ဒပ်ပံၚ်ကောံတအ် သီဂွံလဝ် ဍုၚ်ချေန်ယှိုဲဟဝ်

ချေန်ဟဝ် – အံက်တဝ်ဗာ(၂၈)

ဒပ်ပၠန်ဂတးတအ် သီကေတ်လဝ် သၞေဟ်ကၚ်လုပ်ဍုၚ်၊ ဗဒိုပ်ဗၠာဲသၟိၚ်ဖောၚ်ဇြုက် ကေုာံ ကုန်ဗျူဟာဒပ်ပၞာန် ယျဝ်ဗာတဝ် ပ္ဍဲဍုၚ်ချေန်ယှိုဲဟဝ်၊ တွဵုရးသေံသၟဝ်သ္ကုတ်ကျာတအ်ရဂှ် ဓမံက်ထ္ၜးလဝ် ပ္ဍဲမဳဒဳယာဒေသဂှ်ရ။

တ္ၚဲဏံ သ္ပတံနူ အခိၚ်နူဂယးပြဟ်ဂှ်တုဲ ဓမံက်လဝ်ရုပ်ရဴ ချဳဒရာၚ်လဝ်ပၞာန် ပ္ဍဲလာယှိုဝ်၊ သန္နဳ၊ ကွောတ်ခိုၚ်၊ တာမိုဝ်နေဝ်၊ ဏာမ်ဖေတ်ကာ၊ ဏာမ်ခါမ်၊ ဇြေဝ်လာန်၊ ကွောန်လုမ်၊ ဟိုဝ်ပါန်၊ ချေန်ယှိုဲဟဝ် ကေုာံ ဍုၚ်လောက်ကိုၚ်တအ် မွဲဒမြိပ်ဓဝ်ရ။

MNDAA၊TNLA ကေုာံ ULA/AA မဒှ်ဂကောံမဟာမိတ်ကောဒေံ (၃) ဂကောံတအ်ဂှ် ဒေသတၟေၚ် (၁) ကဵု ဍုၚ်လောက်ကိုၚ်တအ်ဂှ် စချဳဒရာၚ် ပရေၚ်ဗတိုက်သရိုဟ်ကုတ်ဗပိုတ်ရိုဟ်ကၞက် ကံၚ်ဇြဳပၞာန် (၁၀၂၇) ရဂှ် ကဵုလဝ်သမ္တီရ။

ပ္ဍဲကဵုပေါဲဗတိုက် ချေန်ယှိုဲဟဝ်ဂှ် ဗၠာဲသၟိၚ်သၟဝ်တဲကံၚ်ဇြဳပၞာန်တအ် ဒးချိုတ်လဝ် ဗွဲမဂၠိုၚ်နွံတုဲ မၞိဟ်ဂြိပ်ဗၠးတိတ်အာတအ်ဂှ်လေဝ် နွံတုဲ ဒဒန်ဏာမ်တုၚ် မၞုံလ္တူဂၠံၚ် သိန္နဳ-ကွောန်လုံ-ဟိုဝ်ပါန်-ပိုၚ်မဝ် ပွိုၚ်ဍုၚ်ဟိုဝ်ပါန် ဂၠံၚ်အာချေန်ယှိုဲဟဝ်ဂှ် ဒးဒုၚ်ဖံက်ခတိုဟ်လဝ်တုဲ လီုလာ်အာလဝ်ရဂှ် ညးဒေသတအ်ဟီုလဝ်ရ။

အခိၚ်လၟုဟ်ဏံ ဟိုတ်နူပေါဲဗတိုက်ၜါလ္ပာ်တုဲ ပ္ဍဲကဵုပယျဵုလ္ပာ်ကြုက် သၠုၚ်ပ္တိုန်လဝ်ပရေၚ်ဂီုကၠီုတုဲ ပရေၚ်ကူသာန်ဗၞိက်ပယျဵုဂှ်လေဝ် ဒေါံဒေၚ်အာလဝ်ပေၚ်ၚ်ရဂှ် ဂွံတီကေတ်ရ။

ဍုၚ်ချေန်ယှိုဝ်ဟဝ် ဂကောံဇြဟတ်ပၠန်ဂတးတအ် သီဂွံလဝ်ဂှ် ဒှ်ပွိုၚ်ဍုၚ်စုက်လုက်ဒၟံၚ်ကဵု ပယျဵုဒၞက်ကၟိန်ဍုၚ်ကြုက် မွဲပွိုၚ်ဍုၚ်တုဲ လ္ပာ်ကြုက်ဂှ် ပံက်ကဵုလဝ်ဂၠံၚ် သွက်သၟာဒဒိုက်တအ် ဗွဲမလုပ်သၞောဝ်ရဂှ် ဂွံတီကေတ်ရ။

ပရိုၚ် – သြၚ်လောန်တိုၚ်မ်

ဗီု – Social Media