လ္ဂုၚ်၊ အံက်တဝ်ဗာ (၁၀)
ပ္ဍဲကဵုအကာဲအရာ ကဵုပၟတ်ဓာတ်လလဳ ကုအလုံဍုၚ်မွဲ မှာန်န်ဟွံမာန်ဂှ် က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် ဟီုဂးကၠုၚ် သွက်ကဵုကၠောန်ၜိုတ် ပရေၚ်ဒစးဒုၚ်ပလေဝ်ပလေတ် သွက်ဂွံရပ်စပ်ဇြဟတ်ဓာတ်လလဳ ပ္ဍဲကဵုပရေၚ်ပလံၚ်ဗစိုပ်ကွဳပၟတ်တံဂှ်ရ။
တုဲကၠုၚ် ပ္ဍဲဂိတုအံက်တဝ်ဗာ (၇) တေံ အခိၚ်အာစိုပ်စၟဳတ်လဝ် ရုၚ်ပလေဝ်စက်ဒဳဇြေဝ်၊ ရုၚ်ပလေဝ်ကွဳပၟတ်၊ ရုၚ်ကမၠောန်သိၚ်ဗိုၚ်ဒဒန်တံ ကေုာံ ရုၚ်ယန္တယာ မၞုံပ္ဍဲသၞေဟ်ကွဳပၟတ်(မလွှကုန်း) ဂှ် က္ဍိုပ်သ္ကိုပ်ပၞာန် ဟီုဂးလဝ်ရ။
က္ဍိုပ်သ္ကိုပ်ပၞာန်ဂှ် သွက်ဂွံထ္မံက်ရုပ်ရဴ သၞောတ်ပလံၚ်ဗစိုပ်ကွဳပၟတ် ဂတာပ်ခေတ်ဂှ် နွံပၟိက်ဒးကၠောန်ပ္တိတ် စက်ကွဳပၟတ် စကာဓာတ်လလဳတံမာန်ဂှ်တုဲ ပရေၚ်ပလံၚ်ဗစိုပ်ကွဳပၟတ်ဂှ် ပြံၚ်လှာဲရပ်စပ်ဓာတ်လလဳတုဲ သွက်ဂွံဓရိပ်မာန် ပွမဒစးဒုၚ်ပလေဝ်ပလေတ်တံဂှ် နွံပၟိက်ဒးရေၚ်တၠုၚ်အာရောၚ်ဂှ် သ္ဂးရ။
ညးဍုၚ်ကွာန်ကောန်အရာပ် ညးဗြဴမွဲတၠဂှ် ကၟိန်ဍုၚ်ဝွံ အကြာအကာဲအရာမပရေံစှ်ေကၠုၚ်ဒၟံၚ် ဇဳဒိုဟ်ဂှ် ပၟတ်ဓာတ်လလဳရဂှ် ညံၚ်ဂွံမှာန်ကဵုဟွံမာန်မွဲသာ် ဓရိပ်ပလံၚ်ကွဳပၟတ်ဓာတ်လလဳဏောၚ်ဟီုဂှ် သ္ဇက်ဒးဂြိုၚ်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ဍုၚ်ဂှ် အကြာလီုလာ်အကာဲအရာပရေံစှ်ေကၠုၚ်ဒၟံၚ် ဇဳဒိုဟ်ဂှ် ပၟတ်ကၠုၚ်ဟွံမှာန်ဂှ်လေဝ် ပရေံကွေံကွေံရ။ ပၟတ်ဓာတ်လလဳရဂှ် ညံၚ်ဂွံမှာန် ကဵုဟွံမာန်မွဲသာ် ကွဳပၟတ်ဓာတ်လလဳဟီုဂှ် ဒှ်အရာသ္ဇက်ဒးဂြိုၚ်မွဲရ။ မုဒှ်ရောဟီုတှ်ေ နကဵုညးဍုၚ်ကွာန်မွဲဂှ် ဓဝ်ပတှ်ေဟွံမွဲပုဟ်။ ပတှ်ေလေဝ် ဟွံပတှ်ေပုဟ်။ တုဲပၠန် က္ဍိုပ်သ္ကိုပ်ပၞာန် မေန်အံၚ်လှာၚ်ဟီုဂှ်လေဝ် ညာတ်လဝ် ညံၚ်ကဵုပရအ်မွဲရဏောၚ်” သာ်ဝွံ သ္ဂးရ။
ကြဴနူဒပ်ပၞာန်သီအဝဵုတုဲ ပၟတ်ဓာတ်လလဳကၟိန်ဍုၚ်ပိုၚ်ဂှ်ဝွံ ဟွံဂွံအခိၚ်ပေၚ်ၚ်ရတုဲ ကလိဂွံဒၟံၚ် နကဵုသၞောတ်ဒးအလန်သၟးရတုဲ အခိၚ်သီအဝဵုလောန်ကၠုၚ်ၜါသၞာံဘာ်ပြၚ်ဂှ် မွဲတ္ၚဲတုဲမွဲတ္ၚဲ ပၟတ်ဓာတ်လလဳပိုတ်ပၠိုတ်တံ ပရေံကၠုၚ်ဒၟံၚ်ရ။
