သဵု(လ်) ၊ အံက်တဝ်ဗာ (၉)
ပွမရပ်စပ်စကာဂၠံၚ်ကွဳပၟတ် မွဲဒမြိပ်ပယျဵု ကိုဝ်ရဳယျာသၟဝ်ကျာကဵု ရုယှာတံဂှ် အပ္ဍဲကာလသတ္တာဟဏံ စိုပ်ကၠုၚ်သၠုၚ်အိုတ်ဂှ်ဝွံ နူကဵုပျုၚ်ယာန် ထံက်ပၚ်လွဟ်လက်နက် ကုမဝ်သကိုဝ်ဒှ်မာန်ဂှ် ဂွံတီကေတ် အတိုၚ်ဌာန်ပရိုၚ် Reuters ထ္မံက်ထ္ၜးလဝ်ဂှ်ရ။
လ္ဂောံကဵုဗီုဓာတ်ဂြိုဟ်ပ္တောံတံဂှ်မ္ဂး ထ္မံက်ထ္ၜးလဝ် ပ္ဍဲကဵုသၞေဟ်ကွဳပၟတ် တောန်မာန်ဂါန် မၞုံဍုၚ်ပယျဵုကိုဝ်ရဳယျာသၟဝ်ကျာ ယာဇြောန်ဂှ် ကွဳပၟတ်ဖ္ဍိုက်ကပေါတ်ဗၞိက် နွံဒၟံၚ် ၇၃ ဖ္ဍိုက်ဂှ် ထ္မံက်ထ္ၜးလဝ် ပ္ဍဲကဵုလိက်ဒုၚ်စဳရေၚ် သေန်တာပရေၚ်လ္ၚတ်ဍုၚ်သ္အာၚ် ကေုာံ မဟာဗျူဟာ ဖျေံသ္ဇိုၚ်ဝါယှေန်တာန်ဂှ်ရ။
ဒဒှ်ရပွမရပ်စပ်စကာဒၟံၚ်ဂၠံၚ် ဂၠိုၚ်နူကဵု အခိၚ်ကၠာဂွိုအ်ဒှ်ယဲကပ်တေံဂှ်ကဵု လောန်ကၠုၚ်အပ္ဍဲပွိုၚ် ၅ သၞာံတေံ ဂၠိုၚ်ကဵုဆဂှ် ထ္မံက်ထ္ၜးလဝ် ပ္ဍဲလိက်ဒုၚ်စဳရေၚ်ဂှ်ရ။
ညးကဵုကသပ် အမေရိကာန်မွဲတၠဂှ် ပွမရပ်စပ်စကာ ဂၠံၚ်ကွဳပၟတ်ဂၠိုၚ်ကၠုၚ်ဂှ်ဝွံ ကြဴနူက္ဍိုပ်သ္ကိုပ်ကိုဝ်ရဳယျာသၟဝ်ကျာကဵု က္ဍိုပ်သ္ကိုပ်ရုယှာၜါဍုၚ် ဆဵုဂဗသဳကၠဳညးသ္ကအ်တုဲဂှ် အစဳဇန် ထံက်ပၚ်လွဟ်လက်နက်ဒှ်မာန်ရောၚ်ဂှ် သ္ၚဳဂၠိပ်ဟီုဂးလဝ်ရ။
က္ဍိုပ်သ္ကိုပ်ကိုဝ်ရဳယျာသၟဝ်ကျာ ကေန်ဂျုၚ်အာန်ကဵု သမ္မတရုယှာ ဗလာဒဳမာပူတေန်တံဝွံ ပ္ဍဲဂိတုတုဲကၠုၚ်တေံ အပ္ဍဲပေါဲသဳကၠဳကဆံၚ်သၠုၚ် ပွိုၚ်မွဲသတ္တာဟ ပ္ဍဲကဵုကၞောတ်ဒိုဟ်ဗၟံက်ဍုၚ်ရုယှာဂှ် ပ္ဍဲကဵုကိစ္စ စပ်ကဵုပရေၚ်ပၞာန်၊ ပရေၚ်ပိုန်ဒြပ်၊ ပေါဲပၞာန်ယူကရုၚ်တံဂှ် သဳကၠဳလဝ် ကိစ္စပံၚ်တောဲရေၚ်တၠုၚ်ဇြိုဟ်ဟ်နက်က်တံ အဓိကရ။
“အခိၚ်ကေမ် ကေုာံ ပူတေန်တံ ဆဵုဂဗလဝ်ညးသ္ကအ် ဟွံလအ်ဏီဂှ် ဟိုတ်နူသဳကၠဳလဝ် ပရေၚ်လှာဲဂတးပရေၚ်ပၞာန် ကေုာံ ပရေၚ်ပံၚ်တောဲရေၚ်တၠုၚ်တံဂှ်ရ ပရေၚ်အာကၠုၚ်ဂၠံၚ်ကွဳပၟတ် တောတက်ကၠုၚ် တီတီဂှ်ဝွံ ထံက်ထ္ၜးဒၟံၚ် ကိုဝ်ရဳယျာသၟဝ်ကျာ ထံက်ပၚ် လွဟ်လက်နက်မကမ် ကုရုယှာဏောၚ်” ဂှ် ဂကောံကဵုကသပ်ဂှ် ဟီုဂးလဝ်ရ။
ပရေၚ်ပံၚ်တောဲရေၚ်တၠုၚ်ပရေၚ်ပၞာန် အကြာကိုဝ်ရဳယျာသၟဝ်ကျာကဵု ရုယှာတံဂှ်ဝွံ ဝးပ္ကဝ်ဒၟံၚ် ပရေၚ်ကေတ်အရေဝ်ကၟာတ်လဒဵုကုလသမဂ္ဂ လ္တူပျုၚ်ယာန်ရောၚ်ဂှ် အမေရိကာန် ကေုာံ ကိုဝ်ရဳယျာသၠုၚ်ကျာတံ ကဵုလဝ်သတိရ။
Ref: Reuters
sanlontai