ထဝါဲ၊ အံက်တဝ်ဗာ (၂၈)
နကဵုညးဍုၚ်ကွာန်ဂမၠိုၚ် သ္ဘၚ်ဗလးဗဗၚ်ထဝါဲ အခိုက်ကၞာထဝါဲ ကံၚ်ဇြဳပၞာန် သ္ကိုပ်သ္ကတုဲ မကၠောန်ဗဒှ်အာ ပ္ဍဲကဵုပွိုၚ်ဍုၚ်ထဝါဲ၊ ရးဒေသဇၞော်တၞၚ်သဳဂှ် လ္ပပါလုပ်အာစိုပ်အိုတ်ညိဂှ် ဂကောံဇြဟတ်ပၠန်ဂတးတံကဵု ညးချဳဒရာၚ်ပရေၚ်ဒဳမဝ်ကရေဇြဳတံ ဖ္တိုက်ဖ္အောဝ်လဝ်ရ။
ကံၚ်ဇြဳပၞာန်သီအဝဵုဝွံ ပ္ဍဲတ္ၚဲဂိတုဝှ်ပေၚ် ဂိတုအံက်တဝ်ဗာ ၂၉ ကၠုၚ်စိုပ်ဏံ သ္ဘၚ်ဗလးဗဗၚ် အခိုက်ကၞာထဝါဲဂှ် စဳဇန်လဝ် သွက်ဂွံကၠောန်ဗဒှ်အာ ပ္ဍဲကဵုဇိုၚ်ၜဳ ဍုၚ်ထဝါဲ စဳစဳရ။
သ္ဘၚ်ဗလးဗဗၚ် အခိုက်ကၞာထဝါဲ ကံၚ်ဇြဳပၞာန် မကၠောန်ဗဒှ်အာဂှ် ဗ္စာရဏာကုညးဍုၚ်ကွာန် မ္ဒးစံၚ်တဴဒှ်ဒၟံၚ်လၞီ အလုံဍုၚ်မွဲတံဂှ်တုဲ ညံၚ်ဂွိုအ်ကၠောန်သ္ပပါလုပ်ဂှ် ဂကောံဇြဟတ်ပၠန်ဂတးဒေသ ၆ ဂကောံတံ လလောၚ်ပ္တိတ်လဝ် တၚ်ဒုၚ်ဂုဏ် ပ္ဍဲဂိတုအံက်တဝ်ဗာ ၂၄ တေံရ။
ညးဒုၚ်တာလျိုၚ်လလောၚ်ပရိုၚ် ထဝါဲ−ပကဖ ကိုဝ်ယံၚ်နဳဂှ် ပ္ဍဲကဵုပွိုၚ်ဍုၚ်ဍာ်ဗု ကေုာံ ပွိုၚ်ဍုၚ်တယိတ်ချံၚ် မၞုံအပ္ဍဲခရိုၚ်ထဝါဲတံဂှ် ဟိုတ်နူသ္ၚိဒၟံၚ်ညးဒေသတံ ဒးဒုၚ်စံၚ်ပလီုပလာ်၊ ညးဍုၚ်ကွာန်ကောန်အရာပ်တံ ဒးဒုၚ်ဂစိုတ်ဒၟံၚ်တံဂှ်ရ နကဵုစိုတ်ဗ္စာရဏာ ညံၚ်ဂွိုအ်ပါလုပ်ဂှ် နွံပၟိက်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
သ္ဘၚ်ဗလးဗဗၚ် အခိုက်ကၞာထဝါဲဂှ်ဝွံ ဟိုတ်နူဒှ်ယေန်သၞာၚ်အခိုက်ကၞာ ဂကူထဝါဲတံ ပိုၚ်ပြဳလဝ်ဂှ်ရ သ္ဘၚ်ဗလးဗဗၚ် ကံၚ်ဇြဳပၞာန် မကၠောန်ဗဒှ်ဂှ် လ္ပအာမွဲသာ် နအစဳဇန်ဇကုဇကု ကၠောန်ဒၞါဲတၞဟ်ခြာတံထေက်ဂှ် ကမ္မတဳဗကပ်ဗဗၚ် ခရိုၚ်ထဝါဲ ကိုဝ်မေန်လွေန်ဥူ ကဵုလဝ်ကသပ်ရ။
ညးဍုၚ်ကွာန်ထဝါဲ ဗွဲမဂၠိုၚ်ဂှ် ပ္ဍဲကဵုသ္ဘၚ်ဗလးဗဗၚ် အခိုက်ကၞာထဝါဲ ကံၚ်ဇြဳပၞာန် မကၠောန်ဗဒှ်ဂှ် ပါလုပ်အာ ဟွံသေၚ်ပုဟ်ဂှ် ဟီုဂးဒၟံၚ်အိုတ်ရ။
တုဲကၠုၚ် ပ္ဍဲဂိတုအံက်တဝ်ဗာ ၂၅ တေံဂှ်လေဝ် ဗ္ဒါဲကၞာထးလဟိၚ်စိုတ် မၞုံဇိုၚ်ၜဳ ဍုၚ်ထဝါဲ မစဳဇန်လဝ် သွက်ဂွံကၠောန်ဗဒှ် သ္ဘၚ်ဗလးဗဗၚ်ထဝါဲဂှ် မာၚ်ဗ္တိုဟ်ထ္ကး က္တဵုဒှ်လဝ်ဏီရ။
ပရိုၚ်−သြၚ်လောန်တိုၚ်(မ်)
ဗီု−CJ
sanlontai