်မံၚ်ကလောန် ပ္ဍဲရုၚ်စက်၊ရုၚ်ကမၠောန် ပ္ဍဲဍုၚ်တံဂှ် သွက်ဂွံသၠုၚ်ပ္တိုန်ကဵု စရိတ်ကမၠောန်အောန်အိုတ် မွဲတ္ၚဲ စဵုကဵု (၁၀၀၀၀)ဒ္ကေဝ်ဂှ် ပ္ဍဲတ္ၚဲသၟာကမၠောန်ဂၠးကဝ် ကၠုၚ်စိုပ်လဝ် ပ္ဍဲဂိတုမေ စၟတ်တ္ၚဲ(၁) သၞာံတုဲကၠုၚ်တေံဂှ် အာတ်မိက်လဝ်ရ။

ပရိုၚ်-သြၚ်လောန်တိုၚ်မ်

ဗီု-Social Media