ဗဒိုပ်ပါဲဘဲပၞာန် မၞုံဗ္ဒာဲဌာန်ဂအုပ် KIO ဒးဒုၚ်ဂြာတ်ထောံဖျေံဗုမ်တုဲ ဟွံအောန်နူ (၃၀)တၠ ဒးချိုတ်လဝ်

လိုၚ်ဇြာ၊ အံက်တဝ်ဗာ (၁၁)

ဟိုတ်နူဗဒိုပ်ပါဲဘဲပၞာန် မုမ်လိုၚ်ခေတ် မၞုံဗ္ဒာဲဌာန်ဂအုပ်ဂကောံဗော်သွးဗၠးၜးကချေၚ် (KIO/KIA) ဒးဒုၚ်ဂြာတ်ထောံဖျေံလဝ်ဗုမ်တုဲ မၞိဟ် ဟွံအောန်နူ (၃၀) တၠ ပါလုပ်သီုကောန်ၚာ် ဒးချိုတ်လဝ်ရဂှ် ဂွံတီကေတ် နူညးဒေသတအ်ရ။

ဗဒိုပ်ပါဲဘဲပၞာန်မုမ်လိုၚ်ခေတ် (IDPs camp) ဂှ် ဂိတုအံက်တဝ်ဗာ စၟတ်တ္ၚဲ (၉) တ္ၚဲတုဲကၠုၚ်ဏံ အခိၚ်ဗ္တံ ၜိုတ် (၁၁) နာဍဳဂှ် နူလ္ပာ်ကံၚ်ဇြဳပၞာန် ဂြာတ်ထောံဖျေံလဝ်ဗုမ် နူကဵုက္ၜၚ်ကျာတုဲ ဗတိုက်လဝ်ရ။

ဟိုတ်နူဗဒိုပ်ပါဲဘဲပၞာန် ဒးဒုၚ်ဂြာတ်ထောံဖျေံလဝ်ဗုမ်တုဲ ကောန်အရာပ်ညးဍုၚ်ကွာန် ဟွံအောန်နူ (၃၀)တၠ ပါလုပ်သီုကောန်ၚာ် ဒးချိုတ်လဝ်တုဲ ဇီုကပိုက်ဒးလဝ်ဘဲဝပ် ဗ္ဒာဲ (၆၀) တၠရဂှ် ဂကောံအခေါၚ်အရာမၞိဟ်ကချေၚ်( KHRW) လလောၚ်တြးလဝ် ပ္ဍဲဂိတုအံက်တဝ်ဗာ စၟတ်တ္ၚဲ (၁၀) အခိၚ်နူဂယးပြဟ်ဂှ်ရ။

ပ္ဍဲလ္တူကံၚ်ဇြဳပၞာန်ဗတိုက်လဝ်ကဵုက္ၜၚ်ကျာဏံ ဒဒှ်ရဒစဵုဒစးပျုတ်ဗ္ဒေက် သ္ကာတ်တ်မြဟ်ဟ်ကီု သွက်ဂွံရေၚ်တၠုၚ်ကေတ်အာအရေဝ် ကံၚ်ဇြဳပၞာန်က္လိလောန်ဒၟံၚ် ဂဗုတ်ရာဇဝတ်ပၞာန် ပ္ဍဲရုၚ်သၞောဝ်ဓဝ်ကၟိန်ဍုၚ်နာနာဂှ် ဂကောံအခေါၚ်အရာမၞိဟ်ကချေၚ် (KHRW) အာတ်မိက်လဝ်ရ။

သ္ကိုပ်ဗိုလ်ဇၞော်နဝ်ဗူ ညးတာလျိုၚ်လလောၚ်ပရိုၚ်ဂကောံဗော်သွးဗၠးၜးကချေၚ် (KIO/KIA) ဂှ်မ္ဂး ပ္ဍဲပရေၚ်ဗ္တိုက်ပန်လဝ်ဏံ ဟိုတ်နူဟွံမိၚ် ရမျှာၚ်က္ၜၚ်ကျာဂှ်ရ ဂြာတ်ထောံဖျေံလဝ်ဗုမ် ကဵုဒရုမ်တုဲ ဗတိုက်လဝ် ဒှ်မာန်ရဂှ် ဟီုသှ်လဝ်ကဵု ဌာန်ပရိုၚ်လ္ၚဵုဂှ်ရ။

ပရေၚ်ဂြာတ်ထောံဖျေံလဝ်ဗုမ် ပ္ဍဲဗဒိုပ်ပါဲဘဲပၞာန်မုမ်လိုၚ်ခေတ်ဂှ် နူလ္ပာ်ကံၚ်ဇြဳပၞာန် ဟိုတ်နူဟွံဂွံဟီုပ္တိတ်လဝ်မမိက်ကဵုမွဲမွဲဏီတုဲ နကဵုသြၚ်လောန်တိုၚ်(မ်)လေဝ် ၜိုန်ရဆက်စၠောံသၟာန်လဝ် ဂအုပ်ဗိုလ်ဇၞော်ဇြဝ်မေန်ထောန် ညးမၞုံအခေါၚ်ဟီုဂးကံၚ်ဇြဳပၞာန်ကီုလေဝ် စဵုကဵုအခိၚ်လၟုဟ် ကေတ်အဆက် ဟွံဂွံဏီရ။

ပရိုၚ် – သြၚ်လောန်တိုၚ်(မ်)

ဗီု – CJ