ထဝါဲ၊ အံက်တဝ်ဗာ(၂၉)
ရးဒေသဇၞော်တၞၚ်သြဳ၊ ပ္ဍဲထံၚ်စာတ်ထဝါဲဂှ် ကောန်ထံၚ်ပရေၚ်ဍုၚ်ကွာန် ဒးဒုၚ်ဖျေံလဝ်ဒဏ်ထံၚ် (၁၃) သၞာံမွဲတၠ ဒးချိုတ်လဝ်ရဂှ် ဇာနှိက်ကောန်ထံၚ်ပရေၚ်ဍုၚ်ကွာန် ထဝါဲ (DPPN) လလောၚ်တြးလဝ်ရ။
ကောန်ထံၚ်ပရေၚ်ဍုၚ်ကွာန် ဥူကျဝ်တုၚ် အယုက် (၄၄) သၞာံဂှ် ပ္ဍဲဂိတုအံက်တဝ်ဗာ စၟတ်တ္ၚဲ (၂၇) အခိၚ်နူဂယး ၜိုတ် ၁၀ နာဍဳဂှ် ဟိုတ်နူဍောၚ်တိုန် မွဲလစုတ်ဓဝ်တုဲ နူကဵုဗဒမ်ဂဥုဲထံၚ် ဃောပလံၚ်ဗစိုပ်ဏာ ရုၚ်ဂဥုဲမ္ၚးဂှ် ဒးချိုတ်အာလဝ်ရ။
အတိုၚ်တၚ်လလောၚ်တြး ဇာနှိက်ကောန်ထံၚ်ပရေၚ်ဍုၚ်ကွာန်ထဝါဲ လလောၚ်တြးလဝ်မ္ဂး ကြဴနူဒပ်ပၞာန်သီအဝဵုတုဲ ပ္ဍဲကဵုထံၚ်စာတ်ထဝါဲဂှ် ကောန်ထံၚ်ပရေၚ်ဍုၚ်ကွာန်မွဲတၠ ဒးချိုတ်လဝ် အလန်ပထမလေဝ် ဒှ်ရ။
ဥူကျဝ်တုၚ် ကောန်ကွာန်ဟေန်ၛောတဝ် ပွိုၚ်ဍုၚ်လံၚ်လုၚ်ဂှ် နူဂိတုမာတ်ချ်တုဲကၠုၚ်တေံ ဃောဒပ်ကံၚ်ဇြဳပၞာန် ထ္ပက်လုပ်ကၠုၚ်ကရောၚ်ပၞာန် ပ္ဍဲကွာန်ဂှ် ဒးဒုၚ်ရပ်လဝ် မွဲကရောံကဵု ဒေံညးမွဲစွံရ။
ကြဴနူဂှ် ၜိုန်ရက္လေၚ်ဗလးပ္တိတ်ကဵုလဝ် ညးမဒှ်ဒေံညးကီုလေဝ် ဥူကျဝ်တုၚ်ဂှ် ဒးဒုၚ်ပံက်လဝ်ဂဗုတ် နကဵုသၞောဝ်ဥပဒေဗတိုက် သရိုဟ်ပွပ္ကီုပရာပ် ၝောံပိုဒ် ၅၁၊ ၅၂၊ ၅၀ (ည) ဒးဒုၚ်ရပ်လဝ်တုဲ ဒးဒုၚ်ဖျေံလဝ်ဒဏ်ထံၚ် ၁၃ သၞာံရ။
ညးစုက်လုက်ကဵု ဂကောံသ္ၚိကၟိန်ညးမွဲတၠဂှ်မ္ဂး ပ္ဍဲကဵုဂိတုအံက်တဝ်ဗာ တုဲကၠုၚ် စၟတ်တ္ၚဲ ၂၆ တေံဂှ် ဂကောံသ္ၚိကၟိန်ညး အာဆဵုဂဗလဝ် ပ္ဍဲထံၚ်တုဲ ပ္ဍဲလ္တူဒးချိုတ်လဝ် မွဲလစုတ်ဓဝ် ဗီုလၟုဟ်ဏံ ဒးအံသဝ်ဒၟံၚ်ရဂှ် ဟီုကဵု ဌာန်ပရိုၚ်သြၚ်လောန်တိုၚ်မ်ရ။
ကောန်ထံၚ်ပရေၚ်ဍုၚ်ကွာန် ဥူကျဝ်တုၚ် ဒးချိုတ်လဝ်ဂှ် တ္ၚဲဏံ ဂိတုအံက်တဝ်ဗာ စၟတ်တ္ၚဲ (၂၅) စံၚ်ဂြးလဝ်ရဂှ် ဂွံတီကေတ်ရ။
ပ္ဍဲထံၚ်စာတ်ထဝါဲဂှ် ကောန်ထံၚ်ပရေၚ်ဍုၚ်ကွာန်တြုံ၊ ဗြဴ ၅၀၀၀ ပြၚ် နွံဒၟံၚ်တုဲ ပ္ဍဲကဵုဗဒမ်ဂဥုဲပ္ဍဲထံၚ်ဂှ်လေဝ် ဂဥုဲဇဗဟွံရုမ်ဂပ် ကေုာံ ဟွံက္လိဂွံပရေၚ်မၚ်မွဲရံၚ်စံၚ်ပရေၚ်ထတ်ယိုတ် ပေၚ်ၚ်ရဂှ် ဂွံတီကေတ် နူဇာနှိက်ကောန်ထံၚ်ပရေၚ်ဍုၚ်ကွာန် ထဝါဲရ။
ပရိုၚ် – သြၚ်လောန်တိုၚ်မ်
ဗီု -CJ
sanlontai