ပ္ဍဲပေါဲဗတိုက်ကအ်ကြိက် ပါလုပ်သီုသ္ကိုပ်တံဒပ်ကံၚ်ဇြဳပၞာန် ဒးချိုတ်လဝ် ၁၁ တၠ

ကအ်ကြိက်၊ အံက်တဝ်ဗာ (၂၇)

ပ္ဍဲပေါဲဗတိုက်ပွိုၚ်ဍုၚ်ကအ်ကြိက် တွဵုရးကရေၚ်ဂှ် လ္ပာ်ကံၚ်ဇြဳပၞာန် ပါလုပ်သီုသ္ကိုပ်တံဒပ် ဒးချိုတ်လဝ် (၁၁) တၠရဂှ် KNU ခရိုၚ်ဒူပလာယာ လလောၚ်တြးလဝ်ပရိုၚ် ပ္ဍဲဂိတုအံက်တဝ်ဗာ စၟတ်တ္ၚဲ ၂၅ ဂှ်ရ။

လ္ပာ်ကွာန်ဇြေန်ကုမ် မၞုံဗၟံက်ဍုၚ်ကအ်ကြိက်ဂှ် ပ္ဍဲဂိတုအံက်တဝ်ဗာ စၟတ်တ္ၚဲ ၂၄ တုဲကၠုၚ်တေံဂှ် ဟိုတ်နူတံဒပ် ၃တံဒပ် သၟဝ်တဲၝောံဒပ် ၄၄ ကံၚ်ဇြဳပၞာန် ထ္ပက်လုပ်ကၠုၚ်ကရောၚ်ပၞာန်တုဲ ဒှ်လဝ်ပေါဲဗတိုက်ကဵု ဂကောံဒပ်ပံၚ်ကောံပၠန်ဂတး KNLA နူကဵုအခိၚ် (၅) နာဍဳနူဂယး စဵုကဵု (၁၁) နာဍဳရ။

အကြာဒပ်ကံၚ်ဇြဳပၞာန် ထ္ပက်လုပ်ကၠုၚ်ရောၚ်ပၞာန်ကဵု ဂကောံဒပ်ပံၚ်ကောံပၠန်ဂတး KNLA တအ် ဒှ်လဝ်ပေါဲဗတိုက်ဆေၚ်မုက် ပ္ဍဲဂၠံၚ်ပါ် (တနေမူ) ဗ္ဒာဲဂၠံၚ်ဇၞော်အာယှတုဲ ပါလုပ်သီုသ္ကိုပ်တံဒပ် ကံၚ်ဇြဳပၞာန် ခမရ ၂၀၇ ဒုသ္ကိုပ်ဗိုလ်ဇၞော် ညုၚ်ချာန်ကိုဝ်ကိုဝ် ဒးချိုတ်လဝ် (၆) တၠတုဲ ပါလုပ်သီုဒုသ္ကိုပ်ဒပ်လ္ပာ် (၁) တၠ ဒးလဝ်ဘဲဝပ် (၈) တၠရဂှ် ဓမံက်လဝ် ပ္ဍဲတၚ်လလောၚ်တြးရ။

ပ္ဍဲကဵုပေါဲဗတိုက်ဏံ နူလ္ပာ်ဒပ်ပၠန်ဂတးပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA သ္ဂံၚ် (၂) တၠ ဒးလဝ်ဘဲဝပ်ရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးရ။

သ္အာၚ်နူဂှ်ပၠန် ပ္ဍဲကဵုတ္ၚဲဂှ် အခိၚ်နူဂယး ၁၁ နာဍဳ ဒပ်ခလရ ၂၃၁ သၟဝ်တဲ စကခ ၁၂ ကံၚ်ဇြဳပၞာန် ဖျေံလဝ်ဗဒိုပ် ပ္ဍဲကၟာဝေၚ်ဍာ်ဂှ် ဂကောံဒပ်ပံၚ်ကောံတအ် အာပန်ပှော်လဝ်ကဵုလွဟ်သနိုက်ဗာတုဲ ကောန်ဒပ်ကံၚ်ဇြဳပၞာန် (၂) တၠ ဒးချိုတ်လဝ်ရဂှ် ဂွံတီကေတ် အတိုၚ်တၚ်လလောၚ်တြးရ။

မွဲအဆက်ဓဝ် ပ္ဍဲတ္ၚဲဂှ် အခိၚ်ဇိုၚ်သဝ်တ္ၚဲ (၃) နာဍဳကဝက်ဂှ်လေဝ် တံဒပ် ၂၀၂ သၟဝ်တဲၝောံဒပ် ၂၂ ကံၚ်ဇြဳပၞာန် လုပ်ကၠုၚ်ချဳဒရာၚ် ပ္ဍဲကဵုကွာန်တတာန်ကူ ပွိုၚ်ဍုၚ်ကအ်ကြိက်ဂှ် ဟိုတ်နူဒပ်ပၠန်ဂတးပံၚ်ကောံတအ် အာစိုပ်ဗတိုက်ပန်လဝ်ဂှ်ရ ကောန်ဒပ်ကံၚ်ဇြဳပၞာန် (၃) တၠ ဒးထပ်ချိုတ်လဝ်ရဂှ် လလောၚ်တြးလဝ်ရ။

ဒပ်ကံၚ်ဇြဳပၞာန် ဒးဂိလဝ် ပ္ဍဲပေါဲဗတိုက်ၜါလ္ပာ်ဂှ် ဂေတ်လဝ်ကဵုက္ၜၚ်ကျာသၞေၚ်ၜဲ မွဲဖ္ဍိုက် ပ္ဍဲလ္ပာ်ကွာန်မပ္တံကဵုဇြေန်ကုမ်၊ မောၚ်မယွာတေတ်၊ ကမိုၚ်ကုမ်၊ မၞုံပ္ဍဲပွိုၚ်ဍုၚ်ကအ်ကြိက် တိဍာ်ဒပ်မဟာ ၆ ဗၞတ် (၃) ဝါတုဲ ကဵုလွဟ်ဇၞော်လေဝ် ပန်ဖျေံလဝ် ပ္ဍဲကွာန်မပ္တံကဵု ယျေလေဝ်ကုမ်၊ ဇြေန်ကုမ်၊ ယွာတေတ်ကုမ်၊ နာန်ယှိုဲမှုမ်၊ အောၚ်လှိုၚ်၊ တတာန်ကူရ။

ဟိုတ်နူပရေၚ်ကံၚ်ဇြဳပၞာန် ပန်ပှော်လဝ်ဂှ် ပြဟ်ဒတုံစှ်ေပါ်ခတိုဟ်လဝ် ပ္ဍဲကွာန်ယျေလေဝ်ကုမ် ပွိုၚ်ဍုၚ်ကအ်ကြိက် ဇီုကပိုက်ဒးသ္ၚိဒၟံၚ် (၁) မ လီုလာ်လဝ်တုဲ ဂၠဴ (၁) လေဝ် ဇီုကပိုက်ဒးလဝ်တုဲ ချိုတ်အာရဂှ် ဂွံတီကေတ်အတိုၚ်တၚ်လလောၚ်တြး လလောၚ်ပရိုၚ် ခရိုၚ်ဒူပလာယာရ။

ပရိုၚ် – သြၚ်လောန်တိုၚ်မ်

ဗီု – KNU