ကိုဝ်က၊ အံက်တဝ်ဗာ (၂၉)
တွဵုရးသေံသၟဝ်ကျာ၊ နကောန်ပၞာန် ကေုာံ ဗၠာဲသၟိၚ်နွံ ပ္ဍဲဒေသကိုဝ်ကတအ်ဂှ် သွက်ဂွံလုပ်ကၠုၚ်ဖျေံလွဟ်ကီု မၚ်မွဲစဵုဒၞာကဵု လမျီုသ္ၚိဌာန်ပိုန်ဒြပ် ညးလုပ်ကၠုၚ်ဖျေံလွဟ်တအ်ရောၚ်ဂှ် ကဝ်မတဳပရေၚ်အုပ်ဓုပ်ပၞာန် ဒေသတၟေၚ်တွဵုရးသေံ (၁) လလောၚ်တြးလဝ် ပ္ဍဲဂိတုအံက်တဝ်ဗာ စၟတ်တ္ၚဲ (၂၈) ရ။
ပရေၚ်အုပ်ဓုပ်ကဆံၚ်ကဆံၚ် ဂကောံကောန်ရုပ်ဂမ္စိုတ်ကိုဝ်က ကေုာံ ညးယိုက်ဝန်ဌာနတအ်ဂှ် တၞးလိက်၊ ဗီုရုပ်၊ စရၚ်အၚ်၊ လိက်ဒကုတ်၊ ကေုာံ လှုဲလှာ် ဆေၚ်စပ်ကဵုတာလျိုၚ်ကမၠောန်ဇကုတအ်ဂှ် သွက်ဂွံထိၚ်ဒက်လဝ် ခိုဟ်ဟ်ဂှ်လေဝ် MNDAA ကဵုလဝ်သမ္တီရ။
ကပေါတ် စကာကဵုထိၚ်ဒက်လဝ်တအ်ဂှ် သီုရန်တၟံနွံနွံ ယဝ်ပလီုပလာ်ထောံမ္ဂး ကေတ်အာအရေဝ် သ္ကာတ်တ်မြဟ်ဟ်တုဲ ၜိုန်ရထိၚ်ဒက်သီဂိုၚ်လဝ် ကပေါတ်တအ်ဂှ်ကီုလေဝ် ယဝ်ရလီုလာ်အာမ္ဂး အခိၚ်ပေါဲဗတိုတ်တုဲဒှ်တေံမ္ဂး ဒးဒုၚ်ကေတ်အာအရေဝ် နကဵုဒုဟ်ဒဏ် တာလျိုၚ်ဟွံပြေရောၚ်ဂှ် ဟီုလဝ်ရ။
လိက်မူဝါဒပရေၚ်သ္ပဂရုမၚ်မွဲဂၠုဲပၞာန်ဂှ် ဟိုတ်နူသီုသွက်ကောန်ဒပ်ကံၚ်ဇြဳပၞာန်တအ် တၞီလုပ်လၟိဟ်ပါလုပ်ဒၟံၚ်ဂှ်ရ ဖျေံလွဟ်တုဲ ညးလုပ်ကၠုၚ်သီုဖအိုတ်တအ်ဂှ် ဂွံအခေါၚ်ဒုၚ်စသိုၚ် မူဝါဒဂၠုဲပၞာန်ပေၚ်ၚ်တုဲ ညးဒးလဝ်ဘဲဝပ်တအ်ဂှ်လေဝ် လွဳလွတ် ကဵုခိုဟ်ဟ်ရောၚ်ဂှ် ဓမံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
ညးက္လိလောန်လဝ် ဒုဟ်ရာဇဝတ် ဒးဒုၚ်ပ္တိတ်လဝ်ဝရာန်ရပ်တအ်ဂှ်မ္ဂး မၞိဟ်ရပ်စရၚ်ညးတအ်၊ မၞိဟ်ပတှ်ေညးတအ် ကေုာံ ဂကောံသ္ၚိကၟိန်ညးတအ် ဒးကၠုၚ်ကဵုပရိုၚ် ပ္ဍဲဇရေၚ် MNDAA တုဲ ညးက္လိလောန်လဝ် ဒုဟ်ရာဇဝတ်ပၞာန်တအ်ဂှ် စဵုဒၞာကဵုလဝ်၊ ပၞုက်စွံလဝ် ကေုာံ ရီုဗၚ်ကဵုသွက်ဂွံဂြိပ်ဗၠးတိတ် ညးကၠောန်သ္ပတအ်ဂှ် ကေတ်အာအရေဝ် ဗွဲမသ္ကာတ်မြဟ်ရောၚ်ဂှ် ဟီုလဝ်ရ။
ကောန်ဒပ်ကံၚ်ဇြဳပၞာန် မၞုံပ္ဍဲဒေသကိုဝ်ကတအ်၊ ကောန်ပၞာန် ဂကောံရုပ်ဂမ္စိုတ်ကိုဝ်ကတအ်၊ ဗၠာဲသၟိၚ် ကေုာံ ညးယိုက်ဝန်ပရေၚ်အုပ်ဓုပ်တအ်ဂှ် ညးကၠုၚ်စိုပ်ဒုၚ်ဝန် ဒုဟ်ဒဏ် နကဵုစိုတ်သမ္တီဇကုဇကု ဇရေၚ် MNDAA တအ်ဂှ် ဒုၚ်တၠုၚ်လဝ် ဗွဲမအိုဟ်တၟိုဟ်တုဲ ပရေၚ်ကဵုဒုဟ်ဒဏ်ဂှ်လေဝ် နကဵုလစွံစိုတ်သၠဲသၠဲလးလး စဳရေၚ်သောၚ်ကလးကဵုအာရောၚ်ဂှ် ကဵုလဝ်သမ္တီရ။
MNDAA မဒှ်ဂကောံကိုဝ်ကဂှ် ပ္ဍဲဂိတုအံက်တဝ်ဗာ စၟတ်တ္ၚဲ (၂၈) မဒှ်တ္ၚဲချဳဒရာၚ်ပၞာန် ၁၀၂၇ ဂကောံကောဒေံသၟဝ်ကျာပိဂကောံ တ္ၚဲဒုတိယဂှ်လေဝ် ထပ်သီဂွံလဝ် ဗဒိုပ်ကံၚ်ဇြဳပၞာန် ပ္ဍဲတွဵုရးသေံသၟဝ်ကျာ (၃) ဗဒိုပ်ပၠန်ရဂှ် လလောၚ်တြးလဝ်ပရိုၚ်ရ။
ပရိုၚ် – သြၚ်လောန်တိုၚ်မ်
ဗီု -Twitter
sanlontai