စချဳဒရာၚ်ပၞာန် ၁၀၂၇ ယျဂှ် ဂကောံကောဒေံ ၃ ဂကောံ လလောၚ်တြး

လာယှိုဝ်၊ အံက်တဝ်ဗာ(၂၈)

ပရေၚ်ချဳဒရာၚ်ပၞာန် ၁၀၂၇ သွက်ဂွံဗတိုက်သရိုဟ် ကံၚ်ဇြဳပၞာန်ကဵု ဒပ်ပၞာန်ညးဍုၚ်ကွာန်ဂှ် စချဳဒရာၚ်လဝ်ရဂှ် ဂကောံရခေၚ် (AA)၊ ဂကောံကိုဝ်က MNDAA ကေုာံ ဂကောံတအာၚ် TNLA တအ် လလောၚ်တြးပ္တိတ်လဝ် ပ္ဍဲဂိတုအံက်တဝ်ဗာ စၟတ်တ္ၚဲ (၂၇) အခိၚ်နူဂယး (၉) နာဍဳပြၚ်ၚ်ဂှ်ရ။

ပရေၚ်ချဳဒရာၚ်ပၞာန်ဂကောံကောဒေံ ၃ ဂကောံဏံဂှ် ဟိုတ်နူစကၠောန်ချဳဒရာၚ်လဝ်ပ္ဍဲဂိတု ၁၀ စၟတ်တ္ၚဲ ၂၇ တုဲ ကဵုလဝ်ယၟု ၁၀၂၇ ရဂှ် ဂွံညာတ်ကေတ်ရ။ ဂကောံကောဒေံ ၃ ဂကောံဂှ် သွက်ဂွံစဵုဒၞာ လမျီုသ္ၚိဌာန်ညးဍုၚ်ကွာန်တအ်မာန်ကီု သွက်ဂွံဒုၚ်ဒဝ်စဵုဒၞာ ဇကုဇကုမာန်ကီု သွက်ဂွံထိၚ်ဒဝ်အုပ်ဓုပ်ဒေသဇကု လ္တူနူဏံမာန်ကီု သွက်ဂွံတာဒၞာ ပရေၚ်ကံၚ်ဇြဳပၞာန် ပန်ဖျေံနၚ်လွဟ်ဇၞော် ပ္ဍဲလ္တူဂကောံဇကု နူကဵုပၞာန်ကျာမာန်ကီုတုဲ ပံၚ်တောဲလလောၚ်တြးကၠုၚ်လဝ် ဗီုလၟုဟ်ဏံရ။

သ္အာၚ်နူဂှ်ပၠန် သွက်ပရေၚ်သၞောတ်တၠအဝဵုပၞာန်ရိုဟ်ကၞက်ဂွံပိုတ်ဂွံအိုတ်အာကီု၊ သွက်ပရေၚ်လီဠာန်ဝေၚ်ၛၚ်လံၚ်သြန်အောန်လာၚ် သၠဲတြးကၠုၚ်ပ္ဍဲကၟိန်ဍုၚ်သီုကဵုပယျဵုဒၞက် ကြုက်-ဗၟာဂွံကၠေံအိုတ်အာကီု သွက်ဂွံပံက်မုက်ပၞာန်ကဵုကုမ္ပဏဳဂုၚ်အောန်လာၚ်ကဵု ဂကောံပွံၚ်ကံၚ်ဇြဳပၞာန်ကၠောန်ဒၟံၚ်ပ္ဍဲကမၠောန်တအ်ဂှ်ရ။

တ္ၚဲဏံ သ္ပတံနူ အခိၚ်နူဂယး ၜိုတ် (၄) နာဍဳတုဲ ဂကောံကောဒေံ (၃) ဂကောံတအ်ဂှ် သၞေဟ်ကၚ်ဒပ်ကံၚ်ဇြဳပၞာန်၊ ဗဒိုပ်ဗၠာဲသၟိၚ် ဒပ်ပၞာန်ဖျေံသ္ဇိုၚ်ပ္ဍဲဍုၚ် ဖျေံလဝ်ဗဒိုပ် မၞုံတွဵုရးသေံသ္ကုတ်သၟဝ်ကျာတအ်ဂှ် လုပ်ဗတိုက်ဒၟံၚ် မွဲကရောံကဵု ဒပ်ပၞာန်ဗၠးၜးကောန်ဂကူကချေၚ် (KIA) တအ်မွဲဒမြိပ် မွဲအခိၚ်ဓဝ်ရ။

ဂကောံကောဒေံ ၃ ဂကောံဂှ် ပ္ဍဲမွဲကာလ ဗ္ဒာဲပွိုၚ်စှ်ဗွဝ်သၞာံဏံ ပ္ဍဲဝိုၚ်ခုၚ်တက်ကျာပရေၚ်ဍုၚ်ကွာန်သၟးဟေၚ်ဟွံသေၚ် ပ္ဍဲကဵုဗလးမုက်ပၞာန်လေဝ် ညးမွဲကဵုမွဲ လုပ်ကၠုၚ်ပေါဲဗတိုက် နကဵုပရေၚ်ဒုၚ်သၠးဆီပဠက် ကောံကောံကလောံကလောံ မွဲစွံတုဲ ဒှ်မဟာမိတ်ကောဒေံ ပရေၚ်ဍုၚ်ကွာန် ပရေၚ်ပၞာန်ရဂှ် ဟီုလဝ်ရ။

တၚ်ရန်တၟံ ပရေၚ်ဍုၚ်ကွာန် မွဲဂကောံဂှ် ဂကောံသှ်ေမွဲဂှ် သ္ပရှ်ေသှ်ေ သ္ပစၟတ်သမ္တီတုဲ ကိစ္စလဵုဟွံဟီု နကဵုစေတနာဍာံဍာံပြပြ ရီုဗၚ်ကဵုလဝ် နဲကဲခိုဟ်အိုတ်တုဲ ပြဒ္ဒညာမွဲဂကောံဂှ် ဒှ်ပြဒ္ဒညာသီုပိဂကောံ ဖျေံလဝ်မူဝါဒတုဲ စဵုကဵုအခိၚ်တ္ၚဲဏံ ပံၚ်တောဲရေၚ်တၠုၚ်ဒၟံၚ်ရဂှ် ဓမံက်ထ္ၜးလဝ်ရ။

ဂကောံမဟာမိတ်ကောဒေံ ၃ ဂကောံဂှ် ၜိုန်ရဒးဒုၚ်လဝ်ဘဲဒဏ် တၚ်ကော်ချဴဴဴပရေၚ်ဍုၚ်ကွာန် ပရေၚ်ပၞာန် ဟွံတုပ်သၟဟ်ကဵု ဂကောံပၠန်ဂတးရပ်လွဟ်တၞဟ်သ္အာၚ် ဗ္ဒာဲမွဲဗွဝ်စှ်သၞာံ မွဲစွံကီုလေဝ် ဂါံကွာ်ကၠုၚ်ဒၟံၚ် နကဵုတၚ်ဒုၚ်ဂိုၚ်ကေတ် ဟွံဒေါမ်ဒစေၚ်တုဲ ပါဲနူလုပ်ဒၟံၚ်ပေါဲဗတိုက်မွဲစွံတုဲ ပံၚ်တောဲအာ ခိုၚ်ၚ်ဗိုန်န်တုဲ ဒတူလာၚ်အာရောၚ်ဂှ် ဓမံက်ထ္ၜးလဝ် ပ္ဍဲတၚ်လလောၚ်တြးရ။

ပရိုၚ် – သြၚ်လောန်တိုၚ်မ်

ဗီု – Social Media