အကာဲအရာဏံဂှ် က္ဍိုပ်သ္ကိုပ်ပၞာန်ဂှ် သွက်ဂွံဓရိပ်ကွဳစက်ဓာတ်လလဳ၊ ကွဳပၟတ်ဓာတ်လလဳ ပ္ဍဲပရေၚ်ပလံၚ်ဗစိုပ်တံဂှ် လေပ်ဟီုဂး ပ္ဍဲကဵုကောံဓရီုတံလၟိုန်တုဲ ယဝ်ရကဵုပၟတ်ဓာတ်လလဳမှာန်န်ဟွံမာန်မ္ဂး ဒှ်ဒၟါနူကိုန်စဳမာန် (မြစ်ဆုံ) ဒေါအ်အာလဝ်ရောၚ် ပ္တိုန်ဒၟံၚ်ဒုဟ်ရ။
တၠကမၠောန် SME မွဲတၠဂှ်လေဝ် ပ္ဍဲကဵုဘဝပရေၚ်မၞိဟ်ဓမ္မတာဏံရဂှ် သွက်ဂွံကဵုပၟတ်ဓာတ်လလဳမှာန်န်မာန် အခိၚ်တၟာလှ်ေဒၟံၚ်ဂှ် ကၠောန်သ္ပ သွက်ဂွံဓရိပ်ကွဳပၟတ်ဓာတ်လလဳဟီုဂှ် ဒှ်ဟွံမာန်ပုဟ်ဂှ် ကဵုလဝ်တၚ်စၟတ်ရ။
“သ္ၚောဲဒၟံၚ်ကွေံကွေံဏီဏောၚ်။ ကွဳပၟတ်ဓာတ်လလဳဏံ ဂွံဂြိပ်ဟီုဂှ် ပ္ဍဲကဵုဘဝပရေၚ်မၞိဟ်ဓမ္မတာဏံရဂှ် ဂွံကဵုပၟတ်ဓာတ်လလဳ မှာန်န်၊ သွက်ကမၠောန်ဂမၠိုၚ် ဂွံဂေတ်ဂြိပ်ဂှ် ဂွံကဵုပၟတ်မှာန်န်ဂှ် တၟာလှ်ေဒၟံၚ်ဏောၚ်။ တၟာလှ်ေဟီုဂှ် ဍေံတံဟွံကဵုလေဝ်ဒှ်မာန်ဏောၚ်။ ဆ္ဂး ကဵုဟွံမာန်လေဝ် ဒှ်မာန်ဏောၚ်။ ဆ္ဂး အရာတံဏံရ ဟွံပြေပြံၚ်ဒၟံၚ်ဂှ် ကၠောန်ကွဳပၟတ်ဓာတ်လလဳဟီုဂှ် ဒှ်ကလောန် ဒှ်ဟွံမာန်ရောၚ် မိက်ဂွံဟီုရ” သာ်ဝွံ ညးသ္ဂးရ။
မွဲလ္ပာ်ပၠန်ဂှ် ကံၚ်ဇြဳပၞာန်ဝွံ ပ္ဍဲဍုၚ်ဗမာ ဟိုတ်နူတၚ်နွံပၟိက် ဇြဟတ်ဓာတ်လလဳတံ နွံဒၟံၚ်တုဲ သွက်ဂွံပ္တိတ်ဓာတ်လလဳ နူကဵုတၟံချးတံဂှ် ပ္တိတ်ဒၟံၚ်ဇြဟတ်ရောၚ် ဝန်ဇၞော်ဇြဟတ်ဓာတ်ကံၚ်ဇြဳပၞာန် ဟီုဂးလဝ် ပ္ဍဲကဵုဝှဝ်ရာမ်ဇြဟတ်ဓာတ် မကၠောန်ဗဒှ်လဝ် ပ္ဍဲဍုၚ်ကာဇြက်သတာန်ရ။
သ္အာၚ်နူဂှ်ပၠန် ညံၚ်ပရေၚ်ဇီုကပိုက်ကုပွဳပွူဂွိုအ်မွဲ သွက်ဂွံပ္တိတ်ဓာတ်လလဳ နူကဵုတၟံချးမာန် သွက်ဂွံကဵုအရီုအဗၚ် စပ်ကဵုနဲပညာတံဂှ်လေဝ် အာတ်မိက်လဝ်တုဲ ဝန်ဇၞော်ဇြဟတ်ဓာတ် ကာဇြက်သတာန်ဂှ် သွက်ဂွံဖ္ဍိုက်ဗပေၚ်ကဵု တၚ်နွံပၟိက်ဇြဟတ်ဓာတ်ဍုၚ်ဗၟာဂှ် ပံၚ်တောဲရေၚ်တၠုၚ်အာဏောၚ် ကဵုလဝ်ကတိရ။
