ဇွကောန်ဍုၚ်သေံ ၇ တၠ မချိုတ်အာလဝ် အပ္ဍဲပေါဲပၞာန်အေဿရဂှ်ေ ကလေၚ်ယိုက်ဖျဴသ္ၚိ

ၜၚ်ကံက်၊ အံက်တဝ်ဗာ (၂၇)

ဇွရုပ်ကောန်ဍုၚ်သေံ ၇ တၠ မဒးချိုတ်အာလဝ် ပ္ဍဲကဵုပေါဲပၞာန်အေဿရေ ကေုာံ ပါလက်သတိုၚ်ဂှ် ကလေၚ်ယိုက်ဖျဴနၚ်တုဲ စိုပ်ကၠုၚ်သၞေဟ်က္ၜၚ်ကျာသုဝဏ္ဏဘူမိယျဂှ် ဂွံတီကေတ်ရ။

အပ္ဍဲသတ္တာဟတုဲကၠုၚ်တေံဂှ်လေဝ် နူကဵုအေဿရဂှ်ေ ယိုက်ဖျဴနၚ် ဇွရုပ်ကောန်ဍုၚ်သေံ ၈ တၠဏီရ။

ဟိုတ်နူပေါဲပၞာန် မစက္တဵုဒှ်လဝ် ပ္ဍဲကဵုအေဿရေ ပ္ဍဲဂိတုအံက်တဝ်ဗာ ၇ တေံဂှ်တုဲ ကောန်ဍုၚ်သေံ မဒးချိုတ်အာဂှ် ၁၈ တၠ နွံတုဲ ၁၉ တၠ ကလိဂွံလဝ်ဝပ်ရောၚ် အလဵုအသဳသေံ လလောၚ်ပ္တိတ်လဝ်ရ။

ပ္ဍဲဂိတုအံက်တဝ်ဗာ ၂၅ ဂှ်လေဝ် ကောန်ဍုၚ်သေံ မသှ်ေဂျိုၚ်တဴဒၟံၚ် ၃၂၀ တၠဂှ်ဝွံ နကဵုအရီုဗၚ်ထံက်ပၚ် အလဵုအသဳသေံဂှ် နူကဵုဍုၚ်အေဿရေ ကလေၚ်စိုပ်ကၠုၚ် ဍုၚ်သေံအိုတ်ရ။

အတိုၚ်ဂလာန် ကောန်ဍုၚ်သေံစဴဍုၚ်မွဲတၠ အာယုက် ၃၂ သၞာံ မကၠောန်ကၠုၚ် ပ္ဍဲကဵုကၠအ်တဵုလွဳ ဗ္ဒါဲပယျဵုအေဿရေ−လက်ဗနန် ပွိုၚ် ၈ သၞာံပြၚ်ဂှ်မ္ဂး အခိၚ်ပရေၚ်ဗ္တိုက်က္တဵုဒှ်ဂှ် ညး ကေုာံ ကောန်ဍုၚ်သေံတၞဟ်ဟ် ၂ တၠတံ သွက်ဂွံအောပ်မာ ပ္ဍဲကဵုဗ္ဒိုပ် ဗ္ဒါဲသၞေဟ်ကၚ်ဒပ်ပၞာန်အေဿရဂှ်ေ ဒးဒုၚ်ကဵုလဝ်ဇြဟတ်ဂရိုဟ်ရ။

ကြဴနူဂှ်တုဲ အခိၚ်အကာဲအရာ ကလေၚ်ဒှ်ကၠုၚ် ပကတိဂှ် တၠကမၠောန်ဂှ် ကဵုကောန်ဍုၚ်သေံဂမၠိုၚ် လုပ်လဝ်ကမၠောန်ဂှ် ဟီုကဵု အ္စာပရိုၚ်ဂမၠိုၚ်ရ။

ဟိုတ်နူဂွိၚ်ဒၟံၚ်ကဵု ပရေၚ်ဂီုကၠီုညးဂှ်ရ သ္ဂုတ်သွာတ်ထောံလဝ် သွက်ဂွံကလေၚ်စဴ ဍုၚ်သေံမွဲဟေၚ်တုဲ တၠကမၠောန်ဂှ်လေဝ် သြန်ဂိတုၜါဂိတု သွက်ဂွံကဵုသှ်ေဒၟံၚ်ဂှ် ဟွံကဵုလဝ်ပုဟ်ဂှ် ဟီုဂးလဝ်ရ။

ကောန်ကလောန်ဆုဲပြံၚ် ကောန်ဍုၚ်သေံ စိုပ်ဍုၚ်အေဿရေဂမၠိုၚ် ယဝ်ရစဴဍုၚ်မ္ဂး ဒးကဵုပရိုၚ် ကုရုၚ်သၟာကမၠောန် ခရိုၚ်ဒေသန္တရ ဒၞါဲညးတံမံၚ် မၞုံအပ္ဍဲဍုၚ်သေံဂှ်ဏောၚ်ဂှ် ဌာနဝန်ဇၞော်သၟာကမၠောန်ဍုၚ်သေံ လလောၚ်ပ္တိတ်လဝ်ရ။

ကဵုပရိုၚ်သာ်ဏံတုဲ နူကဵုဌာနဝန်ဇၞော်သၟာကမၠောန်တံဂှ်မွဲကဆံၚ် ကဵုအာပရိုၚ် ကုဌာနဝန်ဇၞော်ကာဍုၚ်သ္အာၚ်တံဏောၚ်ဂှ် သ္ဂးရ။

ကြဴနူဂှ်တုဲ ကဵုပရိုၚ် ဇရေၚ်သၟိၚ်တၠအဝဵု အေဿရေတံတုဲ သွက်ကောန်ဍုၚ်သေံတံ ဂွံစဴဗွဲမဂီုကၠီုဂှ် လေပ်ဖန်ဇန်တဴရောၚ် ဂွံတီကေတ်ရ။

လၟိဟ်ကောန်ဍုၚ်သေံ နူကဵုအေဿရေ မကလေၚ်စိုပ်ကၠုၚ်ဍုၚ်သေံဂှ် ၄၁၅၀ တၠ နွံတုဲ လၟိဟ်ကောန်ဍုၚ်သေံ မပၠောပ်လဝ်စရၚ် သွက်ဂွံစဴသ္ၚိ ပ္ဍဲကဵုရုၚ်ကလုတ်သေံ ဖျေံသ္ဇိုၚ်အေဿရဂှ်ေ ၈၄၀၀ တၠပြၚ်နွံရောၚ် ဂွံတီကေတ်ရ။

Ref: Thai PBS World