မြဝတဳ၊ အဝ်ဂါတ် (၂၉)
ပ္ဍဲဒၞါဲဂၠံၚ်ပန်သွာၚ် ဥကယေတ်ထ လ္တူသ္ကုတ်ဂၠံၚ် မြဝတဳ−ဝဝ်လေဝ်၊ တွဵုရးကရေၚ်၊ ပရေၚ်ပၞာန်ကြံၚ်မ္ၚိုဟ်တံ နွံဒၟံၚ်ဂှ် ဒပ်ကံၚ်ဇြဳပၞာန် ကၟာတ်လဝ်အခေါၚ်အကာကၠုၚ်ဂှ်ရ သွက်ပရေၚ်အာကၠုၚ် ဒးဂဗဒၟံၚ် အခက်အခုဲတံရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဒၞါဲဂၠံၚ်ပန်သွာၚ် ဥကယေတ်ထ မတန်ဒၟံၚ် လ္တူဂၠံၚ်ကွဳစက် မြဝတဳ−ဝဝ်လေဝ်ဂှ် ဒပ်ကံၚ်ဇြဳပၞာန် ဖျေံလဝ်ဒပ် နကဵုဇြဟတ်ဗွဲမဂၠိုၚ်ဂၠေၚ်ဂှ်တုဲ သီုကဵုကၟာတ်လဝ် အခေါၚ်အာကၠုၚ် ညးဍုၚ်ကွာန်ဒေသတံတုဲ ယဝ်ရတတ်ကၠောံအာကၠုၚ်ဒးမ္ဂး ပန်ပှော်ရောၚ် ဒပ်ကံၚ်ဇြဳပၞာန် ပ္တိတ်လဝ်အမိၚ်ဂှ် ညးဒေသတံ သ္ဂးအိုတ်ရ။
ဒပ်ကံၚ်ဇြဳပၞာန်တံ ကၟာတ်ထောံ အခေါၚ်တတ်ကၠောံအာကၠုၚ် ပ္ဍဲဒၞါဲဂၠံၚ်ပန်သွာၚ် ဥကယေတ်ထ သာ်ဏံဂှ်ရ ညးဒေသတံ သွက်ဂွံအာကၠောန်စကမၠောန် လ္ပာ်ဒေသဝဝ်လေဝ်တေံကီု သွက်ဂွံအာရာန်ကပေါတ်ဗၞိက်တံကီုဂှ် ဒးဂဗဒၟံၚ် အခက်အခုဲတၟာဂလိုၚ်ရောၚ် ညးဒေသမွဲတၠ ဟီုရ။
“ကၟာတ်ထောံ ဂၠံၚ်ပန်သွာၚ်ဥကယေတ်ထဂှ်မ္ဂး ကွာန်ကနေဝ်လေဝ်၊ ဝဝ်လေဝ်ခဳ သ္ကုတ်ဂၠံၚ်ဝဝ်လေဝ်တံဂှ် အခက်အခုဲဟွံမွဲစကွေံကွေံကီုလေဝ် မပ္တံကဵုကွာန်သုကလိ (စုကလိ) ၊တမဝ်ထာ၊ ကွဳတာဥ ကွာန်လ္ပာ်သ္ကုတ်ဂၠံၚ် သုကလုၚ် (စုကလိမ်) တံဂှ် ပရေၚ်စသုၚ်တံ ခက်ခုဲအာတၟာဂလိုၚ်ရ” သာ်ဝွံ ညးဒေသမွဲတၠ သ္ဂးရ။
ဗဒိုပ်ကံၚ်ဇြဳပၞာန် မၞုံဗ္ဒါဲဂၠံၚ်ပန်သွာၚ် ဥကယေတ်ထဂှ် တုဲကၠုၚ်ဂိတုဂျောန်တေံ နူကဵုဂကောံပံၚ်ကောံ KNLA တံ လုပ်စိုပ်ဗ္တိုက်လဝ်တုဲ က္တဵုဒှ်လဝ်ပေါဲဗ္တိုက် ကုဒပ်ကံၚ်ဇြဳပၞာန် သ္ကာတ်မြဟ်တုဲ စဵုကဵုအခိၚ်လၟုဟ် ပရေၚ်ပၞာန်ကြံၚ်မ္ၚိုဟ်တံ နွံဒၟံၚ်ဖိုဟ်တုဲ ညးဒေသဗ္ဒါဲဗ္ဒါဲတံလေဝ် ဟိုတ်နူအကာဲအရာပရေၚ်ပၞာန်တံတုဲ ဟွံဂံၚ်စဴဌာန်ဒၟံၚ်တံဏီပုဟ်ဂှ် ဂွံတီကေတ်ရ။
ပ္ဍဲလ္ပာ်ဥကယေတ်ထ ဗ္ဒါဲဒေသဝဝ်လေဝ် မၞုံလ္တူဂၠံၚ် မြဝတဳ−ဝဝ်လေဝ်ဂှ် ပရေၚ်ပၞာန်ကြံၚ်မ္ၚိုဟ်တံ နွံဒၟံၚ်တုဲ ပ္ဍဲဒၞါဲ (သုံးထပ်ကွေ့) သ္ကုတ်ဂၠံၚ်မြဝတဳ−ဝဝ်လေဝ်ဂှ်လေဝ် အကြာဒပ်ကံၚ်ဇြဳပၞာန်ကဵု ကရောၚ်ပၞာန်ကဝ်ဗရာတံ ပေါဲဗ္တိုက် သ္ကာတ်မြဟ်လဝ်တုဲ ဒပ်ကံၚ်ဇြဳပၞာန် သွက်ဂွံထိၚ်ဒက်အုပ်ဓလီုအာ တိဍာ်မာန် စကာဇြဟတ်ဂၠိုၚ်နူသၞောတ်ဗ္ၜတ်တုဲ ထ္ပက်ဒၟံၚ်ပၞာန်တံရ။
ပ္ဍဲတိဍာ်ဒပ်မဟာ (၆) ခရိုၚ်ဒူပလာယာ တိဍာ်အုပ်ဓုပ် ဗော်သွးကောန်ဂကူကရေၚ် KNU ဂှ် ဟိုတ်နူပွမချဳဒရာၚ် ပရေၚ်ပၞာန် ဒပ်ကံၚ်ဇြဳပၞာန်တံတုဲ ညးဒေသ ထောံလသာသ္ၚိဌာန်တုဲ မဒးဂြိပ်ဒဴပါဲဒလေတ်ဒၟံၚ်တံ မၞုံကၠုၚ် စဵုကဵု (၉၀၀၀၀) ပြၚ်ရဂှ် KNU လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)