သြန်ဘဏ္ဍာကၟိန်ဍုၚ်ဂှ် ဟွံလဴထ္ၜးသောၚ်ကလးကဵုမွဲသာ် ကံၚ်ဇြဳပၞာန် လၞုက်သ္ကုတ်တုဲ ရပ်စပ်ဒၟံၚ်

မတ်မလီု၊ အံက်တဝ်ဗာ (၂၇)

ကံၚ်ဇြဳပၞာန် သ္ပပဓာန်ကဵုလွဟ်တုဲ မသီကေတ်လဝ်အဝဵုကၟိန်ဍုၚ်ဂှ်ဝွံ သြန်ဘဏ္ဍာညးဍုၚ်ကွာန်ပိုၚ်တံဂှ် ပွမကၠးမှးတပ်တးဟွံမွဲမွဲသာ် လၞုက်သ္ကုတ်တုဲ ရပ်စပ်ဒၟံၚ်ရ။

ကံၚ်ဇြဳပၞာန် မသီကေတ်လဝ်အဝဵု နကဵုဟိုတ်မမာဲဗၠေတ်မှာ ပ္ဍဲပေါဲရုဲမာဲ ၂၀၂၀ ဂှ်ဝွံ ဟိုတ်နူကၠတ်ထဝ် မထိၚ်ဒဝ်ကဵု တၚ်နၚ်စပ်ကဵုစရၚ်သြန်ဘဏ္ဍာကၟိန်ဍုၚ်ဟွံမွဲဂှ်ရ ရပ်စပ်စကာဒၟံၚ် အတိုၚ်ပၟိက်စိုတ်ရ။

အပ္ဍဲကာလဒပ်ပၞာန်သီအဝဵု ပွိုၚ်ၜါသၞာံဘာ်ပြၚ်ဏံ ကံၚ်ဇြဳပၞာန် မဂွံရပ်စပ်လဝ် သၞာံဘဏ္ဍာ ပွိုၚ် ၃ သၞာံဂှ်ဝွံ ပ္ဍဲအရာပါ်ပရအ်ရပ်စပ် သြန်ဘဏ္ဍာကၟိန်ဍုၚ်ဂှ်ကီု တၚ်နၚ်စပ်ကဵုစရၚ်သြန်ဘဏ္ဍာ တွဵုရး ကေုာံ ရးဒေသတံဂှ်လေဝ် လလောၚ်ပ္တိတ်လဝ် သောဲသောဲဗြောဲဗြောဲဂှ် ဟွံမွဲရ။

အတိုၚ်သြန်လောန်တိုၚ်(မ်) စၟဳစၟတ်လ္ၚတ်ဂွံဂှ်မ္ဂး စနူသၞာံဘဏ္ဍာ ၂၀၂၃−၂၀၂၄ တုဲ ကံၚ်ဇြဳပၞာန်ဝွံ တၚ်နၚ်လစှ်ေ ပွမရပ်စပ်ပါ်ပရအ်သြန်ဘဏ္ဍာ ဌာနဝန်ဇၞော်တံဂှ် ဟွံထ္မံက်ထ္ၜးရတုဲ လၞုက်သ္ကုတ်ရပ်စပ်ကၠုၚ်ရ။

တၠပညာပရေၚ်ပိုန်ဒြပ်မွဲတၠဂှ် ဟွံထ္မံက်ထ္ၜးသောၚ်ကလး ကုသြန်ဘဏ္ဍာတံဂှ်ဝွံ ညံၚ်ဂွိုအ်ထံက်ထ္ၜး ကုသြန်နွံပၟိက်ကၟိန်ဍုၚ်ဂှ်ကဵု ခရိတ်အရပ်စပ်တၞဟ်ဟ်တံဂှ် ကၠောန်ဒၟံၚ်တုဲ ဟိုတ်နူအကာဲအရာသာ်ဏံတုဲ သြန်ဘဏ္ဍာကၟိန်ဍုၚ် အရာမလေၚ်ဒိုက်တံ ဂၠိုၚ်ကၠုၚ်မာန်ရောၚ် သ္ၚဳဂၠိပ်လဝ်ရ။

