ချဳဒရာၚ်ပၞာန် ၁၀၂၇ ဂကောံမဟာမိတ်ကောဒေံပိဂကောံဂှ် KNU ထံက်ဂလာန်ဒုၚ်တၠုၚ်

မတ်မလီု၊ အံက်တဝ်ဗာ (၃၁)

လ္တူချဳဒရာၚ်ပၞာန် ၁၀၂၇ နူကဵုဂကောံမဟာမိတ်ကောဒေံပိဂကောံတံ မဗ္တိုက်ဒၟံၚ် ဒပ်ကံၚ်ဇြဳပၞာန် ညဳညဳသၟဟ်ဟ်ဂှ် နကဵုဗော်သွးကောန်ဂကူကရေၚ် KNU ဒုၚ်တၠုၚ်ထံက်ဂလာန်ဂှ် ညးမၞုံအခေါၚ်ဟီုဂး KNU ပဒိုဝ်သဝ်တဝ်နဳ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ဂကောံဒပ်မဟာမိတ်ကောဒေံပိဂကောံ ဒပ်ပၞာန်ရခေၚ် AA, ဒပ်ပၞာန်ကောန်ဂကူတအာၚ် TNLA ကေုာံ ဂကောံကဝ်က MNDAA တံဝွံ ပ္ဍဲကဵုအံက်တဝ်ဗာ ၂၇ တေံ ကြဴနူလလောၚ်တြး ချဳဒရာၚ်ပၞာန် ၁၀၂၇ ဂှ်တုဲ ထ္ပက်လဝ်ပၞာန် ဗ္တိုက်လဝ် ဒပ်ကံၚ်ဇြဳပၞာန် မၞုံရးသေံသၟဝ်ကျာတံ ဗွဲမသ္ကာတ်မြဟ်ရ။

နူဂိတုအံက်တဝ်ဗာ (၂၇) စလလောၚ်တြးလဝ် ချဳဒရာၚ်ပၞာန်ဂှ် စဵုကဵုစၟတ်တ္ၚဲ ၃၀ အပ္ဍဲပွိုၚ် ၄ တ္ၚဲဂှ် ဗ္ဒိုပ်ဒပ်ကံၚ်ဇြဳပၞာန် ဗ္ဒါဲ ၇၀ ဗ္ဒိုပ် သီမာန်လဝ်ရောၚ် ဂွံတီကေတ် အတိုၚ်တၚ်လလောၚ်တြး ဂကောံမဟာမိတ်ကောဒေံပိဂကောံရ။

ဗော်သွးကောန်ဂကူကရေၚ် KNU မဒှ်ဂကောံရပ်လွဟ်ကောန်ဍုၚ်အရၚ်ဝှ်ကြံၚ်ဂှ် ဒဒှ်ရထံက်ဂလာန်ဒုၚ်တၠုၚ် ချဳဒရာၚ်ပၞာန် ၁၀၂၇ ဂှ်ကဵု နူကဵုချဳဒရာၚ်ပၞာန်ဏံဂှ် ကောန်ဍုၚ်အရၚ်သီုဖအိုတ် ဗီုပြၚ်ပံၚ်တောဲလုပ်အာပေါဲဗ္တိုက် နကဵုညဳညဳသၟဟ်ဟ်တံ မံက်ကၠုၚ်ဂှ် ပဒိုဝ်သဝ်တဝ်နဳ ဟီုဂးလဝ်ရ။

“ပံက်မုက်ပၞာန်တုဲ ဒးဗ္တိုက်ညဳညဳသၟဟ်ဟ် မွဲတဲဓဝ်ဏောၚ်ဟီုဂှ် နူကဵုအခိၚ်တေံရ ပိုယ်တံဟီုလဝ်ရဏောၚ်။ လၟုဟ်ဂှ် ဂွံကၠုၚ် ၂ သၞာံပြၚ် ဗ္ဒါဲ ၃ သၞာံယျ။ မုဒှ်ဒှ် ဗ္တိုက်ညဳညဳသၟဟ်ဟ် လွာဲလွာဲဂှ်ဟီုဂှ် ဒှ်ဟွံမာန်ကီုလေဝ် ရုပ်ရဴမံက်ကၠုၚ် သိုက်က် သိုက်က်ဏောၚ်ဟီုဂှ် လၟုဟ်ဂွံညာတ်ဒၟံၚ်ယျလေဝ်။ ပိုယ်တံဟီုလဝ်ဂှ် လၟုဟ်မှဟွံသေၚ်ရပုဟ်။ ဒးဗ္တိုက်ညဳညဳသၟဟ်ဟ် ဟီုလဝ်ဂှ် လအ်ကွေံကွေံ။ လၟုဟ်ဂှ်တှ်ေ အခိၚ်ထ္မံက်ကၠုၚ်ရုပ်ရဴသာ်ဏံဂှ် ပိုယ်တံ ဒးဒုၚ်တၠုၚ်ရဏောၚ်“ သာ်ဝွံ ပဒိုဝ်သဝ်တဝ်နဳ သ္ဂးရ။

ချဳဒရာၚ်ပၞာန် ၁၀၂၇ ဂှ် ဌာနဝန်ဇၞော်ကာစဵုဒၞါ NUG တံကီု ကံင်ဇြဳကဵုကသပ်ပရေၚ်ညဳသၟဟ်ဂကူ NUCC ၊ ဗော်တောတက်ကောန်ဂကူကရေၚ်ဍာဲ KNPP တံကဵု ဂကောံဇြဟတ် ပ္ညဳပ္ညပ်ပံၚ်ဖျပ် ပရေၚ်ဗကပ်ဗဗၚ်နာနာ GSCB တံဒှ်တမ် ဂကောံဇြဟတ်ပၠန်ဂတး ဟွံအောန်နူကဵု ၁၀ ဂကောံတံ ဒဒှ်ရဒုၚ်တၠုၚ်ထံက်လဝ်ဂလာန်ဂှ် လလောၚ်ပ္တိတ်လဝ်လစွံစိုတ်ရ။

မ္ၚးနူကဵုဂကောံဇြဟတ်ပၠန်ဂတးတံဂှ် ချဳဒရာၚ်ပၞာန် ၁၀၂၇ မကလိဂွံလဝ် သီုကဵုထံက်ဂလာန်ညးဍုၚ်ကွာန်တံဂှ်ဝွံ တွဵုရးသေံသၟးဟွံက စဵုကဵုပွိုၚ်ဍုၚ်ထဳချိုက် ရးသက်ကိုၚ်တံဂှ် စကၠုၚ်ပရေၚ်ပြုပြေၚ်ပၞာန်တံမာန်ယျဂှ် နူကဵုဂကောံမဟာမိတ်ကောဒေံပိဂကောံတံ ကဵုကၠုၚ်သမ္တီရ။

ချဳဒရာၚ်ပရေၚ်ပၞာန် ဂကောံမဟာမိတ်ပိဂကောံဂှ်ဝွံ ထိၚ်ဒက်ကၠုၚ် ဍုၚ်လ္ၚဵုတံမာန်တုဲ လ္ပာ်ကံၚ်ဇြဳပၞာန်ဂှ်လေဝ် မ္ၚးနူကဵုတရဴကျာ၊ ကမ်လှောဝ်ကဵုတောဲတံဂှ် သုၚ်စောဲလွဟ်လက်နက်နာနာတုဲ တဝ်စၞေဟ်ဒၟံၚ် ဟွံပိုတ်သ္ကုတ်ရ။

ပရိုၚ်−သြၚ်လောန်တိုၚ်(မ်)

ဗီု−KNU