ပ္ဍဲကျာ်ထဝ် ဟိုတ်နူဒပ်ပၞာန်ပန်ဖျေံလွဟ်ဇၞော်တုဲ ကောန်အရာပ် ၃ တၠ ဒးလဝ်ဘဲဝပ်

ကျာ်ထဝ်၊ အံက်တဝ်ဗာ(၂၈)

တွဵုရးဍုၚ်မန်၊ ပွိုၚ်ဍုၚ်ကျာ်ထဝ်၊ ပ္ဍဲကွာန်​ငှေက်ပျဝ်တဝ် ဟိုတ်နူဒပ်ကံၚ်ဇြဳပၞာန် ပန်ဖျေံလွဟ်ဇၞော်တုဲ ကောန်အရာပ် (၃) တၠ ဒးလဝ်ဘဲဝပ်ရဂှ် ဗော်သွးကောန်ဂကူကရေၚ် KNU ခရိုင်သဓီု လလာင်တြးလဝ် ပ္ဍဲဂိတုအံက်တဝ်ဗာ စၟတ်တ္ၚဲ (၂၇) ရ။

ပ္ဍဲဂိတုအံက်တဝ်ဗာ စၟတ်တ္ၚဲ (၂၂) တုဲကၠုၚ်တေံဂှ် နူကဵုဒပ်ပၞာန်တိုက်ကံၚ်ဇြဳပၞာန် စၟတ်(၂) ဖျေံသ္ဇိုၚ်ပွိုၚ်ဍုၚ်ကျာ်ထဝ် ပန်ဖျေံလဝ်လွဟ်ဇၞော် ပ္ဍဲကွာန်​ငှေက်ပျဝ်တဝ် ၂ မရ။

မကမ်လွဟ်ဇၞော်ကံၚ်ဇြဳပၞာန် ပန်ဖျေံလဝ်ဂှ် ဒတုံစှ်ေပါ်ခတိုဟ်လဝ် ပ္ဍဲကၠအ်ဥူထောန်ဝေန် ဒၟံၚ်ကွာန်​ငှေက်ပျဝ်တဝ်ရ။

ဟိုတ်နူလွဟ်ဇၞော်ပါ်ခတိုဟ်လဝ်တုဲ ဥူထောန်ဝေန်အယုက် ၄၀ သၞာံ၊ ဒဝ်ကတုမ်မ ကေုာံ ဒဝ်မိဝေန် အယုက် ၃၀ တအ် ဒးလဝ်ဘဲဝပ်ကဝေက်မကမ် ပ္ဍဲတဲ သီုပ္ဍဲက္ဍိုပ်ညးသ္ကအ်ရ။

ပ္ဍဲကဵုညးဒးလဝ်ဘဲဝပ်မကမ်လွဟ်ဇၞော်တအ်ဂှ် ဒဝ်ကတုမ်မဂှ် ပလံၚ်ဗစိုပ်လွဳလွတ်လဝ် ပ္ဍဲရုၚ်ဂဥုဲညးဍုၚ်ကွာန် ပွိုၚ်ဍုၚ်ကျာ်ထဝ်တုဲ စဵုကဵုတ္ၚဲဏံ ဟွံဂွံကလေၚ်စှ်ေကၠုၚ် နူရုၚ်ဂဥုဲဏီရဂှ် ညးဒေသတအ် ဟီုကဵု ဌာန်ပရိုၚ်သြၚ်လောန်တိုၚ်မ်ရ။

ဒပ်ကံၚ်ဇြဳပၞာန်ဂှ် ပ္ဍဲဂိတုအံက်တဝ်ဗာ စၟတ်တ္ၚဲ (၂၂) ဂှ် ဟိုတ်နူဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA၊ PDF တအ် ကၠုၚ်စိုပ်ဗတိုက်လဝ်ဗဒိုပ်ဗၠာဲသၟိၚ်ကြုက်ကပေါဝ်တုဲ ပန်ဖျေံဏာလဝ်လွဟ်ဇၞော် ပ္ဍဲကွာန်မၞုံပွိုၚ်ဍုၚ်ကျာ်ထဝ် KNU ရ။

ပ္ဍဲဂိတုအံက်တဝ်ဗာ စၟတ်တ္ၚဲ (၁၉) တုဲကၠုၚ်တေံလေဝ် ဟိုတ်နူဒပ်ကံၚ်ဇြဳပၞာန် ဖျေံလဝ်ဗဒိုပ် ပ္ဍဲကွာန်လေတ်ပ ပွိုၚ်ဍုၚ်ကျာ်ထဝ်ဂှ် ပန်ဖျေံလဝ်လွဟ်ဇၞော်တုဲ ညးဗြဴဒၟံၚ်ကွာန်မေဝ်ယုမ်မွဲတၠ ဒးလဝ်ဘဲဝပ်ရဂှ် ဂွံတီကေတ် အတိုၚ်တၚ်လောၚ်တြး KNU ခရိုၚ်သဓီု လလောၚ်တြးလဝ်ရ။

ပရိုၚ် – သြၚ်လောန်တိုၚ်မ်

ဗီု – KNU