မတ်မလီု – အံက်တဝ်ဗာ (၂၈)
ကမၠောန်ပရေၚ်ဂီုကၠီု ကေုာံ ပရေၚ်အုပ်ဓုပ်တအ်ဂှ် ၜိုတ်သ္ပမာန် ဂ္စာန်ပ္တိတ်ဇြဟတ်တုဲ သွက်ဂွံရေၚ်တၠုၚ်အာ ညံၚ်ဂွံစိုပ်တရဴညးသ္ကအ်ဂှ် သ္ကိုပ်ဝန်ဇၞော် အလဵုအသဳညဳသၟဟ်ကောန်ဂကူ မာန်ဝေန်ခိုၚ်တာန် ဟီုလဝ်ရ။
ပ္ဍဲကဵုကောံဓရီု ကဝ်မတဳဓမံက်ရုပ်ရဴပရေၚ်အုပ်ဓုပ်ညးဍုၚ်ကွာန် ဒေသန္တရကာလအကြာဗဟဵု လၟေၚ် (၄၃/၂၀၂၃) အလဵုအသဳညဳသၟဟ်ကောန်ဂကူ ကၠောန်ဗဒှ်လဝ် ပ္ဍဲဂိတုအံက်တဝ်ဗာ စၟတ်တ္ၚဲ (၂၆) တုဲကၠုၚ်တေံဂှ် ဟီုဂးလဝ်သာ်ဏံရ။
“ဟိုတ်နူဒှ်ဒၟံၚ်ကာလပၠန်ဂတးဂှ်ရ သွက်ဂွံက္လိဂွံ ပရေၚ်ညိၚ်ဝတ်ၜိုဟ်လလံဟီုဂှ် ဝါတ်ဂါတ်မံၚ် ၜိုန်ဒှ်ဍာံကီုလေဝ် ကမၠောန်ပရေၚ်ဂီုကၠီုကဵု ပရေၚ်အုပ်ဓုပ်သၞောဝ်ဓဝ်ဂှ်တှ်ေ ၜိုတ်သၟဟ်အစောံ ပ္တိတ်ဇြဟတ်တုဲ သွက်ဂွံရေၚ်တၠုၚ်အာ ညံၚ်ဂွံစိုပ်တရဴ နွံဒၟံၚ်ပၟိက်ရ” ဂှ် သ္ကိုပ်ဝန်ဇၞော်ဟီုလဝ်ရ။
သွက်ဂွံရေၚ်တၠုၚ်ကဵု ကမၠောန်ကဵုရီုဗၚ် ဆေၚ်ကဵုအရီုဗၚ်ဗ္စာရဏာပရေၚ်မၞိဟ်၊ ကမၠောန်ဒုၚ်ကာပရေၚ်ထတ်ယိုတ် ကေုာံ ကမၠောန်ပရေၚ်ဗ္တောန်ပညာ မဒှ်လၟေၚ်ကမၠောန်ဒုၚ်ကာညးဍုၚ်ကွာန်တအ်မာန်ဂှ်လေဝ် ဟိုတ်နူဒှ်လၟေၚ်ကမၠောန် ပၟိက်ကိစ္စဇၞော်ဒၟံၚ်ဂှ်ရ နကဵုဝန်ဇၞော်မဆေၚ်စပ်တအ် သွက်ဂွံပ္တိတ်ဇြဟတ်ရေၚ်တၠုၚ်အာဂှ်လေဝ် ဗတိုက်ဖ္အောဝ်လဝ်ရ။
ကောံဓရီုဏံ သ္ကိုပ်ဝန်ဇၞော် NUG မာန်ဝေန်ခိုၚ်တာန် က္ဍိုက်က္ဍိုပ်တုဲ ဝန်ဇၞော်ဂကောံအလဵုအသဳဂမၠိုၚ် ဒုတိယဝန်ဇၞော်ဂမၠိုၚ်၊ ဝန်အပ္ဍဲဒ္တန်ဂမၠိုၚ်၊ ဖက်ဆောဝန်အပ္ဍဲဒ္တန်ဂမၠိုၚ်တအ်ကဵု ညးတာလျိုၚ်ဌာနမဆေၚ်စပ်တအ် တိုန်စိုပ်လဝ်ရ။
ညးလုပ်ဂကောံကဝ်မတဳဗဟဵုပရေၚ်ဓမံက်ရုပ်ရဴပရေၚ်အုပ်ဓုပ်ညးဍုၚ်ကွာန် ဒေသန္တရကာလအကြာ တိုန်စိုပ်ကၠုၚ်တအ်ဂှ် စပ်ကဵုတၚ်သ္ဂုတ်သွာတ်၊ လၟေၚ်ကမၠောန်အဓာန်ဂတ ဖျေံလဝ် ပ္ဍဲ (၄၂/၂၀၂၃) တအ်တုဲ သဳကၠဳလဝ် အကာဲအရာအာစိုပ်ဒတုဲ ကေုာံ လၟေၚ်ကမၠောန်သှ်ေဒၟံၚ် သွက်ဂွံဒးဆက်ကၠောန်ရေၚ်တၠုၚ်တအ်ရဂှ် ဂွံတီကေတ်ရ။
ပရိုၚ် – သြၚ်လောန်တိုၚ်မ်
ဗီု – NUG
sanlontai