“အဓိကဂှ်တှ်ေ ဒှ်ဒၟံၚ်သြန်နွံပၟိက် အလဵုအသဳဏောၚ်။ ဟီုမ္ဂး ဟိုတ်နူကလေၚ်ထံက်ထ္ၜး ကုဍေံတံဏောၚ်ဂှ်တုဲ ဗာတ်ဂျက်တံဏံဂှ် ဒှ်သဘဴဓလိုက်ထောံလဝ်ရ။ မွဲပၠန်ဂှ် ရပ်စပ်လဝ် ပ္ဍဲကဏ္ဍလဵုရောဟီုဂှ် ဒးထ္မံက်ထ္ၜး ချိုတ်တ်ပၠိုတ်တ်ဏောၚ်။ ဥပမာ သွက်ပရေၚ်ပညာဂှ် သုၚ်စောဲၜိုတ်လဵု၊ သွက်ပရေၚ်ထတ်ယုက်ဂှ် ၜိုတ်လဵု၊ သွက်ပရေၚ်စဵုဒၞါဂှ် ရပ်စပ်လဝ်ၜိုတ်လဵု မပ္တံသာ်ဏံတံရ။ ယဝ်ရ သွက်ပရေၚ်ပညာ၊ ပရေၚ်ထတ်ယုက်ဂှ် အောန်ဒၟံၚ်ဟီုမ္ဂး ထံက်ထ္ၜး ကုဍေံတံအိုတ်ဏောၚ်။ သွက်ဂွံဝေၚ်ပါဲ အရာဏံဂှ်တုဲ ဖအောန်ဖျေံကၠုၚ် ပွမကၠးမှးစပ်ကဵုသြန်ဘဏ္ဍာတံ သိုက်က်ဂှ် ညာတ်တ်ရ။ ကၠာတေံဂှ်တှ်ေ ကိစ္စစပ်ကဵုဓဇက်ဗာတ်ဂျက်တံ၊ ရပ်စပ်ဗာတ်ဂျက်တံဂှ် အလဵုအသဳ မကော်ဂး ဂကောံရေၚ်တၠုၚ်ကေၚ်ကာတံ ကၠောန်ကၠုၚ်လဝ်ရ။ ပြဝမ္ဒးကလေၚ်ထံက်ထ္ၜးတံ၊ ပွမဓဝ်ယာနွံဟွံမွဲ စၟဳတ်တံဂှ် ကၠတ်ထဝ် ဒးရေၚ်တၠုၚ်ရ။ လၟုဟ်ဂှ် အရာမထိၚ်ပ္ညဳကဵု သာ်ဏံတံ ဟွံမွဲတုဲ သြန်ဘဏ္ဍာကၟိန်ဍုၚ် လေၚ်ဒိုက်အာတံ က္တဵုဒှ်တၟာဂလိုၚ်မာန်ဏောၚ်” သာ်ဝွံ သ္ဂးရ။

သ္အာၚ်နူဂှ်ပၠန် ပ္ဍဲကဵုပေါဲဗ္တိုက် မက္တဵုဒှ်ဒၟံၚ် အလုံကၟိန်ဍုၚ်ဂှ် ဟိုတ်နူဒးရပ်စပ်ဒၟံၚ် ခရိတ်အရပ်စပ်ပရေၚ်စဵုဒၞါ နူကဵုသြန်ဘဏ္ဍာညးဍုၚ်ကွာန်တံ ဂၠိုၚ်အိုတ်ဂှ်ရ ခရိတ်အရပ်စပ်ပရေၚ်စဵုဒၞါ သုၚ်စောဲဒၟံၚ်လၟုဟ်တံဂှ် ညံၚ်ဂကောံဇြဟတ်ပၠန်ဂတးတံ ချိၚ်ခယျဂွိုအ်ဒးတုဲ ဟွံထ္မံက်ထ္ၜးရောၚ်ဂှ် ညးဆက်ဟီုရ။

ပ္ဍဲလက်ထက်အလဵုအသဳ NLD ဂှ် သြန်ရပ် သြန်လုပ် ရးဒေသ ကေုာံ တွဵုရးနာနာ ပါလုပ်သီုကဵုကဆံၚ်ကၟိန်ဍုၚ်ဂှ် လၟေၚ်သၞာံ လလောၚ်ပ္တိတ် လိက် Citizen Budget တုဲ သွက်ကမၠောန် နူကဵုဌာနဝန်ဇၞော်ဂမၠိုၚ် မထ္မံက်အာရုပ်ရဴတံဂှ် သောၚ်ကလးလဴထ္ၜးကဵုတံ နွံလဝ်ရ။

ကံၚ်ဇြဳပၞာန် ဟွံထ္မံက်ထ္ၜးကဵု သြန်ဗာတ်ဂျက်တံဂှ်ဝွံ ကၠောန်သ္ပလဝ် ဗီုမိက်ဂွံကၠတ် ညံၚ်ဂွံကၠတ်ဂွံဏောၚ်တုဲ ဟိုတ်နူအလဵုအသဳညးဍုၚ်ကွာန် ဟွံသေၚ်ဂှ်ရ ဒှ်သဘဴကၠောန်အာ အတိုၚ်ပၟိက်စိုတ်ဍေံတံဂှ် ဥူအံၚ်ကျဝ်တူ မယိုက်ဂၠေၚ်လဝ်တာလျိုၚ် နဒဒှ်ဥက္ကဌ ကမ္မတဳစရၚ်သြန်ညးဍုၚ်ကွာန် နူကဵုကၠတ်ထဝ်တွဵုရးဍုၚ်မန် ပါ်ပါဲလဝ်ရ။

