ဟိုတ်နူပရေၚ်ဗ္တိုက်ပံၚ်တောဲ ဂကောံဇြဟတ်ပၠန်ဂတးတံတုဲ ကံၚ်ဇြဳပၞာန် ဒးဂိဒၟံၚ်

လာယှိုဝ်၊ အံက်တဝ်ဗာ (၂၉)

ဟိုတ်နူပရေၚ်ပံၚ်တောဲဗ္တိုက် ဂကောံဇြဟတ်ပၠန်ဂတး သွက်သၞောတ်တၠအဝဵုပၞာန် အလုံမွဲဍုၚ် ရိုဟ်ကၞက်ဂွံပိုတ်အာဂှ်တုဲ လ္ပာ်ကံၚ်ဇြဳပၞာန် ဒးဂိဒၟံၚ်တုဲ ဒးဆေၚ်ဒၟံၚ်မုက် တြးလဝ် မုက်ပၞာန်ဗွဲမဂၠိုၚ်ဂၠေၚ်ရောၚ်ဂှ် ညးခါတ်အကာဲပရေၚ်ဍုၚ်ကွာန်၊ ပရေၚ်ပၞာန်တံ သ္ၚဳဂၠိပ်လဝ်အိုတ်ရ။

ကံၚ်ဇြဳပၞာန်ဂှ် သုၚ်စောဲဇြဟတ် ဗ္တိုက်ဒၟံၚ် နကဵုဒပ်ကျာ၊ ဒပ်ဍာ်၊ ဒပ်တိုက်တံတုဲ ဗ္တိုက်ဒၟံၚ် ဂကောံရပ်လွဟ်ကောန်ဍုၚ်အရၚ်တံ ပါလုပ်သီုကဵု ဂကောံဒပ်ပၠန်ဂတးရပ်လွဟ် မဒစဵုဒစးလဝ် ပရေၚ်ပၞာန်သီအဝဵုတံဂှ်ရ။

ပရေၚ်လၞိန်ဗပိန် ကုကံၚ်ဇြဳပၞာန် ကေုာံ ဂကောံပျဳတုသေတ် မကဵုလဝ်ယၟု ချဳဒရာၚ်ပၞာန် ၁၀၂၇ မဟာမိတ်ကောဒေံ ၃ ဂကောံဂှ်ဝွံ ပေါဲဗ္တိုက်မက္တဵုဒှ်လဝ် ပ္ဍဲပွိုၚ်ဍုၚ် ၆ ပွိုၚ်ဍုၚ် မၞုံရးသေံသၟဝ်ကျာဂှ်ကဵု ပယျဵု ကြုက်−ဗၟာတံဂှ် ထ္ၜးဒၟံၚ်သက်သဳရ။

ပ္ဍဲကဵုဂိတုအံက်တဝ်ဗာ ၂၇ မစလလောၚ်တြးလဝ် ချဳဒရာၚ်ပၞာန်ဂှ် အပ္ဍဲပေါဲဗ္တိုက်ဂှ် ဗ္တိုက်သၠေက်သီဂိုၚ်ဂွံလဝ် ဒၞါဲဒတန်အဓိက ပရေၚ်ပၞာန်ကံၚ်ဇြဳပၞာန် မၞုံဍုၚ်လာယှိုဝ်၊ မုၚ်ကိုဝ်၊ ကွာန်လုၚ်၊ ကွာန်ချောန်ဟုက် ဒေသဟိုဝ်ပါန်၊ ဒဒန်ချေန်ယှိုဲဟဝ်တံဂှ်ရောၚ် နူကဵုချဳဒရာၚ်ပၞာန် ၁၀၂၇ တံ လလောၚ်ပ္တိတ်လဝ်ရ။

