ပ္ဍဲလံၚ်လုၚ် ညးဒေသ ၂ တၠ ပါလုပ် သီုကောန်ဗော် NLD မွဲတၠ ဒးဒုၚ်ရပ်လဝ်

လံၚ်လုၚ်၊ အံက်တဝ်ဗာ (၂၉)

ရးဒေသဇၞော်တၞၚ်သြဳ၊ ပွိုၚ်ဍုၚ်လံၚ်လုၚ်၊ ညးဒေသ ၂ တၠ ပါလုပ်သီုကောန်ဗော်ဒဳမဝ်ကရေဇြဳကောန်ဂကူ NLD မွဲတၠ ဒပ်ကံၚ်ဇြဳပၞာန် ရပ်ဏာလဝ်ရဂှ် ဂွံတီကေတ်နူညးဒေသတအ်ရ။

ဒပ်ကံၚ်ဇြဳပၞာန် ဇြဟတ်ဒပ် နွံဗ္ဒာဲ ၅၀ ပ္ဍဲဂိတုအံက်တဝ်ဗာ စၟတ်တ္ၚဲ (၂၆) ဂှ် လုပ်စိုပ်ကၠုၚ် ပ္ဍဲကွာန်မေန်ယာတ်တုဲဂှ် ရပ်ကေတ်ဏာလဝ် ညးဒေသတအ်ရ။

ဒပ်ကံၚ်ဇြဳပၞာန်ဂှ် ဃောလုပ်စိုပ်ကၠုၚ် ပ္ဍဲကွာန်ဂှ် သၟတ်ဒေသမောၚ်စိုၚ်ကျဝ်သဳဟ အယုက် ၁၆ သၞာံ ဃောအာဒၟံၚ်ပ္ဍဲဂၠံၚ်ဂှ် စၟဳစၟတ်တုဲ နကဵုတၚ်ထ္ၜးဟိုတ် ဂွံဆဵုကေတ်လဝ်ပေါတ်သ် ပရေၚ်ဍုၚ်ကွာန် ပ္ဍဲဖုၚ်ဂးတုဲ ရပ်ကေတ်ဏာလဝ်ရ။

ကြဴနူဂှ် ဒပ်ကံၚ်ဇြဳပၞာန် လုပ်စိုပ်ရပ်ကေတ် ကောန်ဗော် NLD ဥူအောၚ်ကျဝ်သိုဝ် ပ္ဍဲသ္ၚိဒၟံၚ်ညးတုဲဂှ် ၜုၚ်တက်ရပ်ကော်ဏာလဝ်ရ။

ဒပ်ကံၚ်ဇြဳပၞာန်ဂှ် ပါဲနူညးတအ် ညး(၂)တၠတုဲ ပ္ဍဲတ္ၚဲဂှ် ၜိုန်ရပ်ကေတ်ဏာလဝ် မၞိဟ်ဗြဴကောန်ကွာန်ဂှ် (၄) တၠလေဝ် ကီုလေဝ် အခိၚ်ကရောၚ်ပၞာန်က္လေၚ်တိတ်ဂှ် ကလေၚ်ဗလးကဵုလဝ် ညးဗြဴတအ်ရဂှ် ညးဒေသတအ် ဟီုလဝ်ရ။

ဥူအောၚ်ကျဝ်သိုဝ်ဂှ် ပ္ဍဲလက်ထက်အလဵုအသဳ NLD တေံ ကၠောန်လဝ်ကမၠောန်နဒဒှ်သၟာဒဳကွဳစက် ဝန်ဇၞော်တဵုလွဳ ကေုာံကၟိုန်မြံၚ် ရးတၞၚ်သြဳ ဥူမျေအ်သာန်ရ။

ဝန်ဇၞော်ဥူမျေအ်သာန်ဂှ်မ္ဂး ပ္ဍဲကဵုဂိတုမေ သၞာံဏံဂှ် ဃောပါဲဓလေတ်ဒၟံၚ်ပ္ဍဲဍုၚ်သေံ ဒးချိုတ်အာ နကဵုယဲကေန်ဇြာန်ရဂှ် ဂွံတီကေတ်နူ NLD ရ။

အတိုၚ်တၚ်လလောၚ်တြး ဗော်ဒဳမဝ်ကရေဇြဳကောန်ဂကူ လလောၚ်တြးလဝ်မ္ဂး ပ္ဍဲမွဲကာလဒပ်ပၞာန်သီအဝဵုဏံ ကောန်ဗော် NLD ဗ္ဒာဲ ၁၈၀၀ ဒးဒုၚ်ရပ်လဝ်တုဲ ပ္ဍဲကဵုဂှ် ကောန်ဗော် ၉၇ တၠ ဒးဒုၚ်ပြိုက်ဂစိုတ်လဝ်ရဂှ် လလောၚ်တြးလဝ် ပ္ဍဲဂိတုသေပ်တေမ်ဗာစၟတ်တ္ၚဲ ၂၇ တုဲကၠုၚ်တေံရ။

ပရိုၚ် – သြၚ်လောန်တိုၚ်မ်

ဗီု – Social Media