“ဍေံတံ ဟွံထ္မံက်ထ္ၜးလဴပူကဵု သာ်ဏံဂှ် ဍေံတံဗီုမိက်ဂွံကၠတ် ညံၚ်ဂွံကၠတ်ဂွံရဏောၚ်။ ဒးဟီုတပ်ပ်မ္ဂး ဗီုမိက်ဂွံကၠတ် ညံၚ်ဂွံကၠတ်ဂွံတုဲ ညအ်ဂှ် ဒှ်သဘဴပွမကၠးမှးတံဟွံမွဲရဏောၚ်။ ပွကၠးမှးသောၚ်ကၠး စပ်ကဵုသြန်ဘဏ္ဍာတံဂှ် နွံဒၟံၚ်ဏောၚ်။ တုဲပၠန် သြန်ဘဏ္ဍာကောန်ဍုၚ် နွံဏောၚ်။ သြန်ဘဏ္ဍာကောန်ဍုၚ်ဂှ်တှ်ေ အကံက်ခေါန်ဂွံနၚ် နူကဵုကၟိန်ဍုၚ်ဂှ် သာ်လဵုကၠောန်သ္ပဒၟံၚ် ကမၠောန်ဖောအ်ဗြေဝ်ဒေသ ဒတုဲဖဵုညးဍုၚ်ကွာန်တံရောဟီုဂှ် ဒးလဴထ္ၜးထ္မံက်ထ္ၜးကဵု ညးဍုၚ်ကွာန်တံဂှ် ဒှ်တာလျိုၚ် အလဵုအသဳမွဲဏောၚ်။ ညအ်ဂှ် ဂၞန်မွဲဂှ်တှ်ေ ညးတံညးတံ ဟိုတ်နူဟွံဒုၚ်ဂိုၚ်ကေတ်လဝ် အလဵုအသဳတုဲ ဟွံလဴထ္ၜးထ္မံက်ထ္ၜးကဵုမွဲသာ် ဒၟါနူဒှ်တၠအဝဵု အလဵုအသဳညးဍုၚ်ကွာန်ဟွံသေၚ်ဂှ်ရ အတိုၚ်ပၟိက်စိုတ် ဍေံတံကၠောန်ဏောၚ်၊ ဒှ်အာသဘဴ ဗီုပၟိက်စိုတ်နွံ ရေၚ်တၠုၚ်အာဏောၚ် မဒှ်ရ” သာ်ဝွံ သ္ဂးရ။

သ္အာၚ်နူဂှ်ပၠန် ကံၚ်ဇြဳပၞာန်ဝွံ နူကဵုညးဍုၚ်ကွာန်တံဂှ် ဗက်ကံက်ကၠုၚ် အကံက်ခေါန်တံ နကဵုနဲကဲအနိၚ်အပိုၚ်တံ နွံဒၟံၚ်တုဲ ပွမကံက်ကၠုၚ်သာ်ဏံဂှ်ဝွံ သွက်ခရိတ်အရပ်စပ်ပၞာန်ဂှ် ဒှ်ဒၟံၚ်ဗီုပြၚ် ကလေၚ်ဂစိုတ်ညးဍုၚ်ကွာန်တံ နကဵုသြန်ဘဏ္ဍာညးဍုၚ်ကွာန်တံဂှ်ရ ၜိုတ်သ္ပမာန် ညံၚ်ဂွိုအ်ကဵုဒးအကံက်ခေါန်ဂှ် နွံပၟိက်ရောၚ် ညးဆက်ဟီုရ။

ပ္ဍဲကဵုအလဵုအသဳတုဲကၠုၚ်တေံဂှ် ပွမရပ်စပ်ပါ်ပရအ် သြန်ဘဏ္ဍာညးဍုၚ်ကွာန်တံဂှ် နူကဵုကၠတ်ထဝ် စၟဳတ်သ္ပဒတန်ကဵုတုဲ ကြဴနူဂှ် ပ္ဍဲအရာရေၚ်တၠုၚ် ပရေၚ်ဖောအ်ဗြေဝ်ဒေသတံဂှ်လေဝ် ညံၚ်ပရေၚ်လေၚ်ဒိုက်သြန်ဘဏ္ဍာတံ ဂွိုအ်နွံဂှ် ကၠတ်ထဝ်ကီု ဌာနက္ဍိုက်ပ်စရၚ်ဒဒၚ်တံကီု ကလေၚ်စၟဳတ်တံဂှ် ကၠောန်သ္ပလဝ်ရ။

ပရိုၚ်−သြၚ်လောန်တိုၚ်(မ်)

ဗီု−MOI