နကဵုဒပ်ပၞာန်တအာၚ် TNLA မပါလုပ် ပ္ဍဲကဵုဂကောံကောဒေံ ၃ ဂကောံဂှ် ဗ္တိုက်သီဂွံလဝ် ဗ္ဒိုပ်ဒပ်ကံၚ်ဇြဳပၞာန် နူကဵုပွိုၚ်ဍုၚ်နခါမ်ဂှ် ၃ ဗ္ဒိုပ် ကေုာံ ဗ္ဒိုပ်ဒပ်တုၚ်တာန် နူကဵုပွိုၚ်ဍုၚ်လာယှိုဝ်ဂှ်လေဝ် ဗ္တိုက်သီဂိုၚ်ဂွံလဝ် သီုလွဟ်လက်နက်မကမ်နာနာရောၚ် ပ္ဍဲဂိတုအံက်တဝ်ဗာ ၂၈ တေံ ထပ်လလောၚ်ပ္တိတ်လဝ်ရ။

ပ္ဍဲဂိတုအံက်တဝ်ဗာ ၂၈ အခိၚ်နူဂယးဂှ်လေဝ် ဂကောံကဝ်က MNDAA ကေုာံ ဒပ်ပံၚ်ကောံမဟာမိတ်တံ ဗ္တိုက်သီဂိုၚ်ဂွံလဝ် ဗ္ဒိုပ်ပၞာန်နကျောန် နူကဵုဍုၚ်ချေန်ယှိုဲဟဝ် မၞုံသၟဝ်ကျာရးသေံဂှ်ကဵု ဗ္ဒိုပ်ကံၚ်ဇြဳပၞာန်တၞဟ်ဟ် ၂ ဗ္ဒိုပ်တံ သီုကဵုမကမ်လွဟ်လက်နက်တံရ။

ညးလ္ၚတ်သ္ၚဳဂၠိပ်ပရေၚ်ဍုၚ်ကွာန် ဒံက်တာလှကျဝ်ဇြဝ်ဂှ် နကဵုဒပ်ပၞာန် ဟိုတ်နူဒးပံက်လဝ်မုက်ပၞာန် တၟာဂလိုၚ်ဂှ်ရ ပရေၚ်ပၞာန်ဒးဂိဒၟံၚ်တုဲ အာဂတနူဏံလေဝ် ဒးဂိအာဒၟံၚ်ဏီဏောၚ်ဂှ် သ္ၚဳဂၠိပ်လဝ်ရ။

“ ဒပ်ပၞာန်ဂှ်တှ်ေ သာတုဲဂိကၠုၚ်ရနွံ။ မုဒှ်ရောဟီုတှ်ေ ဍေံဂှ် ( ဒပ်ပၞာန်) ဒးပံက်လဝ်မုက်ပၞာန်တၟာဂလိုၚ်ဏောၚ်။ အဂှ်ေတှ်ေ လၟုဟ် ၜိုတ်မပံက်လဝ်ဂှ်လေဝ် ဍေံတံသၟးရ ဒးဒၟံၚ်ဏောၚ်။ အလဵုဇြဝ်မေန်ထောန်လေဝ် ဟီုကၠုၚ်ယျ။ ဗၠာဲသၟိၚ်ဍေံတံကီု၊ ကောန်ဒပ်ဍေံတံကီု ဗွဲမဂၠိုၚ် ဒးဂိဒၟံၚ်ဟီုဂှ် ဟီုလဝ်ရ။ အာဂတနူဏံလေဝ် ဍေံတံရ သ္ဇက်ဒးဂိနွံဏောၚ်။ ပေါဲဗ္တိုက်တံ သာသ္ကာတ်မြဟ်ကၠုၚ်ဏောၚ်။ အခိၚ်ဗီုဏံ ဟွံသ္ကာတ်လေဝ် ဟွံဂွံရပုဟ်လေဝ်။ မွဲလ္ပာ်တေံဂှ်လေဝ် သရံၚ်ဓဂါတ်ဒၟံၚ်ယျ။ ပ္ဍဲကဵုအကာဲအရာသာ်ဏံဂှ် သၟာပၠန်ဂတးတံ ဒးဗ္တိုက် ကောံကောံကလောံကလောံဏောၚ်။ ညံၚ်ဂွံဂိအာဂှ် ဟွံသေၚ်မ္ဂး ဒပ်ပၞာန်ဒးဆုတ်နူ ပရေၚ်ဍုၚ်ကွာန်ဏောၚ်။ ဟွံသေၚ်မ္ဂး တိတ်အာဟွံသေၚ်ပုဟ်” သာ်ဝွံ ညးသ္ဂးရ။

