ဟိုတ်နူပေါဲဗတိုက်မုမ်တုဲ ညးဒေသ ၂၀၀၀ ပြၚ် ဒးဒဴဒၟံၚ်ပၞာန်

မုမ်၊ အံက်တဝ်ဗာ(၃၁)

ပ္ဍဲပွိုၚ်ဍုၚ်မုမ် ခရိုၚ်ညံၚ်လေဝ်ပေန် ဗော်သွးကောန်ဂကူကရေၚ် KNU ဂှ် ပါဲနူပေါဲဗတိုက်ၜါလ္ပာ်တုဲ ဟိုတ်နူဒပ်ကံၚ်ဇြဳပၞာန် ပန်ဖျေံဒၟံၚ်လွဟ်ဇၞော်တုဲ ညးဒေသ ၂၀၀၀ ပြၚ် ထောံသ္ၚိဌာန် ဒးဂြိပ်ဒဴ ပါဲဓလေတ်ဒၟံၚ်ရဂှ် KNU ဗဟဵု လလောၚ်တြးလဝ် ပ္ဍဲဂိတုအံက်တဝ်ဗာ စၟတ်တ္ၚဲ (၃၀) ဂှ်ရ။

ပ္ဍဲဂိတုအံက်တဝ်ဗာ စၟတ်တ္ၚဲ (၂၈) တုဲကၠုၚ်တေံ အခိၚ်ဗ္တံ (၈) နာဍဳဂှ် ဒပ်ကံၚ်ဇြဳပၞာန် မၞုံပ္ဍဲပွိုၚ်ဍုၚ်မုမ် KNU နူကဵုဗဒိုပ်ပၞာန်တပျေညောအ်ကဵု ဗဒိုပ်ဗၠာဲသၟိၚ်တအ်ဂှ် ဟိုတ်နူပန်ဖျေံနၚ်လဝ်လွဟ်ဇၞော်တုဲ စှ်ေလဝ် ပ္ဍဲကွာန်ကျောက်ဂျဳပေါက်တုဲ ပါ်ခတိုဟ်လဝ်ရ။

ကြဴနူပရေၚ်ဒဒှ်ဏံ ဒှ်လဝ်တုဲဂှ် အကြာ ဒပ်တံဒပ်သၟဝ်တဲ ဒပ်မဟာ ၃ ဒပ်ပၞာန်ဗၠးၜးကောန်ဂကူကရေၚ် KNLA၊ ဒပ်ပံၚ်ကောံ ကဵု ဒပ်ကံၚ်ဇြဳပၞာန်တအ် ဒှ်လဝ်ပေါဲဗတိုက် (၄) ဝါ ရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးရ။

ဟိုတ်နူဒပ်ကံၚ်ဇြဳပၞာန် ပန်ဖျေံလွဟ်ဇၞော်ကီု သီုကဵုပေါဲဗတိုက်ၜါလ္ပာ်တုဲ ညးဒေသ နူကွာန်ကျောက်ဂျဳပေါက်၊ သာမ်မာန်ပေါက်၊ တပျေညောအ်၊ ယှိုဲပျဳတာကဵု လေလာန်ကုမ်တအ် ၂၀၅၂ တၠ ဒးဂြိပ်ဒဴပါဲဓလေတ်ဒၟံၚ် ပ္ဍဲဒၞာဲဗၠးဘဲတုဲ နွံဒၟံၚ်ပၟိက် ဇွောံမစၞစကေုာံ ဂဥုဲဇဗ နဒဒှ်ကာတၟေၚ်ရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးရ။

သ္အာၚ်နူဂှ်ပၠန် ပ္ဍဲဂိတုအံက်တဝ်ဗာ စၟတ်တ္ၚဲ (၂၀) တုဲကၠုၚ်တေံလေဝ် သ္ပတံနူ ဒပ်ကံၚ်ဇြဳပၞာန် ခမရ ၃၅၁ ပန်ဖျေံလဝ်လွဟ်ဇၞော် ပ္ဍဲကွာန်မယာန်သုၚ်လေ (၅) မ တုဲဂှ် ကောန်ဒေသညးဍုၚ်ကွာန် ၄၀၀ ပြၚ် ဒးပါဲဓလေတ်လဝ် ဘဲပၞာန်ရ။

ညးဍုၚ်ကွာန်ပါဲဘဲပၞာန် ၄၀၀ တအ်ဂှ် စဵုကဵုအခိၚ်လၟုဟ် ကလေၚ်စဴဌာန်ဒၟံၚ် ဟွံမာန်ဏီတုဲ နွံဒၟံၚ်ပၟိက် ဒၞာဲမံၚ်စံၚ်၊ ဇွောံမစၞစ ကေုာံ ဂဥုဲဇဗတအ် နဒဒှ်ကာတၟေၚ်ဖိုဟ်ဏီရဂှ် ဂွံတီကေတ် အတိုၚ်တၚ်လလောၚ်တြးဂှ်ရ။

ပ္ဍဲခရိုၚ်ညံၚ်လေဝ်ပေန်ဂှ် ဟိုတ်နူဒပ်ကံၚ်ဇြဳပၞာန် ပန်ပှော်ဗတိုက်ဒၟံၚ်ကီု သီုဟိုတ်နူပေါဲဗတိုက်တအ်တုဲ ကောန်ဒေသညးဍုၚ်ကွာန် ၜါကိုတ်ပြၚ် ဒးဂြိပ်ဒဴပါဲဓလေတ်ဒၟံၚ် နွံရဂှ် ဗော်သွးကောန်ဂကူကရေၚ် KNU လလောၚ်တြးလဝ်ရ။

ပရိုၚ် – သြၚ်လောန်တိုၚ်မ်

ဗီု – KNU