ပ္ဍဲပေါဲဗ္တိုက်ကျာ်ဍုၚ်ဂှ် ၜါလ္ပာ်ပရေၚ်ဇီုကပိုက်ချိုတ်တံ နွံတုဲ ကောန်အရာပ်မွဲတၠ ချိုတ်အာ

ကျာ်ဍုၚ်၊ အံက်တဝ်ဗာ (၃၁)

ပ္ဍဲပေါဲဗ္တိုက်ၜါလ္ပာ် မက္တဵုဒှ်လဝ် အပ္ဍဲပွိုၚ်ဍုၚ်ကျာ်ဍုၚ်၊ ပွိုၚ်ဍုၚ်လှာဒကှ်၊ တွဵုရးကရေၚ်ဂှ် လ္ပာ်ကံၚ်ဇြဳပၞာန် ဇီုကပိုက်ချိုတ်ဂၠိုၚ်လဝ်တုဲ ကောန်အရာပ်မွဲတၠလေဝ် ဒးဒုၚ်ဂစိုတ်လဝ်ဂှ် ပ္ဍဲဂိတုအံက်တဝ်ဗာ (၃၀) တေံ ဂကောံချဳဒရာၚ်ပၞာန်တၟေၚ် SOG လလောၚ်ပ္တိတ်လဝ်ရ။

ကရောၚ်ပၞာန်ပံၚ်တောဲ တမ်ဒပ်ကံၚ်ဇြဳပၞာန် ခမရ ၅၅၈ ၊ ခမရ ၃၅၈ ကေုာံ စကခ ၁၃ ဖျေံသ္ဇိုၚ်ရးတၞၚ်သဳ ဇြဟတ်ဒပ် ၁၀၀ ပြၚ်ပါဂှ်ဝွံ ကရောၚ်ပၞာန်လုပ်စိုပ်ကၠုၚ် အပ္ဍဲပွိုၚ်ဍုၚ်ကျာ်ဍုၚ်၊ ပွိုၚ်ဍုၚ်လှာဒကှ်၊ တိဍာ်ဒပ်မဟာာ ၆ KNU ဂှ်တုဲ ပေါဲဗ္တိုက်ၜါလ္ပာ် က္တဵုဒှ်လဝ်ရ။

အကြာဒပ်ကံၚ်ဇြဳပၞာန် မလုပ်စိုပ်ထ္ပက်ကၠုၚ်ကရောၚ်ပၞာန် သာ်ဏံကဵု ဂကောံဇြဟတ်ဨရာဝတဳ၊ ဂကောံချဳဒရာၚ်ပၞာန်တၟေၚ် SOG, တမ်ဒပ် KNLA ၁၈ တံဂှ် ပ္ဍဲဂိတုအံက်တဝ်ဗာ ၂၄ အခိၚ်ဇိုၚ်သဝ်တ္ၚဲ ၜိုတ် ၄ နာဍဳ ပ္ဍဲမွဲဒမြိပ်ကုန်ဒဵုကျာ် ဗ္ဒါဲကွာန်ထဳဝါကလူဂှ် ပေါဲဗ္တိုက်က္တဵုဒှ်လဝ် ၁ ဝါရောၚ် ပါလုပ် ပ္ဍဲတၚ်လလောၚ်တြးဂှ်ရ။

သ္အာၚ်နူဂှ်ပၠန် ပ္ဍဲဂိတုအံက်တဝ်ဗာ ၂၅ အခိၚ်နူဂယး ၉ နာဍဳဂှ်လေဝ် ပေါဲဗ္တိုက် ၁ ဝါ ထပ်က္တဵုဒှ်လဝ်တုဲ အပ္ဍဲပေါဲဗ္တိုက်တံဏံဂှ် လ္ပာ်ဒပ်ကံၚ်ဇြဳပၞာန် ၁၀ တၠ ချိုတ်တုဲ နူကဵုဒပ် ခမရ ၃၈၅ ဂှ် ပါလုပ်သီုကဵုသ္ကိုပ်ဗိုလ် ဝေန်ယျေဝ်ထောန်ဂှ် ၈ တၠ ကလိဂွံလဝ်ဝပ်ရောၚ် SOG လလောၚ်ပ္တိတ်လဝ်ရ။

လ္ပာ်ဂကောံဇြဟတ်ပၠန်ဂတးတံဂှ် ကောန်သ္ဂံၚ် ၂ တၠ ဇီုကပိုက်ကလိဂွံလဝ်ဝပ်တုဲ ဒၟါနူဒပ်ကံၚ်ဇြဳပၞာန်တံတုဲ ညးဍုၚ်ကွာန်ကောန်အရာပ်မွဲတၠ ဒးချိုတ်အာလဝ်ရောၚ် SOG လလောၚ်ပ္တိတ်ဟီုဂးလဝ်ရ။

အပ္ဍဲပေါဲဗ္တိုက် ပွိုၚ်ဍုၚ်ကျာ်ဍုၚ်ပါ်ဂှ် လ္ပာ်ဒပ်ကံၚ်ဇြဳပၞာန်တံ ဟိုတ်နူဒးဂိဒၟံၚ်ဂှ်ရ ကၠောန်သ္ပဒၟံၚ် ပရေၚ်ဗ္တိုက်ပန်ပှော်တရဴကျာတံကဵု လွဟ်ဇၞော်တံတုဲ ဟိုတ်နူပေါဲဗ္တိုက်တုဲ ညးဍုၚ်ကွာန်ဒေသ နူကဵုကွာန်လ္ၚဵုတံ ဒးဂြိပ်ဒဴပါဲဒလေတ်ဒၟံၚ်ရောၚ် ဂွံတီကေတ် အတိုၚ်ပရိုၚ်တမ်ရိုဟ် ဗလးတိဂမၠိုၚ်ရ။

ပရိုၚ်−သြၚ်လောန်တိုၚ်(မ်)

ဗီု−SOG