တုဲကၠုၚ် မွဲသတ္တာပြၚ်တေံဂှ်လေဝ် ဗ္ဒိုပ်ကံၚ်ဇြဳပၞာန်ၜါဗ္ဒိုပ် နူကဵုတွဵုရးကချေၚ် ဗ္ဒိုပ်အံၚ်ဂျာ ကဵု နူကဵုရးသေံသၟဝ်ကျာ ဗ္ဒါဲဍုၚ်မုၚ်ကိုဝ် ဗ္ဒိုပ်နကောတ်တံဂှ် နကဵုသၟဝ်ပၠတရဴ ဒပ်ပၞာန်ဗၠးၜးကချေၚ် KIA ဂှ် ဂကောံပံၚ်ကောံတံ ဗ္တိုက်သီလဝ်ရ။

ပ္ဍဲကဵုအကာဲအရာဏံဂှ် နကဵုဒပ်ကံၚ်ဇြဳပၞာန် သွက်ဂွံသီ ဌာန်ဂအုပ်ဗဟိုဝ် KIA လာၚ်ဇြာဂှ် ဟိုတ်နူပ္တိတ်ဒၟံၚ်ဇြဟတ် ထ္ပက်ကရောၚ်ပၞာန် ဗွဲမသ္ကာတ်မြဟ်ဂှ်ရ နူကဵုဂကောံကောဒေံပိဂကောံတံ ဂတးထောံက္ဍိုပ်ပၞာန် လ္ပာ်ရးသေံသၟဝ်ကျာဂှ် ညးခါတ်အကာဲပရေၚ်ဍုၚ်ကွာန်တံ သ္ၚဳဂၠိပ်လဝ်အိုတ်ရ။

စပ်ကဵုချဳဒရာၚ်ပၞာန် ၁၀၂၇ ဂှ်တုဲ ညးမၞုံအခေါၚ်ဟီုဂး ဌာနဝန်ဇၞော်ကာစဵုဒၞါဍုၚ်ကြုက်ဂှ် ပေါဲဗ္တိုက်ဂမၠိုၚ် သွက်ဂွံဒေါအ်ကဵု ဗွဲမပြဟ်ဂှ်ကဵု ပရေၚ်ကယျာန်ဓဝါန်တံဂှ် သွက်ဂွံဆဵုဂဗသဳကၠဳသောၚ်ကလး ဗွဲမၜိုဟ်လလမ်ညးသ္ကအ်အိုတ်ဂှ် ဖ္တိုက်ဖ္အောဝ်လဝ် ဂကောံမဆေၚ်စပ်ဂမၠိုၚ်ရ။

ညးရေၚ်တၠုၚ်ဂဗုတ် ကၠတ်ထဝ်သၞောဝ်ဓဝ်ဝှ်ကြံၚ် ဥူကျဳမျေတ်ဂှ် နကဵုအလဵုအသဳကြုက် မိက်ဂွံပအနိၚ်အပိုၚ် ကုအလဵုအသဳဗၟာမ္ဂး ထံက်ပၚ်ကဵု ဂကောံရပ်လွဟ်သ္ကုတ်သၟဝ်ကျာတံဂှ်တုဲ လ္ပာ်အလဵုအသဳဗၟာတံ သ္ပပဓာန်ကၠုၚ် ကြုက်မ္ဂး လုပ်ကဵုအမိၚ် ကုဂကောံသ္ကုတ်သၟဝ်ကျာတံရောၚ်ဂှ် သ္ၚဳဂၠိပ်လဝ်ရ။

