ပ္ဍဲကအ်ကြိက် ပေါဲဗတိုက်သ္ကာတ်မြဟ်ဒၟံၚ်

ကအ်ကြိက်၊ အံက်တဝ်ဗာ(၂၈)

ပ္ဍဲလ္တူဍုၚ်ကအ်ကြိက် တွဵုရးကရေၚ်ဂှ် သ္ပတံနူ ဂိတုအံက်တဝ်ဗာ စၟတ်တ္ၚဲ (၂၇) အခိၚ်နူဂယးပြဟ်တုဲ အကြာဒပ်ကံၚ်ဇြဳပၞာန်ကဵု ဂကောံဇြဟတ်ပၠန်ဂတးတအ် ပေါဲဗတိုက်ၜါလ္ပာ် သ္ကာတ်မြဟ်က္တဵုဒှ်ဒၟံၚ်ရဂှ် ဂွံတီကေတ် နူတံရိုဟ်တၚ်ဂၞၚ်ပရိုၚ် ပ္ဍဲဗလးမုက်တိတအ်ရ။

ပ္ဍဲတ္ၚဲဂှ် သ္ပတံနူ အခိၚ်နူဂယး (၅) နာဍဳကဝက်တုဲ ဂကောံဇြဟတ်ပၠန်ဂတးတအ် စလုပ်ဗတိုက်လဝ် ဒၞာဲဒပ်ကံၚ်ဇြဳပၞာန်ဖျေံသ္ဇိုၚ် နွံလ္တူဍုၚ်ကအ်ကြိက်တအ်ရ။

ပြဟ်ဟ်ဏံ ပ္ဍဲရုၚ်မပ္တံကဵု ရုၚ်ဗၠာဲသၟိၚ် သၟဝ်တဲကံၚ်ဇြဳပၞာန်၊ ရုၚ်ဒပ်ပရေၚ်ဂီုကၠီု ဆေၚ်ကဵုသွာၚ်ပၞာန်တအ် ဟွံအောန်နူ ၃ ရုၚ် ဂကောံဇြဟတ်ပၠန်ဂတးတအ် သီကေတ်စံၚ်ပလီုလဝ်ရ။

ပ္ဍဲပေါဲဗတိုက်ဂှ် လ္ပာ်ဒပ်ကံၚ်ဇြဳပၞာန် ပရေၚ်ဇီုကပိုက်ချိုတ်ဂျိုၚ် နွံတုဲ လွဟ်လက်နက်မကမ်တအ်လေဝ် သီဂွံလဝ်ရဂှ် ဂွံတီကေတ် အတိုၚ်ဗီုရုပ်ဂမျိုၚ်စၟတ်သမ္တီ တိုန်ကၠုၚ်လဝ် ပ္ဍဲဇာနှိက်ပရေၚ်မၞိဟ် အခိၚ်လၟုဟ်ပြဟ်ဟ်ဏံရ။

ညးတာလျိုၚ်ဂကောံဇြဟတ်ပၠန်ဂတး မွဲတၠဂှ်မ္ဂး ပေါဲဗတိုက် လ္တူဍုၚ်တအ်ဂှ် ဆက်ဒှ်ဒၟံၚ်တုဲ ပ္ဍဲကဵုဒၞာဲလ္ၚဵုဂှ် သၠဲပ္တိတ်မာန်လဝ်တုဲ ပ္ဍဲဂိတုအံက်တဝ်ဗာ စၟတ်တ္ၚဲ (၂၇) အခိၚ်ဇိုၚ်သဝ်တ္ၚဲ (၃) နာဍဳဂှ် ဟီုလဝ်ကဵု ဌာန်ပရိုၚ်သြၚ်လောန်တိုၚ်မ်ရ။

ဟိုတ်နူပေါဲဗတိုက်ၜါလ္ပာ် ဒှ်လဝ်လ္တူဍုၚ်ကအ်ကြိက်တုဲ ညးဒေသ မၞုံလ္တူဍုၚ်တအ် ဒးဒုၚ်ကၟာတ်ဂွံလဝ် နွံဒၟံၚ်တုဲ ဟိုတ်နူလွဟ်ဇၞော် ဒတုံစှ်ေပါ်ခတိုဟ်လဝ် ပ္ဍဲဍုၚ်တုဲ ညးဒေသလ္ၚဵု ဇီုကပိုက်ဒးလဝ် နွံဒၟံၚ်ရဂှ် ဂွံတီကေတ်ရ။

ဟိုတ်နူပေါဲဗတိုက်ၜါလ္ပာ်တုဲ ပ္ဍဲကဵုဂၠံၚ်ဇၞော်အာယှ ဒှ်ဂၠံၚ်ကူသာန်ဗၞိက် ပယျဵု သေံ-ဗၟာ ဂှ် ကွဳစက်ညးအာတရဴတအ် ကၟာတ်ဒၞာဆိုအ်ဗဒၟံၚ်တုဲ ကၟာတ်လဝ်အခေါၚ်တတ်ကၠောံအာကၠုၚ်ရဂှ် ဂွံတီကေတ် နူညးအာတရဴတအ်ရ။

ဟိုတ်နူပေါဲဗတိုက်ဒှ်ဒၟံၚ် လ္တူဍုၚ်ကအ်ကြိက်ကဵု ပရိုၚ်ဂကောံဇြဟတ်ပၠန်ဂတးတအ် လုပ်စိုပ်ဗတိုက် ဍုၚ်မြဝတဳတုဲ ဒပ်ကံၚ်ဇြဳပၞာန်ကဵု ဒပ်မၚ်ပယျဵု BGF တအ် ဂလိုၚ်ပတိုန်လဝ် ဇြဟတ်ဂီုကၠီု ပ္ဍဲဍုၚ်မြဝတဳတအ်ရဂှ်လေဝ် တံရိုဟ်ပရိုၚ် BGF တအ် ဟီုထ္ၜးလဝ်ရ။

ပ္ဍဲဂိတုအံက်တဝ်ဗာ စၟတ်တ္ၚဲ (၂၄) တုဲကၠုၚ်တေံလေဝ် ပ္ဍဲကဵုပေါဲဗတိုက်ၜါလ္ပာ် ဒှ်လဝ် ဗ္ဒာဲကွာန်ဇြေန်ကုမ် ဍုၚ်ကအ်ကြိက်ဂှ် လ္ပာ်ကံၚ်ဇြဳပၞာန် ပါလုပ်သီုသ္ကိုပ်တံဒပ် ဒးချိုတ်လဝ် (၁၁) တၠတုဲ ဒပ်ကံၚ်ဇြဳပၞာန် သုၚ်စောဲလွဟ်ဇၞော် သီုက္ၜၚ်ကျာ ပန်ရီုလဝ်ရဂှ် ဂွံတီကေတ် အတိုၚ်တၚ်လောၚ်တြး KNU ရ။

ပရိုၚ် – သြၚ်လောန်တိုၚ်မ်

ဗီု – PDF