ပ္ဍဲညံၚ်လေဝ်ပေန် ဟိုတ်နူလွဟ်ဇၞော်ဒတုံစှ်ေတုဲ ကောန်အရာပ်မွဲတၠ ချိုတ်တုဲ ၆ တၠ ကလိဂွံဝပ်

ညံၚ်လေဝ်ပေန်၊ အံက်တဝ်ဗာ (၁၀)

ပ္ဍဲခရိုၚ်ညံၚ်လေဝ်ပေန် ဒပ်မဟာ (၃) ဗော်သွးကောန်ဂကူကရေၚ် KNU ဂှ် အပ္ဍဲဂိတုအံက်တဝ်ဗာ သတ္တာဟပထမဂှ် ဟိုတ်နူပရေၚ်ပန်ပှော်လွဟ်ဇၞော် ဒပ်ကံၚ်ဇြဳပၞာန်တုဲ ကောန်အရာပ်မွဲတၠ ချိုတ်တုဲ ၆ တၠ ကလိဂွံလဝ်ဝပ်ရောၚ် KNU လလောၚ်ပ္တိတ်လဝ်ရ။

တုဲကၠုၚ်ပ္ဍဲဂိတုအံက်တဝ်ဗာ (၆) တေံ ဒပ်ကံၚ်ဇြဳပၞာန် မဖျေံလဝ်ဒပ် ပ္ဍဲကဵုပွိုၚ်ဍုၚ်ကျံက်ကျဳ KNU ဂှ် ဟိုတ်နူပန်ပှော်လဝ် လွဟ်ဇၞော် (၃) မဂှ်ရ ဒတုံဗ္တိုဟ်ထ္ကးအာလဝ် ပ္ဍဲကွာန်ဒံၚ်ခေန်တုဲ ညးဗြဴအာယုက် (၅၀) မွဲတၠ ဇီုကပိုက်ကလိဂွံလဝ်ဝပ်တုဲ သ္ၚိဒၟံၚ်မွဲမလေဝ် ဇီုကပိုက်လီုလာ်အာလဝ်ရ။

ပ္ဍဲဂိတုအံက်တဝ်ဗာ (၄) တေံဂှ်လေဝ် ပ္ဍဲပွိုၚ်ဍုၚ် KNU ဂှ် ဟိုတ်နူပရေၚ်ပန်ပှော်လွဟ်ဇၞော် ဒပ်ကံၚ်ဇြဳပၞာန်တံတုဲ ညးဗြဴဒေသမွဲတၠ နူကဵုကွာန်ဗၟာ(ငတိုးခင်)ဂှ် ချိုတ်လဝ်တုဲ မၞိဟ်ဗြဴမွဲတၠ ဇီုကပိုက်ကလိဂွံလဝ်ဝပ်ရ။

ပ္ဍဲကဵုတ္ၚဲဂှ်ရ ပ္ဍဲကဵုပွိုၚ်ဍုၚ်ယှိုဲကျေန် KNU ဂှ်လေဝ် ဟိုတ်နူပရေၚ်ပန်ပှော်လွဟ်ဇၞော် ဒပ်ကံၚ်ဇြဳပၞာန်တုဲ မိနော်ဗျု အာယုက် (၇၀) သၞာံမွဲတၠကဵု ညးဗြဴမွဲတၠ ဇီုကပိုက်ကလိဂွံလဝ်ဝပ်ရောၚ် KNU လလောၚ်ပ္တိတ်လဝ်ရ။

သ္အာၚ်နူဂှ်ပၠန် တုဲကၠုၚ် ပ္ဍဲဂိတုအံက်တဝ်ဗာ (၂) ဇိုၚ်သဝ်တ္ၚဲတေံဂှ်လေဝ် ဟိုတ်နူပရေၚ်ပန်ပှော်လွဟ်ဇၞော် ဒပ်ကံၚ်ဇြဳပၞာန် မဖျေံလဝ်သ္ဇိုၚ် ပ္ဍဲကွာန်ယှိုဲဝါ၊ ပွိုၚ်ဍုၚ်မုၚ် KNU တံဂှ်တုဲ ဒတုံဗ္တိုဟ်ထ္ကးအာလဝ် ပ္ဍဲကွာန် (ငတိုးခင်) တုဲ ကောန်ၚာ် အာယုက် ၉ သၞာံမွဲတၠကဵု မၞိဟ်တြုံမွဲတၠ ဇီုကပိုက်ကလိဂွံလဝ်ဝပ်ရောၚ် ပါလုပ် ပ္ဍဲတၚ်လလောၚ်တြးဂှ်ရ။

ဟိုတ်နူပရေၚ်ပန်ပှော်လွဟ်ဇၞော် ဒပ်ကံၚ်ဇြဳပၞာန် အပ္ဍဲကွာန်ဂမၠိုၚ် နကဵုတၚ်ရန်တၟံနွံနွံဂှ်ရ ညးဍုၚ်ကွာန်မၞုံအပ္ဍဲတိဍာ်အုပ်ဓုပ် KNU ဂမၠိုၚ်ဝွံ လၟေၚ်ဒဒှ်တ္ၚဲ ဇီုကပိုက်ချိုတ်ဂျိုၚ်တံ၊ သ္ၚိဌာန်လီုလာ်ဆောံလေၚ်တံဂှ် ဒးဂဗဒၟံၚ်တုဲ ဒးမံၚ်တန်တဴဒၟံၚ် ဖေက်က်လကိုတ်တ်ရောၚ်ဂှ် ဂွံတီကေတ် အတိုၚ်တၚ်လလောၚ်တြး KNU ရ။

အတိုၚ်လိက်စံၚ် ဇာဇၞိက်အထံက်အရီုပရေၚ်ၜိုဟ်လမ်ကရေၚ် KPSN မလလောၚ်ပ္တိတ်လဝ်ဂှ်မ္ဂး အပ္ဍဲကာလဒပ်ပၞာန်သီအဝဵု ပွိုၚ်ၜါသၞာံပြၚ်ဏံ ပ္ဍဲခရိုၚ်ညံၚ်လေဝ်ပေန် KNU တိဍာ်ဒပ်မဟာ (၃) ဂှ် ဟိုတ်နူပရေၚ်ပန်ပှော်လွဟ်ဇၞော် ဒပ်ကံၚ်ဇြဳပၞာန်တုဲ ကောန်အရာပ် (၁၄) တၠ ချိုတ်အာလဝ်တုဲ ဗ္ဒါဲ (၇၀) တၠ ဇီုကပိုက်ကလိဂွံလဝ်ဝပ်တုဲ ဟိုတ်နူပရေၚ်ဝးပ္ကဝ်အခေါၚ်အရာမၞိဟ်တံကဵု ပရေၚ်ထ္ပက်ပၞာန် ဒပ်ကံၚ်ဇြဳပၞာန်တံတုဲ ကောန်အရာပ် (၂) ကိုဋ်ပြၚ် ဒးဂြိပ်ဒဴပါဲဒလေတ်လဝ်ဂှ် ဂွံတီကေတ်ရ။

ပရိုၚ်−သြၚ်လောန်တိုၚ်(မ်)

ဗီု−KNU