“မိက်ဂွံသ္ပအနိၚ်အပိုၚ် ကုအလဵုအသဳဍုၚ်ဗၟာမ္ဂး ပ္တိတ်ကဵုလွဟ်လက်နက် ကုဂကောံရပ်လွဟ် သ္ကုတ်သၟဝ်ကျာတံရ။ ပ္တန်ကဵု ရုၚ်စက်လွဟ်လက်နက်တံ၊ ကဵုဇွောံမ၊ ကဵုကယိုၚ်ကယျဝ် ယူနဳဝှမ်တံဂှ် ဒှ်ကလောန်ဍေံတံရ။ ယဝ်ရ အလဵုအသဳဗၟာ သ္ပပဓာန်ဍေံတံတုဲ ရီုဗၚ်ကဵုညိ အပါယျေဂးတုဲ ဍေံတံ (အလဵုအသဳကြုက်) ဂှ် ဒှ်မွဲဗီုပၠန်။ အေ ဂှ်တှ်ေ ဗှ်ေတအ်ဂှ် မၞိဟ်အဲလွဳလဝ်ရဏောၚ် ဒေါအ်ထောအ်ရ ကေတ်ရ လုပ်ဟီုသာ်ဏံပၠန်ရ။ ပရေၚ်ဍုၚ်ကွာန်ဟီုမ္ဂး ဗၟာဂှ် ဍေံတံ စွံလဝ်ကဆံၚ်တွဵုရးရဏောၚ်” သာ်ဝွံ ညးသ္ဂးရ။

ဂကောံမဟာမိတ်ကောဒေံပိဂကောံ ဂကောံရခေၚ် AA ၊ ဂကောံကဝ်က MNDAA ကေုာံ ဂကောံတအာၚ် TNLA တံဂှ် သွက်ဂွံစဵုဒၞါ ဒြပ်ရတ်သ္ၚိသွဝ်ညးဍုၚ်ကွာန်တံဂှ်ကီု၊ သွက်ဂွံစဵုဒၞါတဝ်စၞေဟ် ဇကုဇကုဂှ်ကီု ကေုာံ သွက်ဂွံထိၚ်ဒက် ဒေသညးတံ သာနူဏံမာန်ဂှ် စကၠုၚ်လဝ် ချဳဒရာၚ်ပၞာန်ဂှ်ရ။

သ္အာၚ်နူဂှ်ပၠန် ဆန္ဒညးဍုၚ်ကွာန် အလုံဍုၚ်ဗၟာ ညံၚ်သၞောတ်တၠအဝဵုပၞာန် ရိုဟ်ကၞက်ဂွံပိုတ်အာဂှ်ကဵု ညံၚ်ပွဝေၚ်လံၚ်သြန် လီဠာန် လ္တူအောန်လာၚ် မသၠဲလးကၠုၚ် အပ္ဍဲကၟိန်ဍုၚ်တံ ဂွံကၠေံဗ္ဒန်အာဂှ်လေဝ် ရန်တၟံလဝ်ရောၚ် သ္ဂးလဝ်ရ။

ညးလ္ၚတ်သ္ၚဳဂၠိပ်ပရေၚ်ဍုၚ်ကွာန်၊ ပရေၚ်ပၞာန် ဥူတာန်သဵုနာၚ်ဂှ် နကဵုကံၚ်ဇြဳပၞာန် ဇြဟတ်ပၞာန် မပြးဇးဒၟံၚ် အလုံဍုၚ်ဂှ် သွက်ဂွံကလေၚ်ပလန် ကုပရေၚ်ပြုပြေၚ်ပၞာန် ဂကောံကောဒေံပိဂကောံဂှ် ဒှ်အခက်အခုဲဇၞော်ဇၞော်မာန်တုဲ ပေါဲပၞာန်လအ်မာန်ဂှ် သ္ၚဳဂၠိပ်လဝ်ရ။