သၟာပရေၚ်ဍုၚ်ကွာန်ဝှ်ကြံၚ် ဥူဖေတာန်ဂှ် ပ္ဍဲကဵုကၟိန်ဍုၚ် အခိၚ်ဒးသွံစဒၟံၚ် စဵုကဵုဓာတ်လလဳဇြဟတ်ဍာ်တံဂှ် သွက်ဂွံပ္တိတ်ဓာတ်လလဳ နကဵုစၞပၟတ်တၟံချးဂှ် နတဲဏံ ဂွံဒှ်ကၠုၚ် ဟွံလောဲဏီတုဲ အခိၚ်အကာဲအရာပရေၚ်ပၞာန်၊ပရေၚ်ဍုၚ်ကွာန် ပရေံကၠုၚ်ဒၟံၚ်ဂှ် ဗ္ဂေတ်လှန်ဒၟံၚ် ညးဍုၚ်ကွာန်တံ နကဵုမအရေဝ်ကျေဝ်ဝ်တံရောၚ်ဂှ် သ္ၚဳဂၠိပ်လဝ်ရ။
“ဓာတ်လလဳဇြဟတ်ဍာ် နူကဵုဍုၚ်ဇကုရဂှ် ဒးသွံစဒၟံၚ်ဏောၚ်။ သၟုဟ်ဓာတ်သဘာဝတံရဂှ် ဒးသွံစဒၟံၚ်ဏောၚ်။ မ္ၚးနူဏံဂှ် ကမၠောန်တၟိတၟိ နကဵုနဲကဲတၟိတၟိဂှ် ကၠောန်ပ္တိတ်ဓာတ်လလဳဏောၚ်ဟီုဂှ် သ္ၚောဲဒၟံၚ်ကွေံကွေံဏောၚ်။ အရာမကၠောန်ပ္တိတ်ဓာတ်လလဳဇြဟတ်ဍာ် နကဵုတၟံချးတံဂှ် ပရေၚ်ဓလိုက်တမ်ရိုဟ်တံကဵု ပွဳူသဘာဝလီုလာ်တံဂှ် နွံကၠုၚ်တၟာဂလိုၚ်ဏီဏောၚ်။ အခိၚ်ဏံဂှ်တှ်ေ ဍေံဂှ် ဟီုဒၟံၚ်ဟဂှ်ရ။ နတဲဏံ ဂွံဒှ်ကၠုၚ်ဂှ် ဟွံလောဲဏီပုဟ်။ အကာဲအရာပရေၚ်ပၞာန်၊ ပရေၚ်ဍုၚ်ကွာန်တံဂှ်လေဝ် အခိၚ်သာပရေံကၠုၚ်ဒၟံၚ်ဂှ် ကၠောန်သာ်ဏံဏောၚ်ဟီုဂှ် လ္ပာ်ဍေံတံ ဗ္ဂေတ်လှန်ညးဍုၚ်ကွာန်တံ နကဵုမအရေဝ်ကျေဝ်ဝ်တုဲ ဟီုဒၟံၚ် ညံၚ်ကဵုပၟိက်ဟွံဇၞော် သွက်ညးဍုၚ်ကွာန်တံရ” ဂှ် သ္ဂးရ။
သွက်ဂွံထ္မံက်ရုပ်ရဴ ကိုန်စဳမာန်ကဵုဇြဟတ်ဓာတ်လလဳ ရပ်စပ်တၟံချးဂှ် ပ္ဍဲဍုၚ်ဗၟာဏံ နူကဵုလက်ထက်အလဵုအသဳဒဳမဝ်ကရေဇြဳတေံရ ပ္ဍဲကဵုတွဵုရးသေံ၊ ကရေၚ်၊ မန် ကေုာံ ပ္ဍဲကဵုရးဒေသတၞၚ်သဳတံဂှ် ပ္တိတ်ကၠုၚ်ဇြဟတ်တံနွံတုဲ ညးဒေသဂွိၚ်ဂွါဲကဵု ပွဳပွူသဘာဝလီုလာ်တံဂှ် ဒစဵုဒစးထ္ၜးလဝ်ဆန္ဒ သ္ကာတ်တ်မြဟ်ဟ်ရ။
ပ္ဍဲကဵုဏံ ပ္ဍဲကဵုတွဵုရးဍုၚ်မန်ဂှ်လေဝ် ဒဵုကဵုတ္ၚဲဏံ ကိုန်စဳမာန်ဓာတ်လလဳ ရပ်စပ်တၟံချးအၚ်ဒၚ် နူကဵုပွိုၚ်ဍုၚ်ရေဝ် ကံၚ်ဇြဳပၞာန် မလလောၚ်တြးလဝ်ပရေၚ်အုပ်ဓုပ်ပၞာန်ဂှ် ပါလုပ်လဝ်တုဲ ကိုန်စဳမာန်ဓာတ်လလဳ ရပ်စပ်တၟံချးတဳကျေတ် နူကဵုတွဵုရးသေံလေဝ် ပါလုပ်မွဲကီုရ။
ပရိုၚ်−သြၚ်လောန်တိုၚ်(မ်)
ဗီု−MOI
sanlontai