ကောန်ဝုတ်တက်ဇြေန် ဂွံဒုၚ်ရုဲစှ် နဒဒှ်က္ဍိုပ်သ္ကိုပ်ဗော်ဂွံအဝဵုသေံ

ၜၚ်ကံက်၊ အံက်တဝ်ဗာ (၂၉)

ကောန်ဝုတ် သ္ကိုပ်ဝန်ဇၞော်တြေံ တက်ဇြေန်ယှေန်နာဝါထရာ ညးတၠဓနဗဳလျာန်နာ မဒးဒၟံၚ်ထံၚ်ဂှ်ဝွံ ပ္ဍဲဂိတုအံက်တဝ်ဗာ ၂၇ တေံ ဂွံဒုၚ်ရုဲစှ်လဝ် နဒဒှ်က္ဍိုပ်သ္ကိုပ် ဗော်ဂွံအဝဵုသေံ Pheu Thai ဂှ် ဂွံတီကေတ်ရ။

ပ္ဍဲအခိၚ်ကာလလုပ်စိုပ်ကၠုၚ် ပ္ဍဲပရေၚ်ဍုၚ်ကွာန် ဂွံၜါသၞာံဂှ် ကုကောန်ဝုတ်တက်ဇြေန်ဍောတ်အိုတ် ဖေဝ်တုၚ်တာန်ယှေန်နာဝါထရာဂှ် ဗော် Pheu Thai ပါ်မာဲသ္ဂုတ်သွာတ်လဝ် နဒဒှ်က္ဍိုပ်သ္ကိုပ်တၟိရ။

“ ဂကောံအုပ်ဓုပ်တၟိ Pheu Thai ဂှ်ဝွံ သွက်ညးဍုၚ်ကွာန်တံ ညံၚ်ဂွံဒှ်ကၠုၚ်ဂၞန်မွဲဂှ်ကဵု သွက်ဂွံကလေၚ်က္ဍိုက်ပ်ဗော်ဂှ် သၠုၚ်ပ္တိုန်ရေၚ်တၠုၚ်လဝ်ရောၚ်” သာ်ဝွံ ဖေဝ်တုၚ်တာန် မဂွံဒုၚ်ရုဲစှ်လဝ် နဒဒှ်က္ဍိုပ်သ္ကိုပ်ဗော်ဂှ် ဟီုလဝ်ကဵု အ္စာပရိုၚ်တံရ။

ဖေဝ်တုၚ်တာန် အာယုက် ၃၇ သၞာံဂှ်ဝွံ ဒှ်က္ဍိုပ်သ္ကိုပ်ဒယှ် သွက်ဗော် Pheu Thai ဂှ်တုဲ ပ္ဍဲကဵုပရေၚ်ချဳဒရာၚ် ညံၚ်ပေါဲရုဲမာဲ မကၠောန်ဗဒှ်လဝ် အပ္ဍဲဂိတုမေတေံ ဂွံအံၚ်ဇၞးဂှ် ဒှ်ညးက္ဍိုက်လဝ်က္ဍိုပ်မွဲရ။

ပ္ဍဲကဵုကောံဓရီုနာနာ ဗော် Pheu Thai မကၠောန်ဗဒှ်လဝ် ပ္ဍဲတ္ၚဲသိုက်တုဲကၠုၚ်တေံဂှ် ဖေဝ်တုၚ်တာန်ဝွံ သွက်ဂွံဒှ်က္ဍိုပ်သ္ကိုပ်ဗော်ဂှ် ကလိဂွံလဝ်မာဲ ၂၈၉ မာဲကဵု မာဲမံၚ်အကြာမွဲမရ။

စပ်ကဵုကောန်ဝုတ်တက်ဇြေန် ဂွံဒုၚ်ရုဲစှ် နဒဒှ်က္ဍိုပ်သ္ကိုပ်ဗော်ဂှ်တုဲ ဗော်ဖဳထာဲဝွံ ဒှ်ဗော်မွဲဂြောဝ်ဂတာဓဝ်ဟေၚ် ရပ်လဝ်ဇုက်ဟီုဂှ် သ္ကဵုကၠးဖ္ဍးတဴရောၚ် ညးလ္ၚတ်သ္ၚဳဂၠိပ်ပရေၚ်ဍုၚ်ကွာန်ဍုၚ်သေံ ယူတာပေါန်အေဿရာချာဲ ဟီုဂးလဝ်ရ။

“ၜိုန်ရပ္တိတ်ကၠုၚ်ဇြဟတ် ညံၚ်ဗော်ဂှ် ဂွံဂတာပ်ခေတ်ကီုလေဝ် အိုတ်ကၞောတ်ဂှ် ကြက်ရှ်သာဂှ် ဒှ်ဒၟံၚ်တုပ်ပ်ပၠန်။ ဗော်ဝွံ တၞောဝ်ယှေန်နာဝါထရာတံမွဲရ ပိုၚ်ပြဳဒၟံၚ်ဖိုဟ်ဏောၚ်” ဂးတုဲ ညးဟီုဂးလဝ်ကဵု ဌာန်ပရိုၚ် AFP ရ။

ဆ္ဂး အထံက်က္ဍိုပ်သ္ကိုပ် ဗော် Pheu Thai ဖောန်ထာမ်ဝဳချယာချာဲဂှ် ဂလာန်မဟီုဂးလဝ် ကမၠောန်ဂြောဝ်ဂတာပိုၚ်ဂှ် ကယျာန်ပါဲလဝ်တုဲ စဵုဒၞါဟီုဂးလဝ် ကဏ္ဍအခန်က္ဍိုပ်သ္ကိုပ် ဖေဝ်တုၚ်တာန်ဂှ်ရ။

“ညအ်ဂှ် ဟိုတ်နူကဵုယၟုတၞောဝ်ဒတောဝ်ညးဟွံသေၚ်ပုဟ်။ ဒုၚ်သ္ဇိုၚ်ကဵု ဍာ်ဒကေဝ်ညးတုဲ မၞိဟ်တံ ရုဲစှ်လဝ်ဏောၚ်” သာ်ဝွံ က္ဍိုပ်သ္ကိုပ်အထံက် ဖောန်ထာမ်ဝဳချယာချာဲ ဟီုဂးလဝ်ရ။

Source: AFP/rj