“အခိၚ်လၟုဟ် ပ္ဍဲကဵုရး ကေုာံ တွဵုရးပြးဇး နကဵုကံၚ်ဇြဳပၞာန် ဇြဟတ်ပြးဇးဒၟံၚ်ဂှ် သွက်ဂွံကလေၚ်ပၠန် ကုချဳဒရာၚ်ပၞာန် ဂကောံကောဒေံ မဒက်လဝ်ဂှ် အခက်အခုဲဇၞော်မာန်ဏောၚ်။ ဆ္ဂး ၜိုတ်ဂွံ ပ္ကောံဇြဟတ်တုဲ တိုန်ကၠုၚ်လ္ပာ်လာယှိုဝ် ဒှ်ဂွံဏောၚ်။ အဇှ်ဂှ်ေလေဝ် ဂကောံကောဒေံပိဂကောံတံ ကၠတ်ကြတ်ဗ္တိုက်အာ အကြာဂၠံၚ်ဂှ် ဒှ်မာန်ဏောၚ်။ ဟိုတ်ဂှ်ရ ပေါဲဗ္တိုက်ဂှ်ဝွံ တုဲဒှ်အာ အပ္ဍဲမွဲၜါတ္ၚဲဟွံသေၚ်တုဲ ဍာ်ဇမၠိၚ်ဏံ ပံၚ်ဖျပ်ကဵု ပရေၚ်ချဳဒရာၚ်ပၠန်ဂတးတမ်က္ညၚ်ဂှ်တုဲ ပါလုပ်ကၠုၚ် ပ္ဍဲကဵုလၟေၚ်ကမၠောန် ပ္တန်ဍုၚ်ဖေဝ်ဒရာဒဳမဝ်ကရေဇြဳ ကောန်ဍုၚ်အရၚ်တံဂှ်ရဏောၚ်။ ဟိုတ်ဂှ်ရ ပေါဲဗ္တိုက်ဂှ်ဝွံ ဟွံတုဲဒှ်လွာဲလွာဲဂှ်မွဲသာ် သဘဴဂွံဂၠိၚ်အာနွံဒၟံၚ်ဏီဏောၚ်” ဂှ် ညးသ္ဂးရ။

မွဲလ္ပာ်ပၠန်ဂှ် ကရောံပေါဲဗ္တိုက်ရးသေံသၟဝ်ကျာဂှ် ပ္ဍဲကဵုသ္ကုတ်သၠုၚ်ကျာကၟိန်ဍုၚ် တွဵုရးဍုၚ်မန်၊ တွဵုရးကရေၚ် ကေုာံ ရးတၞၚ်သဳတံဂှ်လေဝ် ပေါဲဗ္တိုက်အကြာ ဗော်သွးကောန်ဂကူကရေၚ် KNU ၊ ဒပ်စဵုဒၞါဒေသတံကဵု ကံၚ်ဇြဳပၞာန်တံဂှ် ဆက်က္တဵုဒှ်ဒၟံၚ်ဖိုဟ်ရ။

သ္အာၚ်နူဂှ်ပၠန် ပ္ဍဲကဵုချေၚ်၊ ကရေၚ်ဍာဲ၊ သက်ကိုၚ် ကေုာံ မဂွဵုတံဂှ်လေဝ် အကြာကံၚ်ဇြဳပၞာန်တံကဵု ဒပ်ပံၚ်ကောံ PDF ပါလုပ်သီုကဵု ဂကောံရပ်လွဟ်ကောန်ဍုၚ်အရၚ် ဖျေံသ္ဇိုၚ်ဒေသဂမၠိုၚ် CNF, KNPP, ABSDF တံဂှ် ဒှ်ဒၟံၚ်အကာဲအရာ ပရေၚ်ပၞာန်ကြံၚ်မ္ၚိုဟ်ဒၟံၚ်ရ။

ဌာနဝန်ဇၞော်ကာစဵုဒၞါ အလဵုအသဳညဳသၟဟ်ဂကူ NUG ဂှ် ပံၚ်တောဲကဵု ဂကောံမဟာမိတ်ကောဒေံပိဂကောံတံဂှ်တုဲ သွက်ဂွံထ္မံက်ရုပ်ရဴ ချဳဒရာၚ်ပၞာန် ၁၀၂၇ ကဵု သၟဟ်ညဳချဳဒရာၚ်ပၞာန်တံဂှ် ပံၚ်တောဲအာညးသ္ကအ်ရောၚ် လလောၚ်တြးလဝ်ရ။

အတိုၚ်တၚ်နၚ် ဂကောံသုတေသန ISP-Myanmar ဂှ်မ္ဂး အပ္ဍဲကာလပၞာန်သီအဝဵု လောန်ဂွံၜါသၞာံဘာ်ပြၚ်ဂှ် ပေါဲဗ္တိုက်အလုံဍုၚ် ဟွံအောန်နူကဵု ၁၁၀၀၀ ဝါ က္တဵုဒှ်လဝ်ရောၚ် ပ္ဍဲဂိတုအံက်တဝ်ဗာ ၂၇ တေံ လလောၚ်ပ္တိတ်လဝ်ရ။

ပရိုၚ်−သြၚ်လောန်တိုၚ်(မ်)

ဗီု−1027 FB